Pilrimunge 1 - Ngudradreadrekadhane Ka Sisiu 魯凱語聖經

¹ Kunaku ka Pawru, ngwaladhaku ki Yesu Kirisitu si kiemenge. La tadrusa nai ki Timuthi si tigami ki kadalame naika papapalra nai kaungu ka Pilrimunge,

² si yakai kai ki daanesu irubu ka kiwkai, laka wabaai nai ki Apia ka ababai si papalra nai pasikai ki Twaumase ka Arekipuse.

³ Ku migemi ki Tamaita ka Twaumase si Tamatama ka Yesu Kirisitu, ku sulivatane anibaai numiane!

Sakialibake si salrwane ki Pilrimunge

⁴ Retesaneli ka Pilrimunge! Sana inulriaku tara matiakaiyaku muswane, ka tapasikaiyaneli muswane kiaseasene ki Twaumaseli,

⁵ asi lwiyane kialalraku ku patharukai ki sakialialibakesu ki lasinzia makanaelre, si ikai ku salrwanesu papia ki Tamatama ka Yesu.

⁶ Kiatubiaku ki Twaumase ku adulrwaneta ngukai ki tayelrelreaneta yaadringi ki vaeva ka salrwane, si aru pulringau patuelre ku tharirane lu kielreane ki Kirisitu.

⁷ Kinilibakane ka retesane, ku sakialibakesu maadrau turamuru ku patwalaili kiragai si kipasapukwane; ku lasinzia makanaelre la ngwalai muswane si kiragai.

Pasiakai ki Unisimu kitubi

⁸ Kudra takaretesananeli muswane ikai ki Kirisitu, nai kagarangaku pelaela muswane ku naika apianesu ku awngane,

⁹ ai, ngwalai ki sakialibakeli muswane, lai lri kitubiaku muswane. Unu kunaku ka Pawru, amaniaku ku nisikawlane ki Yesu Kirisitu, kikai la ngwaladhaku iniane si icengecenge kiemenge, ai palraingaku pia kikai.

¹⁰ Ku kitubili muswane yai amani ki Unisimu. Kai lasu amani ku lalakeli ikai adringi ki Kirisitu, sa ikaiyaku takiememengane ikai ki takisuswane la atamanga naku iniane.

¹¹ Kunadruma kai lasu papia muswane kadrwa ku paluludane, kai papia nakwane papia muswane tara yakai ku akatharirane.

¹² Kaiasasane lu satedra ku iniane pasiwlri mwa muswane kwini, maru wasatedrenga naku kai kidremedremeli.

¹³ Nakiasanu ruthukaku iniane, kai tangukaiyaneli ki hukuingi si kiemenge, la nai atalingikaiyane muswane kaamani ku marasiakaikai nakwane,

¹⁴ ai, anatumane laka kiragaisu pasingikidremedreme patuelre, ka kaika nivuthaane. Sana kaika palraingisu, kadrwa ku nawpia iyali.

¹⁵ Ku tapadawdalruane katwase muswane ki Unisimu, alau ani ruthuku ngipapikai palralrawthu amia muswane.

¹⁶ Kaiasasane, kai lasu kaika duringa, amaninga ku walribate ki duri, asi lwiyane amaninga ku kinilibakane ikai adringi ki Kirisitu. Pangukai nakwane, tengatenganenga ka miyaiya kai, sikamanianenga papia muswane! Asi lwiyane yakainga ku tamangangimiane numi ka tawkisu laka sasiakawlu, si laka betakane ikai adringi ki Tamatama!

¹⁷ Lakamani, alaiyasi ka katalragianeli iya su nakwane, alra sawlri iniane, miaku tatarumaranesu nakwane.

¹⁸ Alaiyasi pasalriwana muswane, ku akiame muswane ku manemane, pacasanga pikai ki naganeli patuelre.

¹⁹ Yakaiyaku kai ngikakamani pacase: Kwaku ka Pawru nau kamaninga ka marasiakai sawlri. (Unu, kainaku lri pangulringau muswane, ku kiamesu nakwane ala ka amani kwi niakesu!)

²⁰ Lakamani, betakaneli, ngwalai ki Tamatama, nau kitubi muswane ki kikai, lani kaliapai kai amece ki kidremedremeli! Ikai adringi ki Kirisitu mabetabetaketa makanaelre.

²¹ Masalrwaku ka lri kilalrasu nakwane, alakamani kai pacaseli kai tigami. Ku patengatengane, wathingalaku, ku piasu lrika silrialribate ki kitubili.

²² Thadalraneana, pasikaiyangaili padulru ku taikaiyane, anatumane ku Twaumase la palraingi ku inulri numi makanaelre amiaku, lanau siwlri mwa numiane kwini.

Bibiilrilinga ka sasukubane

²³ Ngwalai ki Yesu Kirisitu si tupalra nakwane kiemenge ka Ipahurase ai amiamia numiane.

²⁴ Papapalrali kaungu ka Maruku, ka Arisetarekuse, ka Dima si Luka mialri ai iyaiya numiane!

²⁵ Ku Tamatama ka Yesu Kirisitu ani baai ku migemi numiane makanaelre!