Nipadrelane 1 - Ngudradreadrekadhane Ka Sisiu 魯凱語聖經

¹ Kikai hungu wapacase ku tapelaelane ki Yesu Kirisitu. Ku Twaumase peaelaela iniane, ku lrika apelaelaneini ki lasasiakawlu ki Twaumase ku lrika angimiane kai ki kaika atarathainwanenga ka vai. Ku Kirisitu siakawlu ki sasiakawlu belenge si padrele ki sasiakawluini ka Yuhani kilakikai.

² Ku Yuhani la pelaela liniane makanaelre ku dreleini, si akasi pasikai ki vaga ki Twaumase si kudra ki patengane ka sabulrwane ka pelaela ki Yesu Kirisitu.

³ Ku sialrigu ki kikai hungu lri kaesai turamuru! Ku kialalra ki kikai nisakaladhane ka vaga si paluludu kikai tapacasane ku umawmase lri kaesai turamuru! Asi lwiyane ki kikai patuelre ku lrika angimiane ku vai lri padaalrunga si kela.

Twabarengerane ki taipitu ka kiwkai

^4-5 Kwaku ka Yuhani watigamiaku baai ki swa tali Asia ka talupitulu ka kiwkai: Kudra amani ka yakai kunadruma, la ikai kaikameane, lubibilrili lai lri ikai palralrawthu ka Twaumase, si kudra yacucubungu ki taetalaneini ka pitu ka Ri, si kudra lataraakasi pakaelre ku kidremedreme, ka aswalaalanga twalai ki wapacai si sielane panianiake, ka warathudu ki latalialalai kawmasane ka Yesu Kirisitu, ani baai numiane ku migemi, ku sulivatane! Kwi lasu madalame mitane, pasiakai mitane ngicacilri si tueraerai, la patwalai ki pasalrivane pulatadre mitane,

⁶ ala kamaningata ku barakalai ki kuni ki talialalai, si kauawngu pasikai ki Tamaini ka Twaumase. Ku lrigu si lrekeme ani papia ki Yesu Kirisitu, pakela lumamilringi! Amingi.

⁷ Drela! Ngwakaikai ki ememe kainganai! Lri drele sanaka aneanenga iniane, adravane kudra waculrulu iniane kudra laumawmase lri mialri drele iniane. Kwi lasu lu kela, kai kawmasane sanaka umawmase lri pasikai iniane tubi. Ki kikai lri tara ngimia! Amingi.

⁸ Yakai kunadruma, la ikai kaikameane, lubibilrili lai lri ikai palralrawthu ka Tamatama ka sapupukuanenga ka Twaumase amia kai, “Alepaku, ka sapathagili, Umigaku, ka satwalrepenge!”

Adrelane ku Kirisitu papia ki Yuhani

⁹ Yuhaniaku ka retesane numi. Yakaiyaku adringi ki Yesu si kisapalrapalra ku akwalriane, taelre kiadili, si kisupilri ku pukuini. Pakai ku apelaelane paswadrau ku vaga ki Twaumase si ku pelaela ki Yesu ka patengane ka sabulrwane, nakiaemengenga naku ikai vuvugu ki laveke ka sia Patemuse.

¹⁰ Yakai sakavai ki Tamatama, ku Siri la suete nakwane, la kilalraku ku akwadrau ku lingau, mia ki lingau ki ngiarapapa, kudra yalrilrikudru nakwane la iya kai nakwane kawriva:

¹¹ “Ku drelesu pacasa, ala alra kikai nibalrulane ka hungu si pakatwase baai ki swa Ipisu, Semirena, Peregamu, Tiatira, Saradi, Piladilapia si swa Lawdikia ka pitu ka kiwkai.”

¹² La ngibangulaku nau drele kai kawarivariva nakwane luka aneane iya, la drelaku ku pitu ka kingi ka tatinakiane.

¹³ Ikai kabicelrakane ki tatinakiane la ikai ku tangea ku mia ki Lalake ki Umawmase, si acegecege ikai kwini, sialaimai ku wakela ki pakilri, la pituku erece ku niara kingiane ku saererecane.

¹⁴ Ku isiuini mia ki pasabu, mia ki ubale ki kiu ku bulane kalrapungu; ku macaini mia ki apwi ka wakelrakelrakelrabe;

¹⁵ ku drapaleini mia ki nithalethalane si niurathane ka lriwlu ku ledrane; ku lingauini mia ki siange ki tuturu ka acilai.

¹⁶ Ku vanale ku alrimaini waecenge ku pitu ku tariau, ku ngudwini la upa ku vaeva ka maecebe ku taadremane ka marangisi ka dramu. Ku lringauini mia ki mwalringedele ka ledra ki vai.

¹⁷ Sa drelaku iniane, la gurapanganaku ikai cucubungu ki drapaleini, si mia ki wapacai ka umawmase. Kwi lasu la arakai ku vanaleini ansu nakwane, si iya kai: “Madha ukuludru! Amaniaku ku sapathagili, si satwalrepenge.

¹⁸ Palralrawthaku ikai! Nawapacainga naku, ai panianianiakenga naku kaiasasane, si ka palralrawthunga panianiake. Wagemegemaku kai sawsi ki apacadhane si swa swadriadringi.

¹⁹ Ku drelesu, ku angimiane kaiasasane ku lrika angimiane lukabibilrili, pacasa patuelre.

²⁰ Ku drelesu, kikai yavanale nakwane ka pitu ka tariau si pitu ka kingi ka tatinakiane ku patharevane ka kaika athingalane ka matiasamaimali miyaiya kikai: Kwi pitu ka tariau yai sasiakawlu belenge ki pitu ka kiwkai; kwi pitu ka tatinakiane amani kwini pitu ka kiwkai.”