Nipadrelane 14 - Ngudradreadrekadhane Ka Sisiu 魯凱語聖經

Sapalribulane ka Senai

¹ La pelaku drele, si drele ki Lrulai ka Kiu acegecege ikai lregelrege Ziyungu, ku yakai taelre iniane ta 144,000 ka umawmase; ki punu lini makanaelre wapacase ku naganeini si nagane ki Tamaini.

² La kilalraku twalai belenge ku lingau, mia ki siange ki tuturu, mia ki dreredrere. Kudra kilalrali kwi lingau la mia ki lingau ki patungutungutungu.

³ Kwi lalasu acegecege ikai cucubungu ki taetalane si supate ka panianianiake, si laciwru, la senai asivaeva ku bavane ka senai; kikai senai kathane kudra twalai lebe si kipalribulu ku ta 144,000 ka umawmase ka wathingale senai.

⁴ Ki la kikai umawmase yadrepele ka kaiyana kiaelre ki ababai ka langukathabarane. Luka tapapiane ki Lrulai ka Kiu, kwi lalasu twapapalra papinu. Kwi lalasu twalai ki umawmase kimalra langai, paaswalana patarumara ki Twaumase si Lrulai ka Kiu.

⁵ Kwi lalasu kai watavuvuvulrucu, la kaika kudrukudrulru.

Tatulru ka sasiakawlu belenge

⁶ La dreelenga naku ku tangea ku sasiakawlu belenge yakai belenge ngipalapalai; yakai iniane ku palralrawthu ka hukuingi ku apelaelane papia kawmasane ki lakuni, ki lacacekele, ki laminzuku, si ku makaelaela ka vaga ka umawmase.

⁷ Kwi lasu akwadrau iya kai, “Usakena ukuludru ki Twaumase, si drengedrengere ku sanianganeini! Asi lwiyane wakelanga ku asaibanganeini ki umawmase. Sukuba kudra ki wabekace belenge, kadaengane, laveke, si sanaka berai ka Tamatama!”

⁸ Ku mwasakadrusa ka sasiakawlu belenge la kabibilrili iya kai, “Maburukunga! Ku maadrau ka Babilunia maburukunga! Asi lwiyane kwi alisu wamalra kwini pairairangane ka makecenge ka bava si paungulu sanaka umawmase.”

⁹ Ku mwasakatulru ka sasiakawlu belenge laka bibilrili ki tadrusa ka sasiakawlu belenge akwadrau iya kai, “Luka aneane ku wasukubu kwini ki waudriwdripi si tinuwaudriwdripane ka samiamiange, la ki puhange papunu si alrima,

¹⁰ lri ungulu ku makecenge ka bava ki Twaumase; kikai bava kaika nidrimane ku acilai si gugu pikai ki elathane ka dringelresane ka kupuini! Kwi lalasu lri ikai cucubungu ki saniange ka sasiakawlu belenge si Lrulai ka Kiu kipathavungu ikai ki wakelrakelrakelrabe ka apwi si balaru.

¹¹ Kudra pakiangeangeange liniane ka ebelre lri palralrawthu kai idrengere ku atuebebelrane. Kudra la wasukubu kwini ki waudriwdripi si waudriwdripi ka samiamiange, si kudra tarwamaranga ku sapatuthingalane ku naganeini, kai lri kasulivatenga pivai pimaungu.”

¹² Ngwalai kikai, lri tara kiadili kudra paluludu ku drekase ki Twaumase, si ka patengane ku kidremedreme papia ki Yesu ka laumawmase ki Twaumase.

¹³ La kilalranga naku ku twalai belenge ku lingau ku amia kai, “Kai vaga kikai malra si pacase: Twalainga kaikameane, ku pasiakai ki Tamatama pacai ku umawmase lri kaesai!” La tubalre ku Siri iya kai, “Pacengecenge! Kwi lalasu lri palikainga ku sakwalrialri lini, lri kisupisupilringa ku aisadrane, asi lwiyane ku tapangimiane tulrepenge ku awngane lri tupapalra liniane ngiesai.”

Lataleke kai kawmasane

¹⁴ La pelana naku drele, si drele ku taingeane ka lrawlrapungu ka ememe, belenge ki ememe la nene ku tangea ku mia ki Lalake ki Umawmase, siapagamucu ku kingi, la ecenge ku marangisi ku takawkau.

¹⁵ La ikai ku tangea ku sasiakawlu belenge ku twalai ki daane ki Twaumase kainganai, si papia kwini ki wanene ikai belenge ki ememe akwadrau tawtau iya kai, “Wadarurunga kai vai, mabeanga kai taleke kawmasane! Arakaiya kwi takawkausu ketabe!”

¹⁶ Kwini wanene ikai belenge ki ememe la papia kawmasane vidrividri ku takawkau, ku taleke kawmasane la kiketabenga.

¹⁷ La dreelenga naku ku tangea ka sasiakawlu belenge ku twalai belenge ki daane ki Twaumase kainganai; kwi lasu la mialri ecenge ku marangisi ka vaeva ka takawkau.

¹⁸ Pacuungulu, la ikaainga ku tangea ku marasiakaikai ki apwi ka sasiakawlu belenge ku twalai ki tapatarumaramarane kainganai, si papia kwini ki waecenge ku marangisi ka takawkau ka sasiakawlu belenge si akwadrau tawtau iya kai, “Arakaiya kwi takawkausu malra kete kwi budu kawmasane, asi lwiyane malremenga ku budu!”

¹⁹ Kwini sasiakawlu belenge la kirimu papia kawmasane vidrividri ku takawkau, si kete ku budu kawmasane, la malra si verevere pwa ki elathane ki Twaumase ka tapepeane tubava.

²⁰ Kwi budu kiapikai latadre ki cekele ki tapepeane tubava si kidredredre, la ikai ku erai ku mwaludru lriau twalai ki nipeane tubava, si lriau dralreke ku 300 ka kunlri, ku mwadringane lri ikai kau drusa ka mituru.