Nipadrelane 2 - Ngudradreadrekadhane Ka Sisiu 魯凱語聖經

Tigami baai ki swa Ipisu kiwkai

¹ “Kusu tigamia si baai ki sasiakawlu belenge ki Ipisu ka kiwkai, iya kai: “Kudra amani ku waecenge pavanale ku pitu ka tariau, si ikai kabicelrakane ki pitu ka kingi ka tatinakiane dadadavace, amia kai kawriva:

² Wathingalaku patuelre muswane; ku tangimianesu kisamula kaungu, tapangimianesu kiadili; la thingalaku muswane ka kai maka tarwamara ki manganga ki umawmase, ka nakialrialringau kudra ki la ngiatatu nisikawlane ai kaika nisikawlane ku umawmase, si thingale liniane ala ka kaika patengatengane.

³ Sakiadilanesu, ka napasiakai nakwane si adravane kipadradresenge ku sapapacai, la kai mubere.

⁴ Ai, yakai kwi taingeane kwi akaelaelaneli muswane: Amani kwini waulrawngasu ku nasakialibakesu nakwane sakapathagilane.

⁵ Ala kidremedrema, wadarurungasu ki manemane kwi taturamuranesu! Ngitatupela, si siwlriwlri ku napathagilane ku sakialibake ku kakwakudhane. Alaiyasi kaisu ngitatupela, lri kelaku, si malra iluku patwalai ki taikaiyane kwini tatinakiane.

⁶ Ai, yakai ku taingeane ku takathariranesu: Amani kwini mararaamausu nakwane kavalracevace ku kakwakudhane ki swa talikaikai ki Nikula.

⁷ “Ku taiyane ki Siri kawriva papia ki lakiwkai, ku yakai ku calringa si dulru kilalra, makitu kilalra makanaelre. “Kudra pamalebe ku umawmase, lri baadhaku iniane ku kingidri, lri dulru kane kudra madru ki niake ka angatu ka yababengelradhane ki Twaumase.”

Tigami baai ki Semirena kiwkai

⁸ “Kusu tigamia si baai ki sasiakawlu belenge ki Semirena ka kiwkai, iya kai: “Kudra amani ku sapathagili si satwalrepenge, wapacai si la siela panianiake, amia kai kawriva:

⁹ Wathingalaku ku takwalrianesu si matikurwane; ai ku patengatengane kusu maesaesaesaisu! Wathingalaku ka kiatulilisisu ki swa Yuda nai amiamia ka umawmase, ku patengatengane kwi lalasu kaika swa Yuda ka umawmase, amani ku twapapapalra ki Satange!

¹⁰ Madha ukulukuludru ku lrika akipadradresenganesu ku akwalriane. Drela! Lri kilrialringau numiane kwi Akema, lai malra patwalai numiane ku tapiya ku umawmase si pwadringi ki takiememengane; lri kipakwalri numi ku minaka mangealane. Kapatengatengana kwi kidremedremesu pakela ki wapacai, la nau baai muswane ku civare ki niake.

¹¹ “Ku taiyane ki Siri kawriva papia ki lakiwkai, ku yakai ku calringa si dulru kilalra, makitu kilalra makanaelre. “Kudra pamalebe ku umawmase, lri kai kimwanga kikabebetethe ku saka kingipusale ku apacadhane.”

Tigami baai ki Peregamu kiwkai

¹² “Kusu tigamia si baai ki sasiakawlu belenge ki Peregamu kiwkai, iya kai: “Kudra piakai ku maecebe ka taadremane ka marangisi ka dramu, amia kai kawriva:

¹³ Wathingalaku kwi taikaiyanesu amani ku tagemegemane atalialalai ki Satange. Tengatengane kwi kidremedremesu papia nakwane, adravane kipapacai ku taraakasikasi nakwane ka Anetipase ikai ki taikaiyane ki Satange, kaisu wacilri ku salrwanesu papia nakwane.

¹⁴ Ai, yakai kwini akaelaelaneli muswane: Ikai numiane yakai ku twapapapalra ku sabulrwane ki Balame; kai Balame walrilrigili ki Balake, si papasalriu ki swa Iseraylri, kane ku nipatarumaranenga ki samiamiange ku akaneane, la pasalriu ki ababai si sawvalai.

¹⁵ Laka thadaalrane, ikai numiane yakai kwi twapapalra ku sabulrwane ki swakai kai ki Nikula.

¹⁶ Lakamani, kusu ngitatupela, lu kaisu ngitatupela, lri makakaiyaku kela, si arakai kai yakai ki nguduili kai dramu si kikaruburu kai ki laumawmase.

¹⁷ “Ku taiyane ki Siri kawriva papia ki lakiwkai, ku yakai ku calringa si dulru kilalra, makitu kilalra makanaelre. “Kudra pamalebe ku umawmase, lri baadhaku kudra niseketane ka mana. Lai lri baadhaku iniane ku vaeva ka lrawlrapungu ka lrenege, pinacasane belenge ku bavane ka nagane; kikai nagane, kathane kudra tarwamara ku umawmase, ku drumane ku umawmase kadrwa ku wathingale.”

Tigami baai ki Tiatira kiwkai

¹⁸ “Kusu tigamia si baai ki sasiakawlu belenge ki Tiatira kiwkai, iya kai: “Lalake ki Twaumase, ka amani kudra mia ki wakelrakelrakelrabe ka apwi ku maca, ku drapale mia ki niurathane ka lriwlu ku ledrane, amia kai kawriva:

¹⁹ Wathingalaku muswane patuelre; wathingalaku ku sakialibakesu, ku salrwanesu, ku sapasikaikaisu, si sakiadiadilisu. Wathingalaku kaiasasane kai piapiasu makaakalra ki siaswalane.

²⁰ Ai, yakai kwi taingeane kwi akaelaelaneli muswane: Tarwamarasu kudra ki ngiatatu yuginsia ka ababai ka Yezebile. Kwi alisu waililuku ki sasiakawluli si sudringadringai, la kane ku nipatarumaranenga ki samiamiange ku akaneane.

²¹ Nawabaainga naku ku zikange iniane pangitatupela, ai kwi alisu kai maka yasadra kwi apairairangeini.

²² Drela, lri pakacaemaku iniane si lri tubakebake itapeapecane; kudra lapasalriu iniane ku umawmase, sana kai ngitatupela kwi lalasu, si kai pasalriwnga iniane, lri pakarededelaku iniane pakwalri ku maadrau.

²³ Lai lri papacadhaku ku twapapapalra iniane ku umawmase, ku la swa kiwkai lai lri thingale, ala ka wadrelaku pakela ki kidremedreme si tagathimane ki umawmase. Lri singikaiyaku ku tapiane ki tangeea, si bilri numiane ka tangeea.

²⁴ “Ai, kunumi ka tedrane ka kai twapapalra ku taiyane ku ngialisiane ka vaga ikai Tiatira ka umawmase, si kai kibulru kudra sabulrwane ki Satange. Nau pelaela numiane, lri kainaku drimanga baai numiane ku druma ku matelrege ka amece.

²⁵ Ai, kunumi pangimia kudra paka ikainga numi, pakela ku takelaneli.

^26-28 Kudra pamalebe, la dulru pacuungulu paluludu ku drekaseli ku umawmase pakela ki abibiilrilinga, lri baadhaku iniane ku lrekeme, mararamau ku baai nakwane ki Ama; lri baadhaku iniane ku lrekeme lai rathudu sanaka kuni, lri arakai ku adreme ka ukudru rathudu liniane, mia lu cwake ki dilrungu pakatatuthiri liniane. Lai lri baadhaku ku sapakataleare ka tariau ki pamalebe ka umawmase.

²⁹ “Ku taiyane ki Siri kawriva papia ki lakiwkai, ku yakai ku calringa si dulru kilalra, makitu kilalra makanaelre.”