Nipadrelane 10 - Ngudradreadrekadhane Ka Sisiu 魯凱語聖經

Sasiakawlu belenge si tikiane ka nibalrulane ka hungu

¹ La dreelenga naku ku tangea ku maadrau ku puku ka sasiakawlu belenge ku twalai belenge mulebe. Kwi lasu siapalimemelre ku kwakulavane ka ememe, ku belenge ki awlru yakai ku sivale ku balrilawlau; ku lingauini mia ki vai, ku drapale mia ki apwi ka ulrudru.

² Ku alrimaini la ecenge ku nipaipadhane ku tikiane ka nibalrubalrulane ka hungu. Ku vanale ki drapaleini wadredre ki laveke, ku viri la dredre ki daedae.

³ Kwi lasu la akwadrau tawtau, mia ki giringi ki raiyungu; kwi lasu satawtau la tubalre elrange ku pitu ka dreredrere.

⁴ Nau pacase ku taiyane ki pitu ka dreredrere iyaku, yakai ku lingau ku twalai belenge kainganai, si iya kai, “Kwi taiyane kawriva ki pitu ka dreredrere, madha paucale kikai niseketane, madha pacapacase!”

⁵ Sangilribatenga kikai, kudra dreleli ku acegecege ikai ki laveke si daedae kudra sasiakawlu belenge papia belenge cidingi ku vanale ku alrima,

⁶ si papia ki amani ku wabekace belenge, kadaengane, laveke, si yakai adringi sanaka manemane ka palralrawthu panianiake ka Twaumase kiketekete iya kai, “Kai lri pwigananenga!

⁷ Lu ngirapa ku mwasakapitu ku sasiakawlu belenge, ku Twaumase lri pangimianga ku pelaelangaini papia ki layuginsia ka sasiakawluini kudra kaika athingalane ka matiasamaimali.”

⁸ Sakabilrili, la kilalraku kudra aswalaala ku twalai belenge ku lingau amianga kai nakwane, “Lu katwasa, si malra pwakai ku ecenge ki acegecege ikai ki laveke si daedae ka sasiakawlu belenge ku nipaipadhane ka nibalrubalrulane ka hungu.”

⁹ La katwasaku, tabaadhaili kwini tikiane ka nibalrubalrulane ka hungu iya kwini ki sasiakawlu belenge. Kwi lasu la iya kai nakwane, “Malra! La lrede! Kwi barangesu lri tapalili, ai kwi ngudwisu lri pakalimeeme mia ki valu.”

¹⁰ La malraku patwalai ki alrimaini kwini tikiane ka nibalrubalrulane ka hungu, si kane, kai ngudui laka tengatengaane kalimeme mia ki valu, ai salrelrenga naku, ala ka tengatengane tapalili kai barange.

¹¹ Kwi sasiakawlu belenge la iyana kai nakwane, “Lri tara pelanasu pelaela ku tayugingane ki Twaumase ki laminzuku, lakuni, si amiamia ku makaelaela ku vaga ku laumawmase si latalialalai.”