Nipadrelane 15 - Ngudradreadrekadhane Ka Sisiu 魯凱語聖經

Sasiakawlu belenge si bibiilrilinga ka amatikurwane

¹ La dreeleana naku ikai belenge ku taingeane ka matiasamali ku tangimiane, maadrau si la matisamali. Tapitu ku sasiakawlu belenge ku arathungu kwini ki bibiilrilinga ka taipitwane ka amatikurwane, asi lwiyane ku Twaumase lri ikai kikai ki amatikurwane si pangimia ku elathaneini.

² La dreeleanaku ku mia ki garase ka laveke, kiaibu ku apwi. La mialria naku drele ku laumawmase; kwi lalasu pamalebenga kudra ki waudriwdripi, si tinuwaudriwdripane, amani kwidra niarakaiyane ku asipi patukamani ki nagane ka laumawmase. Kwi lalasu acegecege makanaelre ithili ki garase ka laveke, si ecenge ku baai ki Twaumase liniane ka patungutungu,

³ La senasenai ku senai ki sasiakawlu ki Twaumase ka Musi si senai ki Lrulai ka Kiu iya kai: Tamatama ka sapupukuanenga ka Twaumase, ku takaunganesu ala matiasalru si matisamali turamuru! Talialalai ki sanaka kuni, ku kadalrananesu ala patengane ka mwalecege!

⁴ Tamatama, aneane ku lri lreme kai musakene si mukuludru muswane? Aneane ku lri kai drengedrengere ki naganesu? Kathaanesu ku amani ku sanianiangenga. Sanaka kuni lri kela makanaelre, si ikai cucubungu muswane sukubu, asi lwiyane ku takaungane ki dringelresanesu athingalanenga utaluvaivai.

⁵ Sakabilrilinga kikai, wadreelaku belenge ku ngwaelebane ku daane ki Twaumase, ikai adringi yakai kwini ku taulebeane ki Twaumase ka Alrivilrivi ka balrawbau.

⁶ Kudra arathungu ki taipitwane ki amatikurwane ka tapitu ka sasiakawlu belenge twalai ki daane ki Twaumase kainganai, si silaimai ku waeleelethe ka lalasare ka kaimadhane ka laimai, ki tuku waerece arakai ku kingi ka lakete.

⁷ Ku vaeva ikai ki supate ka panianianiake wamalra ku nipasueteane ki pitu ka kingi ka kisi ku elathane ki Twaumase si baai kwini ki tapitu ka sasiakawlu belenge.

⁸ Ikai ki daane ki Twaumase, swaeteane ku ebelre ka lrigu si puku ki Twaumase, sakaiyana maka pulebe ku pitu ka amatikurwane kwini tapitu ka sasiakawlu belenge, kadrwa ku umawmase ku wadulru mudaane ki daane ki Twaumase.