Nipadrelane 8 - Ngudradreadrekadhane Ka Sisiu 魯凱語聖經

Mwasakapitu ka hange

¹ Ku Lrulai ka Kiu sa mucaebe ki mwasakapitu ka hange, kai subelebelenge mababitingi kakadrwa ku lingau, lri ikai ku apararamau ki tuki.

² Ala kirimwa ku drele ku acegecege ikai cucubungu ki Twaumase ka tapitu ka sasiakawlu belenge; kwi lalasu tarwamara ku pitu ku rapa.

³ Ku taingeane la ikai ku tangea ku sasiakawlu belenge ku kaiyanganai, ecenge ku kingi ka salamalamane ki sangwalreeme, si acegecege icucubungu ki tapatarumaramarane. Kwi lasu tarwamara ku makaalra ku sangwalreme, paelre ku inulri ki lasinzia pakaredele patarumara pikai cucubungu ki taetalane niarakaiyane ku kingi ka tapatarumarane.

⁴ Ku tatuebebelrane kwini ki sangwalreeme si inulri ki lasinzia twalai ki alrima ki sasiakawlu belenge si mubelenge mucucubungu ki Twaumase.

⁵ La pacuungulu, ku sasiakawlu belenge waecenge ku salamalamane ki sangwalreeme, la malra kwini salamalamane ki sangwalreeme si pwa pasaela pasuete ku apwi ki tapatarumaramarane, la verevere pwalebe. Ala kirimu ikai ku dreredrere, elrange, lrikace si lingilingi.

Rapa

⁶ Ala, kwidra tapitu waecenge ku pitu ka rapa ka sasiakawlu belenge la padulrudulru ku angirapane.

⁷ Ku aswalaalanga ka sasiakawlu belenge sangirapa, yakai ku kananu si apwi, ka eraeradhane, la pwa gugu pulebe. Kai kadaengane ku taingeane ki nipau tulrwane, si angatu ka taingeane ki nipau tulrwane, la kulama patueelre; sanaka ubulu la kulama patuelre.

⁸ Ku mwasakadrusa kwi sasiakawlu belenge sangirapa, yakai ku vaeva lu drelane mia ki kwadaladalai ka maadrau ka lregelrege si kiverevere pwa ki laveke. Ku taingeane ki nipautulrwane ki laveke la akabalrithi aerai,

⁹ Ku yakai ki laveke ku waudriwdripi la pacai ku taingeane ki nipautulrwane, ku varukuru la kalisi ku taingeane ki nipautulrwane.

¹⁰ Ku mwasakatulru ku sasiakawlu belenge sangirapa, yakai ku maadrau ku tariau, mia ki kwadaladalai ka taliwlare, twalai belenge tuverevere mulebe, si makakai ki taingeane ki nipautulrwane ki kadravane si sanaka tacebeane ki acilai.

¹¹ (Kikai tariau ku nagane sia “Mapalili kangadha”.) Kai acilai ku taingeane ki nipautulrwane la akabalrithi kapalili. Amani sa kapalili kai acilai, takaalra ku umawmase ku waungulu kikai acilai si pacai makanaelre.

¹² Ku mwasakasupate ku sasiakawlu belenge sangirapa, ku taingeane ki nipautulrwane ki vai, ku taingeane ki nipautulrwane ki dramare, si taingeane ki nipautulrwane ki tariau kiapungupungu patuelre. Ku vai, dramare, tariau la kawlrau ku taingeane ki nipautulrwane ku ledra; ku taingeane ki nipautulrwane ki vaiyane kadrwa ku ledra, ku taingeane ki nipautulrwane ki maungu laka kadrwa ku ledra.

¹³ La masiasiraraku, si kilaalranga ku vaeva ka takanga ku ngiapalapalai ikai belenge si akwadrau iya kai, “Asiamia! Asiamia! Kai lebe kai umawmase lri matisalregesege! Kudra drumane ka tatulru ka sasiakawlu belenge lri ngirapanga!”