Nipadrelane 22 - Ngudradreadrekadhane Ka Sisiu 魯凱語聖經

¹ Ku sasiakawlu belenge la padrelenga nakwane ku sivale ku vaalru ki niake, ku talikalikathane mia ki walikalikathe ka lrenege, twalai ki taetalane ki Twaumase si Lrulai ka Kiu mwalwaludru,

² la lribate ngukakabicelrakane ki cekele tara kadalranane. Ku maecebe ki vaalru la ikai ku niake ka angatu, kingi 12 pumadru ki caicaili, kingivaale ki dramadramare; ku vasau ki angatu wadulru sulrau pawdringai sanaka kuni.

³ Ikai adringi ki cekele kadrwanga ku pusu ki Twaumase. Ku taetalane ki Twaumase si Lrulai ka Kiu lri ikai adringi ki cekele; ku lasasiakawluini lai lri sukusukubu iniane makanaelre.

⁴ Kwi lalasu lri mwa drele ki Twaumase, ku naganeini lai lri pacase pikai ki punu lini.

⁵ Ikai kwini lri kai ikainga ku dradrimitane; kwi lalasu lai kai murikainga ki ledra ki tinaki si ledra ki vai, asi lwiyane ku Tamatama ka Twaumase amani ku ledra lini. Kwi lalasu lri atalialalai si rathudu, pakeela apalralrawlrawthu.

Ku akelane ki Yesu

⁶ Ku sasiakawlu belenge amia kai nakwane, “Kilakikai vaga tengatengane ka asudralrwalrwane. Kudra amani ka wakandu ki layuginsia ka Tamatama ka Twaumase siakawlu ki sasiakawluini, la pelaela ki lasasiakawluini ku lrika angimiane kai ki kaika atarathainwanenga ka vai.”

⁷ Ku Yesu amia kai, “Drela, lri padaalrunga naku si kela! Kudra paluludu kai tayugingane ki hungu ku umawmase lri kaesai!”

⁸ Kwaku ka Yuhani kialalrangaku si drelengaku kilakikai patuelre. Sadrelenga naku, kilalranga naku, la gurapanganaku icucubungu ki peaelaela nakwane kilakikai ka sasiakawlu belenge sukubu iniane.

⁹ Ai kwi lasu amia kai nakwane, “Madha piapia kikai! Kunaku si kusu, si laretesanesu, kamani kudra layuginsia si palululudu kudra taiyane kai ki hungu, maramaraamau ka sasiakawlu. Sukuba kamani ki Twaumase!”

¹⁰ Kwi lasu la iyana kai nakwane, “Madha caecaebe kikai yugingi ki hungu, asi lwiyane kikai miyaiya kai ku angimiane utaluvaivai lri padaalrunga si kela.

¹¹ Ku manganganga lri tara pacungucunguluana kanganga; ku makudrulru lrika takakudrulrane. Ku paiyaiya ku mathariri lri tara pacungucunguluana pia ku mathariri; ku mabula lai lrika takabulane.”

¹² Ku Yesu amia kai, “Drela, lri padaalrunga naku si kela! Lri ilukaku ku sapakalrevane, singikai ku kakwakudhane ki tangeea baai sanaka aneanenga.

¹³ Amaniaku ku Alepa si Umiga, ka aswalaalanga si abibiilrilinga, ka sapathagili si satwalrepenge.”

¹⁴ Kudra wasinau bula ku laimaini ku umawmase lri kaesai turamuru! Yakai ku kingidri lini kane ku madru ki niake ka angatu, si lai dulru ngukai ki lrawlrawdru mudaane ki cekele.

¹⁵ Ai kwidra la kiaparu tawpungu ku kakwakudhane, twalrisilrisi, wacapange ki sawvalai si ababai, papacai ki umawmase, wasukubu ki samiamiange, ku kaika patengane ku vaga si kakwakudhane, lri asuru ilatadre ki cekele makanaelre.

¹⁶ “Kwaku ka Yesu siakawlaku ki sasiakawluli belenge, ikai ki sanaka kiwkai pelaelaela numiane kilakikai. Amaniaku ku mwabaibalrithi ki tai Davidi; amaniaku ku malealedra ka sapakataleare.”

¹⁷ Ku Siri si kiarakerakete ka ababai amia kai, “Bwala!” Ku kialalra makanaelre la tubalre iya kai, “Bwala!” Bwala! Ku makadhakadhame ku umawmase bwala makanaelre; ku mwarikai, lri dulru vuutha tarumara ku acilai ki niake.

Satwalrepenge ka vaga

¹⁸ Kwaku ka Yuhani twakucingalraku pakipapawlringau kudra lakialalra kikai yugingi ikai ki hungu ku umawmase: Alaiyasi ikai ku umawmase ku yakai kai ki lavaga drima ku manemane, ku Twaumase lri malra kikai pinacasane ikai ki hungu kai amatikurwane si drima baai iniane;

¹⁹ alaiyasi ikai ku umawmase ku patwalai kikai ki tayugingane mwalra kivala ku manemane, ku Twaumase lri mwalra ku naganeini, kwi lasu lai kai maka dulru tarumara kisupilri kikai tapacasane ki hungu kudra ki niake ka angatu si akaesadhane ki Alrivilrivi ka cekele.

²⁰ Kudra amani ku pasiakai kikai patuelre pelaela yai amia kai, “Unu, lri kelanga naku!” Amingi, Tamatama ka Yesu! Bwala kela!

²¹ Ku migemi ki Tamatama ka Yesu ani baai numiane makanaelre! Amingi.