Nipadrelane 19 - Ngudradreadrekadhane Ka Sisiu 魯凱語聖經

¹ Kikai sangilribatenga, kialalraku ku akwadrau ku lingau, miakau la wariariariange ka yabelenge iya kai, “Haliluya, tadrengedrengere ki Twaumase! Ku sapalribulane, ku lrigu, ku lrekeme patuelre twalai ki Twaumase kainganai!

² Ku sasaibanganeini patengatengane ka madringelrese! Asi lwiyane wasaibangenga kwidra ki arakai ku takapairairanganeini si pangilisilisiane kawmasane ka ababai, si pathavungu ku pasalrivaneini ku tapapacadhane ki sasiakawlu ki Twaumase.”

³ Kwi lalasu la peelanga riariange iya kai, “Haliluya, tadrengedrengere ki Twaumase! Kudra ebelre ki walamalama ki maadrau ka cekele papwabebebelenge kai kareteretege, lri kapalralrawthunga kai idrengere!”

⁴ Ala kudra, ta 24 ku ciwru si supate ka panianianiake ka waudriwdripi la gurapangane sukusukubu ki wanene ikai taetalane ka Twaumase, si iya kai, “Amingi! Haliluya!”

Ku Lrulai ka Kiu ngiakanekaneane rakerakete

⁵ Pacuungulu, la ikai ku lingau ku twalai ki taetalane, ku amia kai, “Sanaka sasiakawlu ki Twaumase, ka mwasakene ukuludru ki Twaumase, adravane ka tabebelenge ka talelebe, makitu drengedrengera makanaelre ki Twaumaseta!”

⁶ La kilaalra naku ku mia ki twalai ki laumawmase ku lingau, ku elrange mia ki maadrau ka tuturu si dreredrere, iya kai, “Haliluya! Asi lwiyane ku Tamatamata ka sapupukuanenga ka Twaumase atalialalainga!

⁷ Ta magaguruguru kiraragai, drengedrengere ku abelenganeini! Asi lwiyane ku vai ku araketane ki Lrulai ka Kiu wakelanga; ku siasilanganeini maka padulruunga.

⁸ Ku Twaumase wabaainga ki alisu ku lrawlrapungu si likaliikathe ku lalasare ka kaimadhane ka laimai.” (Kwi lalasare ka kaimadhane amani ki dringelresane ku tangivelevelane ki umawmase ki Twaumase.)

⁹ Ku sasiakawlu belenge ala iya kai nakwane, “Kusu pacasa: Ku kia kidrele kidawlu ku akipaelreane ku akarudrangane ki Lrulai ka Kiu ku umawmase lri kaesai.” Kwi sasiakawlu belenge la iyana kai, “Kikai vaga ki Twaumase patengatengane patuelre.”

¹⁰ La pidruraku icucubungu ki drapaleini, kisanu sukubu iniane, ai kwi lasu amia kai nakwane: “Madha piapia kikai! Kunaku si kusu, si ladrumane ka sinzia, sanaka palakelakebe ku padreele ki Yesu ku patengatengane ka sabulrwane, maramaraamau ka sasiakawlu. Kusu lri tara sukubusu ki Twaumase.” Asi lwiyane ku padrele ki Yesu ku patengane ka sabulrwane amani kudra wakandu ki layuginsia ka patengane ka sabulrwane.

Ngwarigi ki lrawlrapungu ka rigi ka umawmase

¹¹ Sakabilrilanenga, wadrelaku ngwaelebane ka subelebelenge. Drela, ka vaeva ka lrawlrapungu ka rigi, kavai ngwarigirigi amani kudra kiapasi “Patengatengane” si “Asudralrwalrwane”; siatangadrane ki dringelresane kainganai saibange si kikaruburu.

¹² Ku macaini mia ki apwi kelrakelrabe, la salikakalra sipagamucu. La pacase ikai ki kinawmasaneini ku nagane, ai kathaneini, kadrwa ku umawmase ku wathingale ka manemane ku pacugane.

¹³ Ku silaimaini swaete ku erai. Ku naganeini kiapasi “Vaga ki Twaumase.”

¹⁴ Ku kwapingi ki swa subelebelenge ngwarigirigi ki lrawlrapungu ka rigi, si silaimai ku lrawlrapungu kabuula ka lalasare ka kaimadhane ka laimai, tupapapalra iniane.

¹⁵ Twalai ki ngudwini putaluvaivai ku vaeva ku marangisi ka dramu; kwi lasu lri arakai kikai dramu pamalebe ki lakuni. Kwini lasu lri arakai ku adreme ka ukudru rathudu liniane, si lai lri pe ku makecenge ka bava ikai ki tapepeane ka elathane ka bava ki sapupukuanenga ka Twaumase.

¹⁶ Ikai ki laimaini si drapaleini wapacase ku nagane iya kai, “Talialalai ki sanaka talialalai, Tamatama ki sanaka tamatama.”

¹⁷ La dreelenga naku ku tangea ku yakai adringi ki vai acegecege ku sasiakawlu belenge. Kwi lasu la akwadrau tawtau papia belenge ki laadhadhame patuelre iya kai, “Bwala, takarededele kipaelre kai pangiakaneane ki Twaumase!

¹⁸ Kela kane ki beate ki talialalai, ki tamatama ki kwapingi, la kane ku beate ki rigi si ngwarigi, la kane ku beate ki duri, si ngialralrailraingi ka umawmase, si tabebelenge si talelebe ku makaelaela ka umawmase!”

¹⁹ La dreelenga naku kwini ki waudriwdripi si latalialalai kawmasane, si lakwapingi lini yasarubu yelrelre, si makakaruburu kwini ki ngwarigirigi ku lrawlrapungu ka rigi si lakwapingini.

²⁰ Kwini waudriwdripi la kiravase; kudra kaika patengane ka yuginsia ka nayakai cucubungu iniane pia ku matiasamaimali ku tapiane la mialri kipakarededele kiravase. (Kikai kaika patengane ka yuginsia napaiya ku matisamaimali ku tapiane si lrilrigili kudra ki lanipatuthingalane arakai ku waudriwdripi si wasukubu ki tinuwaudriwdripane ka umawmase.) Kwini waudriwdripi si kaika patengane ka yuginsia kia pataka papanianianiake kicilri pwa kwini ki kwadaladalai ki kananu ka apwi ka baiyu.

²¹ Kudra kwapingi lini kiapapacai demedeme ki twalai ki ngudui ki ngwarigirigi ku lrawlrapungu ka rigi utaluvaivai ka lrabu; sanaka adhadhame la kainganai ngipalai, si kane eleme ku beate lini.