Nipadrelane 16 - Ngudradreadrekadhane Ka Sisiu 魯凱語聖經

Yakisiane ka sakaelaelane ki Twaumase

¹ Kialalraku ku lingau ku akwadrau twalai ki daane ki Twaumase si papia ki tapitu ka sasiakawlu belenge iya kai, “Kunumi lu mwa, la malra kwini akupitu ki kisi kwi elathane ki Twaumase si gugu pwa kawmasane!”

² Ku aswalaalanga ka sasiakawlu belenge la mwa, si malra kwini yakai iniane kwi kisi si gugu pikai kawmasane; ala kirimu ikai ki kinawmasane cebe kapapu pakilringau kudra ki lapinuhangeane ka waudriwdripi ka samiamiange si la wasukubunga ki nituwaudriwdripane ka samiamiange.

³ Ku mwasakadrusa ka sasiakawlu belenge la malra kwini kisini si gugu pwa ki laveke; ku laveke la akabalrithi mia ki erai ki wapacai, ku panianianiake ikai adringi ki laveke la pacai patuelre.

⁴ Ku mwasakatulru ka sasiakawlu belenge la malra kwini kisi si gugu pwa ki vaalru si tacebeane ki acilai, ku acilai la aerai.

⁵ Kialalraku kwidra taramarasikaikai ki acilai ka sasiakawlu belenge amia kai, “Sanianiangenga kunadruma si kaiasasane! Amanisu ku madringelrese ka tarasaibaibange.

⁶ Kwi lalasu napamwaludrunga ku erai ki umawmase ki Twaumase si layuginsia, kaiasasane la baingasu paungulu liniane ku erai; kikai yai akicugane lini kibilri!”

⁷ La kilalra naku ku twalai ki tapatarumaramarane ku lingau ku amia kai, “Tamatama ka sapupukuanenga ka Twaumase! Ku tasaibanganesu tengatengaane ka madringelrese!”

⁸ Ku mwasakasupate ka sasiakawlu belenge la malra kwini kisi si gugu pwa ki vai, kwi vai la dulru arakai ku dralrangedranganeini lama culu ki umawmase.

⁹ Ku umawmase lu kulama ki culwane ki dralrangedrangane, lai lri tudreadrekase ki Twaumase ka wadulru ngisasingikai kelrete ki la amatikurwane. Kwi lalasu sakamiya kai ngitatupela, kai mwabangalre drengedrengere lrigu ki Twaumase.

¹⁰ Ku mwasakalrima ka sasiakawlu belenge la malra kwini kisi si gugu pikai ki taetalane ki talialalai ki waudriwdripi. Ku dradrimitane la kirimu kabungu ki kuni ki waudriwdripi, ku umawmase la ngwalai ki takiangeangane takipakwalriane si ngikakacenga ku lridame lini.

¹¹ Kwi lalasu ngwalai ki sakwalrialri lini si takapuane la tudreadreadrekase ki yabelenge ka Twaumase, laka sakamia kai katwase kidaili si cilri ku ngilisianane ku kakwakudhane lini.

¹² Ku mwasakaeneme ka sasiakawlu belenge la malra kwini kisi si gugu pikai kadravane Yuparati, ku kadravane la kameale, pakai ku atukadalranane padulru kudra ki lalri twalai tali talrawane kela ka talialalai.

¹³ Pacuungulu, la drelaku ku tulru ku ngialisiane ka ri, mia ki iyau, ka la twalai ngibwale ki ngudui ki baralebale, waudriwdripi, si kaika patengane ka yuginsia.

¹⁴ Kwi lalasu amani kudra ri ki Akema, wadulru pia ku matiasamaimali. Kilakikai ngialisiane ka ri matwase silape ki talialalai kai kawmasane, si malra sarubu pataelre liniane, si padulrudulru ku akikaruburane ikai kudra ki maadrau ka vai ki sapupukuanenga ka Twaumase.

¹⁵ Ku Tamatama amia kai, “Kiraraketa! Lri miaku ki tarakupawpa pangitutuluku kela! Kudra masimeameace, si ka tasilaimadhane ku umawmase lri kaesai! Asi lwiyane kwi lasu lri kai vilralrakane katwase dadavace, si kiarubwane icucubungu ki umawmase!”

¹⁶ Kwini ngialisiane ka ri la malra sarubu ki latalialalai kikai ki taingeane ka kadaengane; kwini kadaengane lu arakaiyane ku vaga ki swa Hiburu sia Aremagidune.

¹⁷ Ku mwasakapitu ka sasiakawlu belenge la malra kwini kisi si gugu pikai belenge. La ikai ku akwadrau ka lingau ku twalai ki daane ki Twaumase ka taetalane ki Twaumase, iya kai, “Malrepengenga!”

¹⁸ Ala kirimu ikai ku lrikace, elrange, dreredrere, si matiukukuludru ka lingilingi. Ku taikaiyane ki umawmase kai kawmasane, kadrwana ku miyaiya kai ku pakilringavane ku lingilingi!

¹⁹ Kudra maadrau ka Babilunia la aegacane mautulru; ku cekele ki lakuni la kaburuku mulebe patuelre. Ku Twaumase pwalringalringau ku pasalrivane ki maadrau ka cekele Babilunia, la paungulu iniane ku puku ki Twaumase ka swaete ku elathane ka makecenge ka bava.

²⁰ Ku lavuvugu ikai ki laveke kai adrelanenga patuelre; ku lalregelrege la kawlrau patuelre.

²¹ Ku latadradrau ka kananu la twalai belenge mucilri si makakai ki laumawmase, ku vaeva ku telregane masupatele ka kukingi. Ngwalai kikai pakilringavane ulebe ki kananu, kai umawmase twadreadrekase ki Twaumase.