Pilripi 2 - Ngudradreadrekadhane Ka Sisiu 魯凱語聖經

Twatakitwalravane ki Kirisitu

¹ Nau kivaga, ku niake numi ikai adringi ki Kirisitu yakai ku tapakakecengane numiane? Ku sakialibakeini yakai ku tapakalrumalanenga numiane? Maelrelre numi ki Siri? Yakai ku tamakilibalibakane numi makisapalrapalra ku kidremedreme?

² Alaiyasi ikai, lri kitubiaku numiane, anu pikai ku maramaramau ku apadarurane, pikai ku maramaramau ku sakialibake, si maramaramau ku takidremedremane, la nau kisuete ku sakiaragai.

³ Madha ngipapakaesaesai kaicicilri, madha kararau ku kaika patengane ku nagane, mapasingikaikaiya, sanianiange nakwane ku palrapalra la iya drele.

⁴ Madha ngikakakalikaalithi sikakathane, kakalitha ku amuesadhane ki palrapalra.

⁵ Kunumi malra sikidremedreme ku kidremedreme ki Yesu Kirisitu:

⁶ Yakai ku taka Twaumasananeini, ai kai arakai capange ku tamararamavaneini ki Twaumase ku puku.

⁷ Ngiabaalrelringa, ngiakakamani cilri patuelre, si malra ku tangimiane ki duri. La aumawmase, si sikinawmasane ku tangimiane ki umawmase mutaluvaivai.

⁸ La ngiatatwalebe, la pasalaladha pakela ki wapacai, si pacai ikai ki ziwzika.

⁹ Lakamani, ku Twaumase pwabelenge iniane, pakela ki abebeelengenga, la baai ku nagane iniane kudra walribate ki sanaka naagane.

¹⁰ Pakai ku amusakenane ku nagane ki Yesu, sanaka panianianiake kai belenge, kai kawmasane, si kai lebe ki kadaengane, lri papia iniane sukubu makanaelre,

¹¹ sanaka ngudui lri thingale si pelaela: Ku Yesu Kirisitu amani ka Tamatama, si pakarededele drengedrengere ku lrigu ki Tama ka Twaumase!

Ledra ki yakawmasane

¹² Kilibakeli ka latalragilragili, sa ikaiyaku taelre numiane kialalra numi nakwane; kikainga kainaku yakainga numiane kwini, naika makilalalra numi nakwane. Dradreela si ukuludru, madha isadra ku akisamulane numi tulrepenge ku akipalribulane numi,

¹³ asi lwiyane ku Twaumase taikaiyane ki kidremedreme numi kawaungu, lanu ubangalre si la dulru pangimia ku tharirane ku kidremedremeini.

¹⁴ Adravane pia numi ku manemanenga madha akwiyaiya madha madrikidrikisi,

¹⁵ lanu alrivilrivi ka kadrwa ku ngialisiane, ikai kai ki ngialisiane ka zidai, kamania kudra lalake ki Twaumase ka kadrwa ku ngilisianane. Aledra ikai kawmasane, mia ki tariau paledra subelebelenge,

¹⁶ malra kwini mathariri turamuru ka patharwakai ki niake ka vaga si pelaela liniane. Lu pia numi kikai, ikai ki takelane ngusela ki Kirisitu ka vai, lri ikainga ku tasakaiyaneli dradradrarane, asi lwiyane kikai lri pelaela ku takwalrianeli patuelre ala ka kai avutha.

¹⁷ Alaiyasi lri tara arakaiyaku ku eraili tu Paralikiliki ka lrisi, la paralikiliki pikai ki niarakaiyane ku salrwane numi patarumara ki Twaumase ka sapatarumarane ka lamanemane, lri kiragadhaku, si taelre numiane makanaelre kisupilri kai sakiaragaili.

¹⁸ Laka thadalrane, lu kiragai numi, mialria pakisupilri nakwane ku sakiaragai numi.

Timuthi si Ipahurudituse

¹⁹ Satalwaku ki Tamatama ka Yesu, anatumane la kai tarathainu si la sikawlaku ki Timuthi mwa numiane kwini, lanau dulru kilalra ku ngwakai numiane si kasasa.

²⁰ Kwi lasu kathane ku mararamau ki kidremedremeli, kapatengane kakalithi numiane.

²¹ Kai palrapalra ngiapapasikaikai sikakathane, kai makalithi ku ngwakai ki Yesu Kirisitu.

²² Ai kai Timuthi ku takikilrialringavaneini wathingale numi pudriadringai makanaelre, ku tamangangimiane nai mia ki lalake si tama, pasikai ki awngane ki hukuingi karededele kaungu kwalri.

²³ Anatumane sana thingalaku ku angimiane kai pangukai nakwane, la makakaaiyaku sikawlu iniane katwase drele numiane.

²⁴ Masalrwaku ku Tamatama lri kelrete ku asaradrelaneli numiane.

²⁵ Lu kidremedremaku, nai sateatedraku ki retesaneta ka Ipahurudituse siwlri mwa numiane kwini. Wapilri numi si pakainganai paralubu nakwane, si tupapalra nakwane kaungu, tupapalra nakwane kikaruburu.

²⁶ Kai lasu mabarengerenga numiane makanaelre, si la kwalri ku tathingalane numi iniane ala ka macaeme.

²⁷ Patengane ka namacaeme, nai padaalrunga si pacai. Ai ku Twaumase makalithi iniane, la kai kakalithi iniane sikakathane, mialri kakalithi nakwane, lanau kai kipadradresenge ku madradrau ku atubiane ki kidremedreme.

²⁸ Lakamani, ku sara pakisamulali sateatedre pasiwlri iniane, lanu yelrelre si kiraragai, kikai lri mialri dulru mwalra ki atubiane ki kidremedremeli.

²⁹ Anatumane la ikai numi adringi ki Tamatama si kiraragai tarumara iniane. Kunumi usakena tukucingalre ku miyaiya iniane ku umawmase,

³⁰ asi lwiyane pasiakai ki awngane ki Kirisitu wadulru ngiacacilri ku niakeini, si kisanu pacapaacainga, pakai ku acugane ku kaika maka pasikai numi nakwane.