Nipadrelane 18 - Ngudradreadrekadhane Ka Sisiu 魯凱語聖經

Takamudane ki swa Babilunia

¹ Kudra sakabilrilinga, wadreelaku ku tangea ku sasiakawlu belenge ku twalai belenge mulebe. Kwi lasu wagemegeme ku maadrau ku puku; ku thelareini paledra kawmasane.

² Kwi lasu la akwadrau tawtau iya kai, “Maburukunga! Maadrau ka Babilunia maburukunga! Kai alisu amaninga ku taikaikaiyane ki Akema, ka libi ki aidridringane, ka lisisuku ki latakukudrulru matilrase ka adhadhame.

³ Asi lwiyane sanaka kuni waungulunga makanaelre kikai makecenge ka bava ki pairairange ka ababai, kai latalialalai kawmasane napaswadringainga iniane, kai tarasiwbawbai kawmasane twalai ki takapairairanganeini si samanemanane.”

⁴ La kilalraku ku taingeane ka lingau ku twalai belenge ku amia kai: Ulatadra, ka laumawmaseli! Twaladha kwini ki cekele si kainganai ulatadre! Amani lu kisacepe numi kilrinini kwi pasalrisalriuini, si kivala ku amatikurwaneini!

⁵ Asi lwiyane ku pasalrivaneini maabatenga darurunga ka belenge, ku Twaumase pwalringalringau ku ngilisianane ki kakwakudhaneini.

⁶ Kwi alisu ku tapangimiane numiane, lri kitungimiyaiya, lri singikai ku tapianeini si drima bilri iniane. Ku tapiane apaibibu ku bava si baai numiane, lri arukidrima ka parawramuru ku makecenge ka bava si gugu pasuete ki kupuini!

⁷ Ku taparamuraneini pasawlra, si ngilralrigulrigu, lri kitungimiyaiya pakwalri iniane, si lai pakwalri iniane turamuru. Asi lwiyane kwi alisu kai watelrai ngikakamani iya kai: Waneneaku ikai ki taetalane ka taelrelre ki talialalai, kainaku ka walibakane, kadrwa ku atubianeli!

⁸ Amani sakamiyaiya kikai, ikai ki vaivaai, ku amatikurwane lri mulebe mwa iniane: Yakai ku atubiane, ku silravane, ku apacadhane! Kwi alisu lri ikai ki apwi si kilamalama, asi lwiyane ku amani ka wasaibange ka Tamatama ka Twaumase maadrau ku puku!

⁹ Kudra twapapapalra iniane si ngilralrailraingi kangangaanga kikai latalialalai kawmasane sadrele kwini ki walamalama iniane kudra ebelre maraleale tubi iniane.

¹⁰ Kwi lalasu makiwcu drele iniane lu kwalrialri, la yadaaili acegecege, si iya kai, “Kikai maadrau ka cekele, matiangeange! Matiangeange! Matisawsalru ka Babilunia! Kaiyana ngwavaeva ki zikange, la kipathavuthavungungasu!”

¹¹ Kai tarasiwbawbai kawmasane la mialri tubi turamuru iniane, asi lwiyane kadrwanga ku umawmase ku lri kela langai ku siwbai lini.

¹² Kadrwanga ku umawmase ku lri langai ku kingi lini, si gingi, tinukucingalrane ka lrenege, si tinukucingalrane ka sisilu; lai lrika kadrwanga ku lri langai ku lalasare ka kaimadhane lini si lapaivavalri, la tinukucingalrane ka thilalatadhane si duduli ka makalrilau, si makaelaela ka sangwalreeme ka angatu, ka makaelaela ku tatulawbubulane ka valisi ki zu, ka latakuciacingalre ka angatu ka lawbubulu, si lriwlu, si adreme, si lrenege ka lawbubulu;

¹³ lai lri ka kadrwanga ku lri langai ku karankange, sangwalreeme ka lawlau, sapasangulrelremane, sangwalreeme ka acilai, lawlau, bava, abera, milrikinku, mugi, lwange, kiu, rigi, palridingi, duri, laumawmase.

¹⁴ Kilakikai tarasiwbawbai amia kai iniane, “Kudra kararausu kudra makaelaela ku tathaithariri ka lawbubulu kai adrelanenga; kudra namatidrareangane ku ngiradhekanane maulrawnga, lai kaika amaka asilapanenga pasiwlriwlri!”

¹⁵ Kudra tarasiwbawbai ku yakai kwini ki cekele, si satacekecekelanenga, ngwakai ku kiwcane drele lu kwalrialri kwini alisu, la sadaaili acegecege.

¹⁶ Kwi lalasu la tubi turamuru, si iya kai, “Kikai maadrau ka cekele! Matiangeange! Matiangeange! Kwi alisu natasilaimadhane ku lalasare ka kaimadhane, ku tinukucingalrane ka thilalatadhane si duduli ka laimai, lakingi, si tinukucingalrane ka lrenege, si sisilu ku tinukucingalrane tusangiragelanane!

¹⁷ La kai darurwana ki vaeva ka zikange, kikai lawbubulu patuelre maulrawnga!” Ku kiacapili ki varukuru, si ngwakaikai ki varukuru, si taramarasikaikai ki varukuru makanaelre, si kudra satalutalu cekecekele ki laveke ku umawmase yadaaili acegecege.

¹⁸ Kwi lalasu sadrele ku ebelre ku walamalama liniane, maraleale iya kai, “Yainu ku cekele ku lri kiramau kai ki maadrau ka cekele!”

¹⁹ Kwi lalasu wamalra ku abu si sabulu pwa ki awlru lini, la tubi iya kai, “Kikai maadrau ka cekele! Matiangeange! Matiangeange! Sanaka yakai ku varukuru katwatwase ngukakai ki laveke satalu iniane ngiradhekane! La kai darurwana ki vaeva ka zikange, ku manemaneini patuelre maulrawnga!”

²⁰ Swa subelebelenge, kiraragadha! Asi lwiyane kwi alisu mamudunga! Ku laumawmase ki Twaumase, lanisikawlane, si layuginsia, kiraragadha! Asi lwiyane ku Twaumase pusakainga numiane, pathavungunga iniane!

²¹ Pacuungulu, la ikai ku tangea ku ngiacaeme ku tacebeane ka sasiakawlu belenge ku wacidingi ku vaeva ku mia ki tapasilribulribwane ka lrenege ku adravane ka lrenege, si cilri pwa ki laveke, la iya kai, “Kikai maadrau ka cekele ka Babilunia lrika miyaiya kikai kiverevere ki pwadringi, si lri kapalralrawthu kai adrelanenga.

²² Kaisu lri maka peelanga kilalra ku lingau ki tarapatungutungutungu si lingau ki tarangibulalrilalri. Lai kai maka kidringainga kudra makaelaela ku lasialrima; lai kai maka kilalranga ku lingau ki pasialribulribu!

²³ Ku tinaki kai lri maka ledranga; lai kai akilalranenga ku tamatatetetengeane ki tawkarudrarudrange. Ku muswane ka tarathathathakai ka umawmase kamani ku sapupukuanenga kawmasane makanaelre; kai kawmasane kai umawmase la mialri kilrilrigili pamama!”

²⁴ Ku swa Babilunia kiapathavungunga, asi lwiyane ikai kai ki cekele kiadringai ku erai ki yuginsia si umawmase ki Twaumase; unu, ku erai ki kiapapacai sanaka umawmase ikai kai kawmasane kiadringai patuelre ikai kai ki cekele.