Nipadrelane 7 - Ngudradreadrekadhane Ka Sisiu 魯凱語聖經

Ta 144,000 ka swa Iseraylri

¹ Sakabilrilinga, wadrelaku ku tasupate ku sasiakawlu belenge ku acegecege maececebe ki babiabila ki kadaengane, si telenge ki valrigi ki twalai ki kadaengane kidruanga, ku kaika avalrigane ikai ki kadaengane, ki laveke, si angatu.

² La dreelenga naku ku taingeane ka sasiakawlu belenge, maecenge ku hange ki palralrawthu panianiake ka Twaumase, si twalai tali talrawane ubelenge. Kwi lasu la akwadrau karariau papia kwidra ki tarwamara ku baai ki Twaumase ku puku, si lri dulru kabebetethe ki kadaengane si laveke ka tasupate ka sasiakawlu belenge si tawtau iya kai,

³ “Madha kabebebetethe ki kadaengane, laveke, si angatu, nai paaswalana puhange pikai ki punu ki sasiakawlu ki Twaumase.”

⁴ La kilalraku ku amia kai, ikai ki kiapuhangenga ki lazuku ki swa Iseraylri, elreelre ta 144,000 ku umawmase:

⁵ Ku ngwakai ki zuku ki swa Yuda ku kiapuhange, ta 12,000 ku umawmase; ku ngwakai ki zuku ki swa Riwbingi, ta 12,000 ku umawmase; ku ngwakai ki zuku ki swa Gade, ta 12,000 ku umawmase;

⁶ Ku ngwakai ki zuku ki swa Asere, ta 12,000 ku umawmase; ku ngwakai ki zuku ki swa Napetali, ta 12,000 ku umawmase; ku ngwakai ki zuku ki swa Manase, ta 12,000 ku umawmase,

⁷ Ku ngwakai ki zuku ki swa Simiune, ta 12,000 ku umawmase; ku ngwakai ki zuku ki swa Lrivi, ta 12,000 ku umawmase; ku ngwakai ki zuku ki swa Isakare, ta 12,000 ku umawmase;

⁸ Ku ngwakai ki zuku ki swa Zibulungu, ta 12,000 ku umawmase; ku ngwakai ki zuku ki swa Yusepe, ta 12,000 ku umawmase; ku ngwakai ki zuku ki swa Biniyamingi, ta 12,000 ku umawmase.

Twalai sanaka ininiinunga kainganai ka lamapapangale

⁹ Sakabilrilinga, wadrelaku, ala ka laumawmase tathathatha, kai asipane ku tatathane. Kwi lalasu twalai ki lakuni, ki cacekele, ki laminzuku, ki makaelaela ku vaga kainganai, si acegecege makanaelre icucubungu ki taetalane si Lrulai ka Kiu, la silaimai ku lrawlrapungu, si ecenge ku ricingi ki abare.

¹⁰ Kwi lalasu la akwadrau tawtau iya kai, “Ku sapalribulane twalai ki wanene ikai ki taetalane, ka Twaumaseta si Lrulai ka Kiu, kainganai!”

¹¹ Ku sasiakawlu belenge makanaelre acegecege ngithalringulu ki taetalane, ki laciwru, si supate ka panianianiake ka waudriwdripi. Kwi lalasu yacucubungu ki taetalane pidruru, si sukusukubu ki Twaumase,

¹² la iyaiya kai, “Amingi! Ku sadrengedrengerane, lrigu, lrigilane, sakiaseasenane, kiwsakenane, lrekeme, si puku lri papia ki Twaumaseta, lri kai kaelaelanga palralrawthu! Amingi.”

¹³ La ikai ku tangea ku ciwru ku kiavaga nakwane iya kai, “Aneane ki lakikavai sialaimai kai lrawlrapungu? Kai lalasu twalai inu kainganai?”

¹⁴ La tubalreaku iya kai, “Sinsi, wathingalesu.” Kwi lasu la iya kai nakwane, “Kilakikai umawmase kialringaunga ku maadrau ka hakegai. Kwi lalasu arakai ku erai ki Lrulai ka Kiu pakalrapungu ku laimai lini.

¹⁵ Ngwalai kai, kwi lalasu acegecege icucubungu ki taetalane, si pivai pimaungu ikai ki daane ki Twaumase kawaungu pasikai iniane. Kwini wanene ikai ki taetalane ka Twaumase lri ngikakamani palribulu liniane.

¹⁶ Kwi lalasu kai lri kasilrasilrawnga, kai lri kakadhakadhamenga; ku vai si sanaka culwane lri kai dulrunga culu dula liniane.

¹⁷ Asi lwiyane kwini yakai ki taetalane ka Lrulai ka Kiu lri lapunga liniane, si ililuku liniane mwa ki tacebeane ki acilai ka niake; ku Twaumase lai lri sakidri meale ku lrese lini.”