Nipadrelane 12 - Ngudradreadrekadhane Ka Sisiu 魯凱語聖經

Ababai si Baralebale

¹ Kikai kwidra, kai belenge adrelane ku vaeva ku maadrau la matisamali ku tangimiane: Yakai ku tangea ku ababai ku siapalimemelre ki vai, ku drapale la dredre ki dramare, la sipagamucu ku yakai ku 12 ku tariau ka pagamucu.

² Kwi alisu lri padalrunga si tulalake, ku takiangeanganeini ki atulalakane la karaleale.

³ Kai belenge la adrelaneana ku vaevanga ka matiasamaimali ku tangimiane: Yakai ku vaeva ku duduli ka maadrau ka baralebale, twapitu ku awlru, laka mangeale ku lawngu, ku awlru la sipagamucu ku pagamucu ki talialalai.

⁴ Kwi baralebale la arakai ku tawthu pelrepelre ku taingeane ki nipautulrwane ki tariau subelebelenge, si verevere pikai lebe. La acegecege ikai cucubungu kwini ki lri tulalakenga ka ababai, lri ukalava kwini ki daini sana kitulalake, lai lri malra thamukulu.

⁵ Kwini ababai la tulalake ku sawvalai; kikai lrulai lubibilrili lri arakai ku adreme ka ukudru rathudu sanaka kuni. Ai, kikai lrulai kia pubelenge pwa ki taetalane ki Twaumase.

⁶ Kwini ababai mwabere muubulane, wamwa kudra padulru ki Twaumase pasikai iniane; ikai kwini, kwi alisu la kisirapale tara 1,260 ka vai.

⁷ Sakabilrilinga, kai belenge la makaruruburu. Ku Mikaele si sasiakawluini belenge makakaruburu ki baralebale, ku baralebale si sasiakawluini la mialri kainganai kidresenge kikaruburu.

⁸ Ai, ku baralebale kiapamalebe; ku baralebale si sasiakawluini la kai maka ikainga ka belenge.

⁹ Ku baralebale ala kiverevere pulebe; ka amani kudra sidrumane ka sulrau, ku nagane sia Akema sia Satange, ka amani ku walrilrilrigili sanaka umawmase. Sa kiverevere pwa kai kawmasane; ku sasiakawluini la mialri kiverevere pulebe.

¹⁰ La kilaalranga naku ka belenge yakai ku akwadrau ku lingau iya kai, “Kikai asasane amani ku apalribulane ki Twaumase! Ku Twaumase pwataluvaivainga paadrelane ku lrekeme si sarathudaneini; ku cegecegeini ka Kirisitu la mialri paadreelane ku lrekemeini. Kudra piavaiyane pimaungu icucubungu ki Twaumase si kukusu ki laretesaneta, twalainga ka belenge kiverevere pulebe.

¹¹ Ku laretesaneta ngwakainga ki erai ki Lrulai ka Kiu si tapelaelane lini ku patengane ka sabulrwane si pamalebenga ki baralebale; kwi lalasu pakeela ku walreme ngiacacilri ku niake lini.

¹² Lakamani, kunumi ka swa subelebelenge si yakai kwini, nai kiraragai numi! Ai, kai kadaengane si laveke matisalregesege ki amatikurwane! Asi lwiyane kai Akema mailukunga ku girimucane si mulebe mwa numiane kwini, asi lwiyane ngiathathingale ka kai lri tarathaynunga ku vaini.”

¹³ Kwini baralebale sa ngithathingale ka kiaverevere pikai lebe, matwase saladha ki twalalake ku sawvalai ka ababai.

¹⁴ Kwini ababai la malra ku drusa ka maadrau ka paridi ki adrisi, lri dulru ngipalai muubulane, mwa ki taikaikaiyaneini. Ikai kwini, lri kisirapale taratulru ka caili si apararaamau si kai kikace ki sulrau.

¹⁵ Kwini sulrau yakai ilrilrikudru ki ababai, si patwalai ki ngudui burusu palriau ku acilai, ka apakialudrane ki alisu.

¹⁶ Ai kai kadaengane paralubu kwini ki ababai, la manunganga si malra therepe kwini burusu ki baralebale kwi acilai.

¹⁷ Ku baralebale la papia ki ababai kalisi, la katwase kikaruburu ki drumane ka agaganeini, ka makakaruburu ki sanaka umawmase ka paluludu ku drekase ki Twaumase, si masalru si pangimia ku tapelaelane ki Yesu ka patengane ka sabulrwane.

¹⁸ Kwini baralebale acegecege ikai aenaenai ki laveke.