Nipadrelane 5 - Ngudradreadrekadhane Ka Sisiu 魯凱語聖經

Nibalrulane ka hungu si Lrulai ka Kiu

¹ Wadrelaku kudra wanene ikai ki taetalane, la ecenge pavanale ku nibalrulane ka hungu; kikai nibalrulane ka hungu laka nipacasane paecebe palraelre, si arakai ku pitu ku hange puhange.

² La dreleanaku ku tangea ku sapukuane ka sasiakawlu belenge, akwadrau pelaela iya kai, “Aneane ku lri sudalepe mwalra kikai hange, si paipai kikai nibalrulane ka hungu?”

³ Ai adravane ka yakai belenge, lebe, si swadriadringi, kadrwa ku natangeanga ku wadulru paipai si silrigu kikai nibalrulane ka hungu.

⁴ La akwadravaku tubi, asi lwiyane kadrwa ku umawmase ku swadalepe paipai si silrigu kikai hungu.

⁵ Ikai ki laciwru la ikai ku tangea ku amia kai nakwane, “Madha tubi! Drela, kavai twalai ki swakai ki zuku ki Yuda ka raiyungu, ka mwabaibalrithi ki Davidi pamalebenga! Kwi lasu lri dulru mwalra ki pitu ka hange; si paipai ki nibalrulane ka hungu.”

⁶ La pacungulaku drele kudra ki taetalane ka ngiathalringulu ki supate ka panianianiake si laciwru, ku Lrulai ka Kiu la ikai acegecege. Kwi Lrulai ka Kiu mia ki nakiapapacainga, yakai ku pitu ku lawngu, laka pitu ku maca, amani kudra pitu ka Ri ki Twaumase, ka kiasikawlu mwalebe sanaka inunga.

⁷ Kwini Lrulai ka Kiu la arwa cucubungu, si patwalai ki vanale kwini ki wanene ikai taetalane malra tarumara kwi nibalrulane ka hungu.

⁸ Sa pia kikai, ku supate ka waudriwdripi si ta 24 ka ciwru la guruthungane icucubungu ki Lrulai ka Kiu. Kwini laciwru la ecenge makanaelre ku patungutungu si nipasueteane ku sangwalreeme pikai ki kingi ka talamalamane; kikai sangwalreeme amani ku inulri ki lasinzia.

⁹ Kwi lalasu la senai ku vaeva ku bavane ka senai: Kathaanesu ka swadalepe tarumara kwini nibalrulane ka hungu, si mucaebe kwi hange belenge; asi lwiyane nakiapapacaingasu! Ngwalai ku tangicacilrianesu tueraerai, patwalaisu ki cacekecekele, ki makaelaela ku vaga, ki laminzuku, ki lakuni, walangaisu sawlri si malra ki umawmase, la baai ki Twaumase.

¹⁰ Wamalrasu naiane paabarakalai ki daane ki talialalai, si pasikaikai kaungu ki Twaumase; kwi lalasu lri ikai kawmasane gemegeme ku puku.

¹¹ La pelanga naku masiasirare; la kilalraku ku tapaangale turamuru ku lingau ki sasiakawlu belenge. Kwi lalasu ngiathalringulu acegecege ikai ki taetalane, si supate ka panianianiake ka waudriwdripi, si laciwru,

¹² la akwadrau senai: Ku kiapapacai ka Lrulai ka Kiu, lri tarumara ku lrekeme ka puku, ku ngiradhekanane, ku lrigilane, ku puku, ku kiwsakenane, ku lrigu, si akidrengedrengerane!

¹³ La peelanga naku kilalra ka belenge, lebe, si panianianiake adringi ki kadaengane, si panianianiake adringi ki laveke, si sanaka panianianiake kai ki kawmasane, wasenasenai makanaelre iya kai: Ku sadrengedrengerane, kiwsakenane, lrigu, si lrekeme, lri papia patuelre ki wanene ikai taetalane si Lrulai ka Kiu, kadrwanga ku apalikaiyane kai kamudunga!

¹⁴ Ku supate ka panianianiake ka waudriwdripi la tubalre iya kai, “Amingi!” Ku ciwru la makitu guruthungane sukusukubu.