Nipadrelane 11 - Ngudradreadrekadhane Ka Sisiu 魯凱語聖經

Tadrusa ku waakasi

¹ Tarwamaraku ku vaeva ku acepange ku mia ki ukudru, la ikai ku lingau ku amia kai nakwane, “Ngidrakala la lekete kwi daane ki Twaumase si tapatarumaramarane, si la asipi ku umawmase kwi yakai ki daane ki Twaumase sukusukubu.

² Ai, madha lekelekete kwi kalatadrane ki daane ki Twaumase, asi lwiyane kwini latadre nibadhanenga ki sakamaelanane ka umawmase; kwi lalasu lri pwadradreedre ki Saniange ka cekele tara 42 ka dramare.

³ Lri sikawlaku ku tadrusa ku sialaimai ku kaimadhane ku lri akasi; kwi lalasu lri pelaela ku vaga ki Twaumase tara 1,260 ka vai.”

⁴ Kwini tadrusa ka lri akasi amani kwidra acegecege icucubungu ki Tamatama ki yakawmasane ka drusa ka ulrive si drusa ka tatinakiane.

⁵ Alaiyasi ikai ku umawmase ku lri kisanu kabebetethe liniane, kwi lalasu lri patwalai ki ngudui pakelrabe ku apwi, si lama papacai ki badha. Lakamani, ku aneane ku kiasanu kabebetethe liniane, lri kamani ku kiapapacai.

⁶ Kwi lalasu yakai ku puku lini elebe belenge, ikai ki tapelaelaelane lini ku vaga ki Twaumase ka vai, lri kai paudale belenge; kwi lalasu la ikai ku puku lini magagemegeme ki laberai ki acilai, paerai ki acilai; la ikai ku puku ngisasingikai ku kidremedreme arakai ku makaelaela ku matikurwane pakiangeange ki kawmasane.

⁷ Kwi lalasu sapelaelanga ku vaga ki Twaumase, kudra kaiyanganai twalai ki valrulrange ka waudriwdripi lri kikaruburu liniane, lai pamalebe liniane, si lri papacai liniane.

⁸ Ku wapacai ka kinawmasane lini lai cilri pwa kadalranane ki maadrau ka cekele, amani kwidra tapikaiyane lini kedrekedre pwa ki ziwzika ki Tamatama. Kikai cekele sapelaelane ka nagane ki swa Sudume si swa Izipiti.

⁹ Twalai ki laminzuku, lacacekele, la makaelaela ka vaga, si lakuni, yakai ku umawmase ku lri kainganai drele ku kinawmasane lini makatulrulu si apararamau, kai pawabangalre ki umawmase dralreke liniane.

¹⁰ Kai kawmasane kai umawmase lri ngwalai ku tapacadhane lini si kiraragai. Lai akakadra si mabaibalrithi ku saaceacebe, asi lwiyane kikai tadrusa ka yuginsia napakwalringa ki yakawmasane ki umawmase.

¹¹ Lu ngilribatenga ki makatulrulu si apararamau, ku la yakai ki niake lri twalai ki Twaumase kainganai, si mu adringi liniane, kwi lalasu lai lri acegecege; ku wadrele ku umawmase lai lri ngituluku kathathiburu turamuru.

¹² Kwi tadrusa ka yuginsia kialalra ku twalai belenge ku akwadrau ku lingau ku amia kai liniane, “Bwala mubelenga mwakai!” Kwi lalasu sa dredredrele ku badha la ngukai ki ememe mubelenge.

¹³ Sakamani kwidra icengecenge, walingilingi kai kadaengane, kwini cekele la kaburuku ku taingeane ki nipaumangealane, ku ngwakai ki lingilingi si pacai wadaruru ki ta 7,000 ku umawmase. Ku tedranenga la makitu kakiwcu la drengedrengere ki yabelenge ka sanianiangenga ka Twaumase.

¹⁴ Ngialribatenga ku mwasakadrusa ku matikurwane; kwini sakataitulrwane ku amatikurwane lri kelaanga.

Mwasakapitu ka rapa

¹⁵ Ku mwasakapitu ku sasiakawlu belenge sangirapa, ka belenge la ikai ku akwadrau ku lingau iya kai, “Ku maadrau ka puku ku sarathudane ki lepawngane Tamatamanengata si cegecegeini ka Kirisitu; Kwi lasu lri magagemegeme ku puku, kai lri kaelanga palralrawthu!”

¹⁶ Kudra yakai cucubungu ki Twaumase, nene ikai ki taetaleini ka ta 24 ka ciwru makitwa gurapangane icakena makanaelre, si sukubu ki Twaumase,

¹⁷ la iya kai: Kunadruma, si kaiasasane ka Tamatama ka sapupukuanenga ka Twaumase! Kiaseasene nai muswane; asi lwiyane arakaisu ku maadrau ku puku, rathudu.

¹⁸ Sanaka kuni la kagirimucu kalisi, ai, ku sakaelaelane ki dringelresanesu mabeanga. Wadarurunga ku vai, ku wapacai ku umawmase lri kisaibange; ku sasiakawlusu ka layuginsia, ku umawmasesu, si sanaka mwasakene ukuludru muswane ku umawmase, adravane ka matiausakene ka kai matiausakene, lri malra ku pakalreva makanaelre. Kudra lamabebetethe amudu ki kadaengane ku umawmase lri kipakamudu!

¹⁹ Sakamani kai kwidra, ku Twaumase ikai belenge mwaelebenga ku daane ki Twaumase; ku Langiane mwataluvaivai ikai kwini. La pacungulu, ikai ku lrikace dreredrere, elrange, lingilingi, si maadrau ka kananu.