Pilripi 1 - Ngudradreadrekadhane Ka Sisiu 魯凱語聖經

¹ Kunaku ka Pawru si Timuthi ka sasiakawlu ki Yesu Kirisitu, watigami nai si baai ki yakai Pilripi ka kawkawlu ki Twaumase, kamani ku sinzia ki Yesu Kirisitu, si kiacapili ki kiwkai si la taraparaluralubu.

² Ku migemi si sulivatane ki Tamaita ka Twaumase si Tamatama ka Yesu Kirisitu ani baai numiane.

Wainulri ku Pawru pasikai ki watarumara kai ki tigami

³ Sana ngulringavaku numiane, kiaseasenaku ki Twaumaseli,

⁴ lu pasikaikaiyaku numiane makanaelre inulri kiaragai kai kidremedremeli;

⁵ asi lwiyane twalai ku tapathagilane kwini ki vai pakela kaiasasane, ikai ki adindwane taparalubane numi nakwane.

⁶ Masalrwaku, kudra yakainga numiane ka amani ku pathagili kikai mathariri ka awngane ka Twaumase, lri tara pacungulu kikai ki awngane, si luka takelane ngusela ki Yesu Kirisitu ka vai lai lri patulrepenge kikai awngane.

⁷ Taikaiyane numi ki kidremedremeli! Naika takabarengeeraneli numiane, asi lwiyane, adravane ka yakaiyaku kai taememengane, adravane sa ikaiya naku ki ngialralraingi pasikaikai ki hukuingi kidrikisi si pelaelaela, kiasupilringa numi makanaelre ku baai nakwane ki Twaumase ku mwakalrivili ka puku.

⁸ Ku Twaumase wathingale, arakaiyaku ku sakialibake ki Yesu Kirisitu kabarengere numiane lu iya ku, kikai vaga tengatengane.

⁹ Ku pasikaili numiane inulri yai: Kwi sakialibake numi kai lri retege ku atupapalrane ki patengane ka thingalane si thingalane kidremedreme ku mathariri si malisi adili,

¹⁰ lai dulru numi pilri kudra mathaithaariringa. Lukamiyaiya kai, ikai ki akelane ngusela ku vai ki Kirisitu, lri kabula numi ka kadrwa ku akitakaiyane kikaelaela.

¹¹ Ku sikace numi lri suete ku ngukai ki Yesu Kirisitu si ikainga ku madru ki sakialibake, si lrigu drengedrengere ki Twaumase.

Pasiakai ki Kirisitu si panianianiake

¹² Labetakaneli, ani thingale amiaku numiane, ku takipadradresenganeli paraalubulringa si aru paswadrau ki hukuingi.

¹³ Sa mia kwini, kai tarakadrekadrenge ki daane ki talialalai ka lakwapingi makanaelre, si kikai drumane kai yakai kikai ka laumawmase makanaelre, wathingale makanaelre ka ngwaladhaku ki Kirisitu si kiemenge.

¹⁴ Kai takiemenganeli, arwa takaalralringa kai arwa kasalru ki Tamatama, arwa kagarange, ka kadruanga ku saukukuludru lini ku apelaelane ku vaga ki Twaumase.

¹⁵ Unu, yakai kudra la ngwakai ki pathalrane si akikalisiane ku kidremedreme ku tapelaelaelane lini pangukai ki Kirisitu. Ai yakai kwidra la patengatengane ku kidremedreme.

¹⁶ Kwidra la ngwakai ki sakialibake si pia kikai ku umawmase, wathingale makanaelre ki Twaumase ka wabaai nakwane ku awngane ku lrika apasikaiyaneli ki hukuingi kidrikisi.

¹⁷ Kudra drumane ku umawmase lu pelaelaela pangukai ki Kirisitu kaika mabula ku takidremedremane, patwalai kwidra ki nawpia kwini iyaiyaini ku maelane ka kidremedreme, kai lalasu pasana arakaikai kai takiemenganeli si daedarepe ku makakalra ku apangilisianane nakwane.

¹⁸ Ai, kikai manemane ku akatumanane? Adravane pacengecenge pasalriu ku takidremedremane lini, sana kiputaluvaivai pelaela ku Kirisitu, lri kiragadhaku. Lai pacungulaku kiragai,

¹⁹ asi lwiyane wathingalaku lri ngukai ki inulri numi si Ri ki Yesu Kirisitu paralubu, lri tara siwlriwlriaku kipangilralraingi.

²⁰ Ku karacangeli ukalava si sidrama yai: Kaika kathane ku kaika akapwalaneli ikai ki awngane, anika tasueteane ku garangane, inilringa kaiasasane, adravane ka apacadhane ka apanianiakane, lri ngipapakaelreaku arakai lrigu ki Kirisitu.

²¹ Asi lwiyane papia nakwane, kai panianianiakeli yai, amani ki Kirisitu, lu pacadhaku, lrika makaakalra ku akaesadhane!

²² Ai, alaiyasi sa panianianiakeana naku dulru pia ku makaakalra ku mathariri ku awngane, lri kainaku thingalenga ku apangimiane pilri.

²³ Yakaiyaku kabicelrakane kai ki tara makucingalre, apia kidailaku kai ki kawmasane, si katwase ikai taelre ki Kirisitu, naika mathaithaariringa.

²⁴ Ai, ngwalai numiane, lu panianianiakaku lrika makuciacingalre.

²⁵ Pangukai kikai masalrwaku ka kadrwa ku lrikilrikane, wathingalaku lri panianiakeana naku, si lai lri taelreaku numiane makanaelre, paralubu ku adilane numi ikai ki takisuswane, si aru kiragai,

²⁶ Ku pacugane yai lu pelanata madredrele, lu ikai numi adringi ki Yesu Kirisitu lri aru ngukai numi nakwane ngitatulrigu!

²⁷ Ku makuciacingalrenga yai: Ku tapanianianiakane numi nai pamamwa ku kitubi ki hukuingi ki Kirisitu. Lu kamiyaiya kai, adravane ku wadulrwaku ku kainaku wadulru kela drele numiane, wathingalaku patuelre numiane ka maramaramau ku tapadarurane numi, ka makeecenge kai lri taluela, si maramaramau ku kidremedreme maparawralubu pasikai ki salrwane ki hukuingi kikaruburu.

²⁸ Ikai ki sanaka awngane kailri ki kukuludru ki wabaebalre numiane ka laumawmase; pagagarangana, arakai kikai padredrele liniane, kwi lalasu lri tara kamudu, lai tara kipalribulu numi, asi lwiyane kikai yai Twaumase ka marasikai.

²⁹ Ku malra numi ku mwakalrivili ku puku si kipuawngane ki Kirisitu, kaika masalru iniane sikakathane, lri mialri pasikai iniane kwalri.

³⁰ Kikai asasane, kai lri katumane lu tupapalra numi nakwane kikaruburu, kikai akikaruburane, wadrelenga numi lu kikaruburaku, lri tara kilalra numi, thadaalraneana ku piapiali kikaruburu.