Nipadrelane 17 - Ngudradreadrekadhane Ka Sisiu 魯凱語聖經

Kiamathingathingale ka Pairairange

¹ Ikai kwini ki tapitu ka wamalraku pitu ka kisi ka sasiakawlu belenge, yakai ku tangea ku kaiyanganai si iya kai nakwane, “Bwala, lri padrelaku muswane ku lrika akipathavungane kai ki pairairange; kwi alisu amani kudra twacekele ku maadrau ka cekele pikai ki babiabila ki kadravane.

² Kai kawmasane kai latalialalai makanaelre pasalriwnga kwini ki alisu; kai kawmasane kai umawmase la ungulunga makanaelre si kabusuku ku apairairairangeini ka bava.”

³ Kiavelevelaku ki Siri, ku sasiakawlu belenge la malra ililuku nakwane pwa ubulane. La drelaku ku tangea ku ababai ku ngwarigirigi ki vaeva ka duduli ka waudriwdripi; kwini kinawmasane ki waudriwdripi la suete ku pinacasane ku satudreadreadrekasane ka lanagane, la tupitu ku awlru si mangeale ku lawngu.

⁴ Kwini ababai sialaimai ku thilalatadhane ka duduli ka laimai, si pasuete ku sangiragelanane ku kingi, tinukucingalrane ka lrenege, si sisilu. Ku alrimaini la ecenge ku kupu ka kingi, ki kupu paswaete ku apairairairangeini ka lamatialrase kakudrulru.

⁵ Ki punuini la pacase ku nipaidringane ka nagane iya kai, “Maadrau ka Babilunia ka tina ki pairairange kai kawmasane si sanaka matialrase ka lamanemane!”

⁶ La dreeleana naku kwini ki ababai ungungulu kabusuku ku erai ki umawmase ki Twaumase, si kudra erai ki la pasiakai ki Yesu pelaela si kipapacai. Sadrelaku iniane masamaliaku turamuru.

⁷ Ku sasiakawlu belenge la kivaga nakwane iya kai: “Asu kasamali? Kavai ki ababai si kavai ngurigirigini ka pitu ka awlru mangeale ka lawngu ka waudriwdripi ku kaika kithingaleini lri pelaelaku muswane.

⁸ Wadrelesu kavai waudriwdripi napanianianiake, kikainga kai lri pelanga panianiake, lri kai tarathainunga si lai lri twalai ki valrulrange tamau, si lri katwase papia ki akamudane. Ku sanaka umawmase kai kawmasane, sakaiyana bekace kai kawmasane kudra nagane la kai kipacase pikai ki niake ka mibu, sana drele kwidra ki napanianianiake, kaiasasane la kai lri panianiakenga, lubibilrili la lri utaluvaivai tupela ka waudriwdripi, lri kasamali makanaelre.

⁹ “Kikai yai mwarikaikai ku malrigili. Ku pitu ka awlru amani kudra ki taneneane ki ababai ka pitu ka lregelrege, la mialri ka amani ki pitu ka talialalai.

¹⁰ Ikai kwini talrimanga ku mwakadrulu, la ikaiyana ku tangea; la kaiyana kainganai ku tangea, lu kainganai lri padalru isadra.

¹¹ Kudra napanianiake, kikainga lai kai lri pelanga panianiake ka waudriwdripi, amani kudra mwasakavalru ka talialalai; kwi lasu laka mialri ikai kwini ki tapitu ka talialalai, ka yacengecenge katwatwase papia ki akamudane.

¹² “Kudra drelesu ku mangeale ka lawngu amani kudra ki kaiyana pathagili rathudu ka talialalai; ai kwi lalasu lri tarumara ku puku ki talialalai, si taelre ki waudriwdripi rathudu nguvaeva ki zikange.

¹³ Kai tamangeale ka talialalai maramaramau ku kidremedreme: Kwi lalasu lri malra ku lrekeme lini si baai kwini ki waudriwdripi.

¹⁴ Kwi lalasu lri makakaruburu ki Lrulai ka Kiu; ai kwi Lrulai ka Kiu pamalebe liniane, asi lwiyane kwi lasu amani ku Tamatama ki sanaka tamatama, Talialalai ki sanaka talialalai. Kudra pilrini, si savaeva ku kidremedreme tupapalra iniane ku umawmase lai lri mialri pamalebe.”

¹⁵ Ku sasiakawlu belenge la iyana kai nakwane, “Kwini drelesu ki pairairange ka neneini ki mwalrawlrawdru ka acilai amani ki laminzuku, lazuku, lakuni, si makaelaela ku vaga ka umawmase.

¹⁶ Kudra drelesu ku mangeale ka lawngu si kudra waudriwdripi lri kavalracevace kwini ki pairairange, lri ravase ku lamanemaneini patuelre, lai lrika mulaimaimainga kwini alisu; kwi lawaudriwdripi lri lama ku beateini, si arakai ku apwi lama iniane.

¹⁷ Asi lwiyane ku apiane ki Twaumase ku takidremedremaneini lri pikai kwini ki kidremedreme ki tamangeale ka talialalai, lai lri maramaraamau ku takidremedremane lini, ku sarathudane ku puku lini lri baai kwini ki waudriwdripi, pakela ku angimiane ku vaga ki Twaumase.”

¹⁸ “Kwini drelesu kwini ababai amani kudra warathudu ki latalialalai kawmasane ka maadrau ka cekele.”