Nipadrelane 21 - Ngudradreadrekadhane Ka Sisiu 魯凱語聖經

Bavane ka subelebelenge bavane ka kadaengane

¹ La pacungulaku drele ku vaeva ka bavane ka subelebelenge bavane ka kadaengane. Kudra siaswalane ka subelebelenge si kadaengane kai adrelanenga, ku laveke la kawlrawnga.

² La dreelenga naku ku Alrivilrivi ka cekele, amani kudra bavane ka Yerusalrime, twalai ki Twaumase, twalai belenge kainganai mulebe, mia ki ngiaragelane ka kiarakerakete ka ababai ka kaiyanganai kidredresenge ki taelrelreini.

³ Kialalraku ku akwadrau ku lingau ku twalai ki taetalane, ku amia kai, “Ku daane ki Twaumase yakainga kawmasane! Lri taelrenga ki umawmase, kwi lalasu lai lri kisumawmasenga iniane. Ku Twaumase lri ngikakamaninga ikai tapalra liniane, lri a Twaumase liniane.

⁴ Lri sakidri pakameale sanaka asese ku lrese lini; kadrwanga ku apacadhane, laka kadrwanga ku adirivane, atubiane, si akwalriane. Ku siaswalane ku manemanenga ngialribatenga patuelre.”

⁵ Sakamani kikai kwidra, kudra wanene ikai ki taetalane amia kikai, “Drela, pakabavanenga naku patuelre!” La iyana kai, “Pacasa, asi lwiyane kilakikai vaga patengatengane ka asudralrwalrwane.”

⁶ Ku Twaumase la iyana kai nakwane, “Malrepengenga! Amaniaku ku Alepa si Umiga, ka sapathagili si satwalrepenge. Lri baadhaku paungulu vuutha ku berai ki niake ki makadhame ka umawmase.

⁷ Ku pamalebe ku umawmase lri dulru tarumara kilakikai, amani kai: Lri a Twaumasaku iniane; kwi lasu lai alalake nakwane.

⁸ Ai, kudra la makiwcu, kai pangiamia, ngialisiane, papacai ki umawmase, wacapange ki sawvalai si ababai, twalrisi, wasukubu ki samiamiange, si watavuvulrucu kawriva, yakai ku apwi si kananu kudaladalai ka baiyu si ukalavalava liniane; amani kwini kudra saka kingipusale pacai.”

Bavane ka Yerusalrime

⁹ Kudra wamalra ku taipitwane ka kisi, si pasuete ku taipitwane ku amatikurwane lubibilrili, ikai kwini ki tapitu ka sasiakawlu belenge, yakai kudra tangea ku kaiyanganai iya kai nakwane, “Bwala, lri padrelaku muswane kai ki kiarakerakete, amani ku taelrelre ki Lrulai ka Kiu.”

¹⁰ Ku Siri la padrekadrekase nakwane; ku sasiakawlu belenge la iluku nakwane pwa ki abeelenge ka lregelrege, ku adrelaneli ku twalai ki Twaumase, twalai belenge kela mulebe ka Alrivilrivi ka cekele ka Yerusalrime.

¹¹ Kwini cekele swaete ku lrigu ki Twaumase, likalikathe mia ki tinukucingalrane ka lrenege, ku bulane mia ki walikalikathe ka lrenege,

¹² yakai ku abeelenge ku kepale ki cekele, la ka 12 ku lrawlrawdru, la ta 12 ku sasiakawlu belenge ku wadrangalrungalru, belenge ki lrawlrawdru pinacasane ku nagane ki tai 12 ka lazuku ki swa Iseraylri.

¹³ Laka talutulrutuulrulu ku lrawlrawdru: Ki tali talrawane tulru, tali sapakalriwgu tulru tali lrawdru tulru, tali dradha tulru.

¹⁴ Ku kepale niraedrane sabelenge ki 12 ka lrenege ka karwalai, belenge ki karwalai wapacase ku nagane ki nisikawlane ki Lrulai ka Kiu ka ta 12.

¹⁵ Kudra kawariva nakwane kudra sasiakawlu belenge waecenge ku vaeva ka kingi ka acepange, lri lekete kwini ki cekele si kwini ki lrawlrawdru si kepale ki cekele.

¹⁶ Ku cekele yai supate ku piyu, ku lragiane si ngulapane mararamau; ku sasiakawlu belenge arakai ku acepange lekete kwini ki cekele: 2,400 ka kunlri, ku lragiane, ngulapane, si abelengane maramaraamau.

¹⁷ Ku sasiakawlu belenge singiakai ku singikaikai ki umawmase ku lekete si lekete ki kepale ki cekele, ku abelengane manemele ka mituru.

¹⁸ Ku kepale ki cekele niarakaiyane ku salesese ka lrenege, ku cekele niarakaiyane ku kakingiane ka mia ki garase,

¹⁹ ku karwalai ki kepale ki cekele nipangiraeragelanane arakai ku makaelaela ku tinukucingalrane ka lrenege: Ku aswalaalanga ku karwalai salesese ka lrenege, ku mwasakadrusa mamatakane ka tinukucingalrane ka lrenege, ku mwasakatulru manau, ku mwasakasupate hwicwi,

²⁰ ku mwasakalrima papacasane ka manau, ku mwasakaeneme duduli ka pisi, ku mwasakapitu ngibwaburavane ka lrenege, ku mwasakavalru salesese ka lrenege, ku mwasakabangate bwaburavane ka pisi, ku mwasakamangeale ngisalesese ka lrenege, ku mwasaka 11 ngithilalatadhane ka lrenege, ku mwasaka 12 thilalatadhane ka sapalrawthu.

²¹ Kudra 12 ka lrawlrawdru amani kwidra tinukucingalrane ka sisilu, ki lrawlrawdru arakai ku vaeva ku sisilu darepe. Ku kadalranane ki cekele niarakaiyane ku kingi, la mia ki garase ku bulane.

²² Ikai ki cekele kainaku wadrele ku yakai ku daane ki Twaumase, asi lwiyane ku Tamatama ka sapupukuanenga ka Twaumase si Lrulai ka Kiu amani ku daane ki Twaumase kikai ki cekele.

²³ Kikai cekele kai mwarikainga ku ledra ki vai si dramare, asi lwiyane yakainga pa ledraledra ku thelare ki Twaumase, ku Lrulai ka Kiu amani ku tinakinga kai ki cekele.

²⁴ Kai kawmasane sanaka kuni lri satalu kai ki ledra dadavace; ku talialalai kai kawmasane lai malra ku ngiradhekanane lini si lri iluku mwa kai ki cekele.

²⁵ Ku lrawlrawdru ki cekele lrika tamuelebanenga awngu, kai lri elebenga palralrawthu, asi lwiyane ikai kwini kadrwanga ku dradrimitane.

²⁶ Sanaka kuni lri malra ku ngiradhekanane ku lrigu si iluku mwa kai ki cekele.

²⁷ Ai, kudra kaika mabula, matialrase ku kakwakudhane si matavuvulrucu lri kai maka mudaane makanaelre; kathane ku kiapacase ku nagane pikai ki niake ki mibu ki Lrulai ka Kiu, ka lri dulru mudaane.