Pilripi 3 - Ngudradreadrekadhane Ka Sisiu 魯凱語聖經

Patengatengane ka madringelrese

¹ Laretesane, yakaiyana kai akawrivaneli. Anu ikai adringi ki Tamatama si ikai ku sakiaragai, lri peela naku papia numiane kawriva ku iyangali ku vaga, papia nakwane kai matiapangelrace, papia numiane laka amuesadhane.

² Kunumi ngipapalakeba kwidra ki lamanganganga ka umawmase, kwidra tayelrelreane ka lamanganga, amani kwidra la makecenge kigelregelre ki kinawmasaneini ku umawmase.

³ Ku patengatengane, ku tarwamara ku patengane ka kiagelregelre ka lrisi, kaika amani lini, amanita. Asi lwiyane ngwakaita ki Ri ki Twaumase kainganai sukubu, ku lrigulriguta yai Yesu Kirisitu. Kaita satalu sanaka ngwakai ki beate ku tapangimiane ku lrisi.

⁴ Alaiyasi ikai ku umawmase ku lri maka satalwaku ki ngwakai ki beate ku tapangimiane ku lrisi amiamia, kunaku madudulrwaku pia kikai.

⁵ Saka samakavalrulu ku takitulalakaneli kiagelregelraku kitulrisi. Sakitulalakaku swa Iseraylriaku, ka swakaikai ki Biniyamingi ka zuku, lu singikaiyane ki erai yai, patengatenganaku ka swa Hiburu. Lu singikaiyane ku tapangimiane ki hulrice ki swa Yuda, kunaku swa Palrisaiaku,

⁶ pangukai ku kisamulane, nawahakegainga naku ki kiwkai. Lakamani, alaiyasi lu paluludane ku hulrice ki Musi la sudalepe madu kaamani ku kiatu madringelrese yai, kunaku kadrwa ku manemane ku lrika akitakaiyaneli kikaelaela.

⁷ Ai, kunadruma lri pakaesai nakwane ku iyali patuelre, kaiasasane ngwalai ki Kirisitu, wamalranga naku tuasipunane lu drelaku kilakikai.

⁸ La kaika miyaiya kikai sikakathane, wamalraku sanaka maneemane tuasipunane, asi lwiyane tinukuciacingaalranenga ku tathingalaneli ki Tamatamali ka Yesu Kirisitu arwa iyaku. Ngwalai iniane, asipunungaku patuelre, twaubulaku ki sanaka maneemane si cilri, pakai ku amalrane ki Kirisitu,

⁹ si kitulrepenge kicungulu iniane. Kadrwanga nakwane kudra ngwalai ku tapaluludane ki hulrice si ka madringelrese. Kikai yakai nakwane kikai dringelresane yai ngwalai ku takapatengatenganane ki Kirisitu ala ikai, ka baai ki Twaumase, laka salrwane ku tangadrane.

¹⁰ Akuliaku ku athingalane ki Kirisitu, pakai ku akilringavane ku puku ki tasielaneini, si la kivala siamece ku tapacadhaneini,

¹¹ anatumane la mialriaku dulru sielane twalai ki wapacai.

Walailai papia ki apadarurane

¹² Kikai kaika amia kai, pangiamianga naku iya, si kiatulrepengenga naku iya. Kwaku pacungucungula naku lailailai, ku atara malraneli kikwini pakalreva, ku patengatengane, pakai ku adaruraneli kai ki apadarurane. Ku Yesu Kirisitu wamalranga nakwane.

¹³ Laretesane, kainaku ka amia kai wadarurunga naku ku nau mwa iyaiyali, saliakavaevaku ikai ki taingeane ku awngane, amani ku akarimurane ki lrilrikudru, si pakaelre ku puku kisilape ki talicubungu.

¹⁴ Papiaku ku nau daruru iyaiyali lecege lailai, pakai ku amalrane ku pakalreva, kikai pakalreva amani kwidra swa subelebelenganane ka bavane ka niake, ka Twaumase ka pangwakai ki Yesu Kirisitu dawlu nakwane mwa malra.

¹⁵ Lakamani, ikai mitane ku mabeanga ku takisuswane lrika miyaiya kai ku takidremedremane makanaelre, alaiyasi ikai ku maelane ku takidremedremane numi, ku Twaumase lri pudriadriingai pelaela numiane.

¹⁶ Adravane tumatumatumane, tasingikai kudra palululudungata ku kakudhane papia cucubungu katwase.

¹⁷ Laretesane, kunumi pacungucungula twalralrau nakwane. Pasiakainga nai numiane cegecege ku atwalralravane numi; twalralrava kudra ki latwalralralrau naiane ku umawmase.

¹⁸ Kingikalralenga naku pakipapawlringau numiane, kaiasasane lai lri pela naku alralrese pakipapawlringau numiane: Yakai kwidra la ngwalai ki kakwakudhane lini si abadha ki ziwzika ki Kirisitu.

¹⁹ Ku angimiane lini yai lri kamudu, asi lwiyane kudra twaumase lini yai barange lini. Kai lalasu twalrigu kudra ki akapwalane, si kai karimurimuru kai lamanemane kawmasane.

²⁰ Ai, swa subelebelengeta ka umawmase, saliakavaevata ku kidremedreme ukalavalava ki Takipalribulribulaneta, kamani ku Tamatama ka Yesu Kirisitu twalai belenge mulebe.

²¹ Lri arakai ku pukuini kamani kwidra sanaka manemane patwapapalra iniane, lri pakabalrithi kai ki twaramuru si lai tara pacai ka kinawmasaneta, lai dulrungata mararamau iniane, ikainga ku lrigu ka kinawmasane.