Nipadrelane 20 - Ngudradreadrekadhane Ka Sisiu 魯凱語聖經

Kudrulu ka Caili

¹ Ala, drelaku ku tangea ku sasiakawlu belenge ku twalai belenge mulebe, ku alrimaini waecenge ku sawsi ki valrulrange si vaeva ka kaludralri ka kicikici.

² Kwi lasu waruthuku kwini ki baralebale, kaamani kudra sidrumanane ka sulrau, ka Akema, la si Satange, wakerenge iniane patara kudrulu ka caili.

³ Ku sasiakawlu belenge wamalra iniane si verevere pwadringi ki valrulrange, la elebe, si puhange sawsi, kwi baralebale la kai maka katwasenga pamama sanaka kuni, pakela ku sa tarakudrulunga ka caili. Ku takipalikaiyane sangilribatenga, kwi baralebale lri kitupadawdalrwana kimuelebe.

⁴ La dreelenga naku ku lataetalane; kwini lawanene ikai belenge ku umawmase la malra makanaelre ku kingidri ki asaibangane. La mialria ku drele ku abake kudra ki la ngwalai ku tatarumarane ku padrele ki Yesu ku patengane ka sabulrwane si vaga ki Twaumase si kipapacai ka laumawmase. Kwi lalasu kaiyana wasukubu kwini ki waudriwdripi si tinuwaudriwdripane ka samiamiange, ku punu si alrima la kakadrwa ku nagane kwini ki waudriwdripi. Kwi lalasu la makitu sielanenga panianiake, si taelre ki Kirisitu atalialalai tarakudrulu ka caili.

⁵ (Kudra drumane ku wapacai ku umawmase lri ukalava kai ki tinarakudrulane ka caili, lu ngilribatenga lai lri siela panianiake.) Kikai yai aswalaalanga ku asielane panianiake.

⁶ Kudra la yakai ki aswalaalanga sielane panianiake ku umawmase yai mabula ka lri kaesai! Ku saka kingipusale pacai kadrwa ku kingidri ruthuku liniane; kwi lalasu lri abarakalai ki Twaumase si Kirisitu, lri taelre ki Kirisitu atalialalai tara kudrulu ka caili.

Pamalebe ki Satange

⁷ Lu tarakudrulunga ka caili, ku Satange lri kimuelebe twalai ki takiemengane;

⁸ kwi lasu lai lri katwase pamama ki ngiathalringulu sanaka kuninga, amani ku swa Guge si swa Maguge. Ku Satange lri alra sarubu si apaelre liniane, la pakatwase pakikaruburu; ku umawmase lini lri mia ki babiabila ki laveke ka enai ku kalrane.

⁹ Kwini lalasu lri salraelre kawmasane, lai lri lringulu ku tasuladhane ki kawkawlu ki Twaumase si kudra ki kadalameini ka cekele; ai yakai ku apwi ku twalai belenge mulebe, si amudu liniane.

¹⁰ Kudra pamamama liniane ku Akema lri kiverevere pwa ki apwi ka kananu ka baiyu; kwini waudriwdripi si kaika patengane ka yuginsia lri ikainga kwini. Ikai kwini, kwi lalasu lri pivaiyanenga pimaungu kipakwalrialri, kadrwanga ku aisadrane palralrawthu.

Bibiilrilinga ka akisaibangane

¹¹ Pacungulu, wadreelaku ku lrawlrapungu ku maadrau ka taetalane si kwini ki wanene. Kai belenge si lebe twalai cucubungu iniane ubere, si kai adrelanenga.

¹² La dreelenga naku kudra ki wapacainga ka umawmase, adravane ka tabebelenge ka talelebe, acegecege makanaelre icucubungu ki taetalane. Ku sakukuswane ka pacase ka nibalrulane la mubalrulunga si paipai; ku taingeane laka vaeva ka niake ka mibu mialri paipainga. Ku wapacainga ku umawmase lri singikai ki kakwakudhane lini, si patwalai kilakikai sakukuswane ka pacase ka nibalrulane ku tapacasane, si kisaibange.

¹³ Ala, ku laveke pwataluvaivai baai kudra wapacai ku umawmase; ku apacadhane si swa swadriadringi la mialri putaluvaivai si baai ku ruthuku lini ku wapacai ku umawmase. Kilakikai umawmase lri singikai ku kakwakudhane lini kisaibange.

¹⁴ Ku apacadhane si swadriadringi la mialri kiverevere pwadringi ki apwi ka baiyu. (Kikai apwi ka baiyu amani ku saka kingipusale pacai.)

¹⁵ Sanaka kai kiapacase ku nagane pikai ki niake ka mibu, lri makitu kiverevere makanaelre pwadringi ki apwi ka baiyu.