Nipadrelane 6 - Ngudradreadrekadhane Ka Sisiu 魯凱語聖經

Mwacaebe ku lahange

¹ Wadrelaku ki Lrulai ka Kiu sa mucaebe ki aswalaalanga ki pitu ka hange. Sakamani kwidra, kialalraku ku vaeva kwini supate ka panianianiake ka waudriwdripi avavaga si mia ki dreredrere ku lingau, iya kai, “Bwala!”

² Sa drelaku, ku vaeva ka lrawlrapungu ka rigi; kwini ngwarigirigi la ecenge ku bu, si la tarumara ku kibaaini ku civare, ala katwase kikaruburu, la apapelaela pamalebe.

³ Ku Lrulai ka Kiu sa mucaebe ku mwasakadrusa ka hange, kialalra ku ki mwasakadrusa ka panianianiake ka waudriwdripi amia kai, “Bwala!”.

⁴ Kudra vaeva ka rigi ala kainganai, si ka duduli ka rigi. Kwini ngwarigirigi la malra ku puku, la makarururuburu kai lebe, si mapapacapacai kai umawmase; kwi lasu la tarumaranga ku vaeva ka maadrau ka lrabu.

⁵ Ku Lrulai ka Kiu sa mucaebe ku mwasakatulru ku hange, kialalraku ki mwasakatulru ka panianianiake ka waudriwdripi amia kai, “Bwala!” Sadrelaku, laka vaeva ka icecelrenge ka rigi; kwidra ngwarigirigi la ecenge ku vaeva ka tintingi.

⁶ La kilalraku ku mia ki yakai ku lingau ku twalai ki panianianiake ka waudriwdripi iya kai, “Ku niulrawlravane makavale lri langai ngwakuvaeva ki kisi ku tatititiki ka mugi, ku niulrawlravane makavale lri langai ngwakututulru ki kisi ku tadradradrau ka mugi. Ku ulrive ka lawlau si bava madha kabebebetethe pasawlrawlra!”

⁷ Ku Lrulai ka Kiu sa mucaebe ku mwasakasupate ku hange, kialalraku ki mwasakasupate ka panianianiake ka waudriwdripi ku amia kai, “Bwala!”

⁸ Sadrelaku, laka vaeva ka ngilrawlrawlrapungu ka rigi; kudra ngwarigirigi ku nagane sia Wapacai, kai swadriadringi twapapalra iniane. Kwi lalasu wamalra ku puku, si la marasikai erece ki taingeane ki nipau supatane ki kadaengane, lri arakai ku amakakaruburane, silravane, swalrubu, si waudriwdripi ikai lebe papacai ki umawmase.

⁹ Ku Lrulai ka Kiu sa mucaebe ku mwasakalrima ku hange wadrelaku ikai tailebe ki tapatarumaramarane yakai kudra laabake ki nangwakai ku tapelaelane ku vaga ki Twaumase, pakaelre ku kidremedreme pathingale si kipapacai ka umawmase.

¹⁰ Kwi lalasu akwadrau tawtau iya kai, “Sanianiangenga ka patengatengane ka magagemegeme ka Tamatama! Luiganenga lri saibangesu ki umawmase lebe, pusakai ku tatueraeradhane nai?”

¹¹ Kwi lalasu la tarumara makanaelre savavaeva ku lrawlrapungu ka laimai, la kilalra ku vaga ku peaelaela liniane, ku aisadrane lini padaalru, ukalava pakela kudra ki redelane lini kawaungu pasikai ki Tamatama si kudra laretesane ku lrika angimiane liniane kipapacai, si padarurunga ku atathane ku umawmase.

¹² La dreelenga naku ki Lrulai ka Kiu sa mucaebe ku mwasakaeneme ku hange. Sakamani kwidra, kai kadaengane la pakilringau lingilingi; aicecelrenge kai vai, mia ki icecelrenge ka kaimadhane; kai dramare la aduduli patuelre, mia ki erai;

¹³ kai latariau la twalai belenge tuverevere mulebe, mia ki kaiyana ka malreme ka madru ki icizike ka kiavalrigi si mururu twalai ki cebe.

¹⁴ Kai subelebelenge maru nibalrulane ka hungu ka kiabalrulu, si kai adrelanenga; kai lalregelrege si vuvugu ki laveke lri twalai ki taikaiyane kipataluela.

¹⁵ Kai talialalai lebe, si maerece, tamatama ki kwapingi, si sapaiswane, yakai ku puku, duri, si ngialralraingi ka umawmase, lri katwase makanaelre kilepenge ikai ki barungulu si lilibane ka alrisapesape.

¹⁶ Kwi lalasu lri papia ki lregelrege si alrisapesape tawtau iya kai, “Mukadrula makakai naiane! La malra naiane sekete, ku akilepengane nai kudra lringau ki wanene ikai taetalane si dringelresane ka sakaelaelane ki Lrulai ka kiu!

¹⁷ Asi lwiyane ku akaelaelathane liniane ku vai wakelanga; aneane ku lri maka dulru acegecege?”