Nipadrelane 9 - Ngudradreadrekadhane Ka Sisiu 魯凱語聖經

¹ Ku mwasakalrima ku sasiakawlu belenge sangirapa, wadrelaku ku vaeva ku tariau ku twalai belenge tuverevere mulebe, si mucilri mwa cakena. Kikai tariau tarwamara ku sawsi ki valrulrange.

² La muelebe kwini ki valrulrange, kwini adringi la kainganai tuebebelre, miakau twalai kainganai ki maadrau ka tatwapwapudhane; kai vai si subelebelenge la ngwalai ki ebelre ki twalai kai ki valrulrange si akabalrithi kadradrimiti.

³ La ikai ku apapawku ku twalai ki ebelre kainganai, si usarare mulebe; kwi laapapawku tarwamara ku puku, mia ki puku patuelre ki yakai lebe ki apapase.

⁴ Kwi laapapawku kiadrekase ku kaika akabebetethane ikai kai ki kadaengane ki ubulu, angatu, si drumane ka lawacebecebe, akabebetethane sikakathane kudra ki la kai kiapuhange papunu ki Twaumase ku umawmase.

⁵ Kai apapawku kadrwa ku puku lini papacai kai ki laumawmase, lri pakwalri pakiangeange liniane patara lrima ka dramare sikakathane. Ku sakiangeange mia ki kiakace ki apapase.

⁶ Ikai kai ki tinaralrimane ka dramare, adravane kitubi kisanu pacai lri kai maka dulru, lu kisanu pacai lri kai maka pacai.

⁷ Ku tangimiamiane ki apapawku mia ki lri kikaruburu ka matilibi ka rigi. Ku pikai lini ki awlru mia ki kingi ka pagamucu; ku lringau lini mia ki lringau ki umawmase.

⁸ Ku isiu lini mia ki isiu ki ababai, ku valisi la mia ki valisi ki raiyungu.

⁹ Ku cucubungu lini pikai ki tuku, mia ki tupi ka adreme, ku lingau twalai ki sapakepake mia ki lingau ki takaalra ka palridingi ki rigi ka malrungulrungulrungu lri kikaruburu.

¹⁰ Yakai ku tawthu si ceneke lini, mia ki apapase, amani kikai tawthu ku yakai ku puku si pakwalri pakiangeange ki umawmase patara lrima ka dramare.

¹¹ Yakai ku tangea ku talialalai ku waruthuku liniane; kwini talialalai amani kudra waruthuku ki valrulrange ka sasiakawlu belenge. Ku naganeini arakai ku vaga ki swa Hiburu sia Abadungu, ku vaga ki swa Gurike sia Apulunu.

¹² Ku aswalaalanga ku amatikurwane ngialribatenga; ukalava, lubibilrili yakaiyana ku taidrusane ku amatikurwane ku lri kela.

¹³ Ku mwasakaeneme ku sasiakawlu belenge sangirapa, kialalraku ku lingau ku twalai ki lapiyu ki kingi ka tapatarumaramarane ikai cucubungu ki Twaumase.

¹⁴ Kikai lingau amia kai kwini ki warapa ki mwasakaeneme ka sasiakawlu belenge, “Malra pulatadre kwini ki tasupate ka sasiakawlu belenge kwi kiaemenge pikai Yuparati kadravane!”

¹⁵ Kwini tasupate ka sasiakawlu belenge la kipulatadre. Kwi lalasu kiakelretenga, ka lri ikai kai ki caili, ki dramare, ki vai, ki zikange, papacai patuelre ki taingeane ki nipautulrwane ki sanaka umawmase.

¹⁶ Ku kilalrali ku tatathane ki ngwarigirigi ku kwapingi ta 200,000,000.

¹⁷ Ikai ki maburusi, wadrelaku kwini ki larigi si ngwarigirigi ka kwapingi. Salakebane ki tuku ka tupi ki ngwarigirigi ku duliane mia ki apwi, ku takasaleseane mia ki salesese ka tinukucingalrane ka lrenege, mia ki thilaru ku buravanane. Ku awlru ki rigi mia ki awlru ki raiyungu, twalai ki ngudwini yakai ku apwi, ebelre, si thilaru kaingananganai burusu.

¹⁸ Ku taingeane ki nipautulrwane ki umawmase la kipapacai kwini ki twalai ki ngudui ki rigi burusu kwi apwi, ebelre, si thilaru.

¹⁹ Ku puku ki rigi yakai ki ngudui si tawthu lini. Ku tawthu lini mia ki sulrau, ka yabelenge ku awlru; la arakai kikai awlru dula ki umawmase.

²⁰ Kudra drumane ku umawmase ku kai yakai kai ki matikurwane kipapacai thadaalraneana kai ngitatupela, la kai cilri ku ngipapia lini ku samiamiange. Kwi lalasu thadaalraneana sukusukubu ki Akema, si kingi, gingi, lriwlu, lrenege, si niaraangatwane pia ka la kai wadulru drele, kai wadulru kilalra kai wadulru dadavace ka lamanemane.

²¹ Kwi lalasu pasalriu papacai, tulisi, capange ki sawvalai si ababai, kupa ku la miyaiyakai ku pasalrivane, la kai ngitatupela.