Nipadrelane 4 - Ngudradreadrekadhane Ka Sisiu 魯凱語聖經

Tasukubane ki yakai Subelebelenge

¹ La pacuungulu, si tarumaraku kudra vaeva ku maburusi, la drelaku ku ngwaelebane ku lrawlrawdru ka subelebelenge. Kudra nakilalrali mia ki warapapa ku lingau la iyanga kai nakwane, “Bwala mubelenga mwa kai, lri pelaelaku muswane ku lrika angimiane lubibilrili.”

² Ku Siri la makakai sangiluku nakwane. La drelaku ku vaeva ku taetalane ka belenge; la ikai ku tangea ku wanene ikai taetalane.

³ Ku lringauini walikalikathe mia ki pisi si duduli ka pisi. La ngithalringulu ki taetalane ku balrilawlau, ku kulau mia ki hwicwi.

⁴ Ku ngiathalringulu ku lataetale ki taetalane 24, la ibelenge nene ku ta 24 ku laciwru, si silaimai ku lrawlrapungu, la sitalrupunu ku kingi ka pagamucu.

⁵ La lrikace, siange, si dreredrere twalai ki taetalane. Pitu ku nipadaladhane ku taliwlare icucubungu ki taetalane; amani kudra pitu ka Ri ki Twaumase.

⁶ Ikai cucubungu ki taetalane yakai ku mia ki walikalikathe ka lrenege ku bulane ka garase ka laveke. Ku maececebe thili ki taetalane, yakai ku supate ku panianianiake ka waudriwdripi, ku lrilrikudru ku cucubungu swaete ku maca.

⁷ Ku aswalaalanga ku panianianiake ka waudriwdripi mia ki raiyungu; ku mwasakadrusa mia ki lrulai ka lwange; ku mwasakatulru ku tatulringavane mia ki lringau ki umawmase; ku mwasakasupate mia ki takanga.

⁸ Kwini supate ka panianianiake ka waudriwdripi, eneme ku sapakepake lini makanaelre, ku taiadringane ku taibelengane swaete ku maca. Kwi lalasu la pivai pimaungu senasenai kai idrengedrengere iya kai: Sanianiangenga! Sanianiangenga! Sanianiangenga! Tamatama ka sapupukuanenga ka Twaumase, yakai sakanadruma, la ikai kaiasasane, lubibilrili lai lrika palralrawthu ikai!

⁹ Kwi supate ka panianianiake ka waudriwdripi wasenasenai ku lrigu, ku kiwsakenane, ku sakiaseasenane ka senai, patarumaramara ki wanene itaetalane, ka amani kudra palralrawthu panianiake.

¹⁰ Sakamani kwidra, kwi ta 24 ka laciwru, la icucubungu ki wanene ikai ki taetalane si amani kwidra panianiake palralrawthu guruthungane sukusukubu, kwi lalasu la malra kwi pagamucu lini sarare pikai cucubungu ki taetalane, si iya kai:

¹¹ Tamatama nai, Twaumase nai! Swadalepesu tarumara ku lrigu, ku kiwsakenane, si puku ka lrekeme. Wabekacesu sanaka manemanenga; ku takibekacane ki sanaka maneemanenga, ala maka dulru panianiake, singikai ki takidremedremanesu patuelre.