Nihimi 9 - Ngudradreadrekadhane Ka Sisiu 魯凱語聖經

Ngiapapelaela ku pasalrivane lini ku mapapangale

^1-2 Kai ki dramare ki mwasaka 24 ki vai, ku swa Iseraylri yasarubu maelrelre laisi, pasikai ki pasalrivane lini kiangeange ku kidremedreme. Kwini lalasu matatwakudhanga ki la maelane ka zuku makanaelre. Kwini lalasu sialaimai ku kaimadhane, ngicacabungu ku dae, pathingale ka watubitubi, ala acegecege si ngipapelaela ku pasalrivane lini si pasalrivane ki cucungulane lini.

³ Ikai ku ngwasi tulrulu ki tuki, kwini lalasu acegecege kilalra ku hulrice ki Tamatama ka Twaumase lini, la pacungulu ngusitulrulu ki tuki, kwini lalasu ngiapapelaela ku pasalrivane si sukusukubu ki Tamatama ka Twaumase lini.

⁴ Yakai ku nitutaikaikaiyane ka nipasikaiyane ki swa Lrivi, la ibelenge acegecege ku Yesua, Bani, Kademile, Sebania, Buni, Serebia, Bani si Kinani. Kwini lalasu akwadrau papia ki Tamatama ka Twaumase lini inulri.

⁵ Ku swa Lrivi ka Yesua, Kademile, Bani, Hasabenia, Serebia, Hudia, Sebania, si Pithahia la pasikai ki apathagilane sukubu pangidawlu, kwini lalasu amia kai: Acegecega, drengedrengere ki Tamatama ka Twaumase numi, kapalralrawtha senai lrigu iniane! Ku naganeini silrialribate ki sadrengedrengerane patuelre, sanaka umawmase ani drengedrengere ki lrigu ka naganeini.

Ngiapapelaela ku pasalrivane inulri

⁶ La pacungulu, ku swa Iseraylri iya kai inulri: Tamatama, kathanesu ka Tamatama! Wabekacesu subelebelenge si latariau. Wabekacesu kai kadaengane si lamaneemanenga, Kai laveke si yadringi panianianiake; wabaaisu ku niake sanaka maneemanenga. Ku kwapingi subelebelenge wasukusukubu muswane.

⁷ Tamatamasu, ka wapilri ki Aberame ka Twaumase, wasangilukusu iniane katwase Ure kavai Babilunia, la balrithi ku naganeini pasi Aberahame.

⁸ Wathingalesu ka savaeva ku kidremedremeini papia muswane; makaketeketesu iniane. Palraingisu baai iniane ku kadaengane ka Kanange, Hite, Amuri, kadaengane ki Perizi, Yebuse Giregasi, ka amani ku taikaiyane ki lamwabaibalrithi iniane ka kadaengane. Pangiamiasu ku tapuvaganengasu, asi lwiyane amanisu ku dringelresane.

⁹ Wadrelesu ki cucungulane nai kiapakwalrialri ikai Izipiti, kialalrasu ku kitubi lini ikai ki laveke Suize.

¹⁰ Paiyasu ku pinangu Twaumasane ka puku papia ki talialalai ki swa Izipiti, si kiaecebe ki kiacapilini si mapapangale ki kunini; asi lwiyane wathingalesu liniane ka amani ku wadredrepete ki kawkawlusu. Ngwalai kikai kiapunaganengasu pakelanga kaikameane.

¹¹ Pasiakaisu ki kawkawlusu pauvagai ki laveke, si tukadalranane, la sangiluku liniane ngukakai ki kameamealane. La malrasu verevere kwini ki wasaladhaladha liniane pawrenere ki laveke, mia ki wamalra ku lrenege pawtheleke ki bikabiki ki laveke.

¹² Luka vaiyane, arakaisu ku ulrudru ka ememe sangililuku liniane, lu kadradrimiti ka maungu, arakaisu ku ulrudru ka apwi paledra ki kadalranane lini.

¹³ Twalaisu belenge mulebe mwa lregelrege Sinai, si kawriva ki kawkawlusu. Wabaaisu liniane ku madringelrese ku tinukakudhanane ka hulrice, matiasudralru ka sabulrwane si padradrekase.

¹⁴ Ani pasusu la iyasu liniane ki taisadrasadrane ka vaisu si tusaniange ka vai; pangwakaisu ki sasiakawlusu ka Musi patarumara ku hulrice ka padradrekase.

¹⁵ Kwini lalasu lu kasilraunga, la patwalaisu belenge pulebe ku akaneane; kwi lalasu lu kakadhame, la patwalaisu ki alrisapesape pangiburai ku acilai. Ku puvagangasu patarumara liniane ku kadaengane. La cunusu liniane padrikisi.

¹⁶ Ai ku cucungulane nai la aru ngikalrilrigu, aru kakeelrathe, kai mubangalre paluludu ku padradrekasesu.

¹⁷ Kwini lalasu kai mwabangalre pasalaladha, sakawlrau kudra tapianesu patuelre, kwini lalasu marimurunga kudra tapianesu ku pinangu Twaumasane ka puku. Kwini lalasu siakidremedreme ku abaebalreane, pilri ku tangea ku tarasangililuku, lri sangiluku liniane siwlriwlri mwa Izipiti aduri. Ai kusu pacepesu ka Twaumase, swaeteane ku migemi si kalithanesu, kaisu maduai si kalisi, yakai sueteane ku thalradhane. Kaisu wacilri liniane.

¹⁸ Kwini lalasu wadarepe ku vaeva ka ngilwalwange ka samiamiange, kikai amani ku wasangiluku liniane katwase Izipiti ka twaumase la iya! Kwini lalasu wadawlu ki lisianesu!

¹⁹ Ai kaisu wacilri liniane pikai calragulragu ubulane, asi lwiyane madrau turamuru ku kalithanesu. Luka vaiyane kudra wasangililuku liniane ka ulrudru ka ememe kadrwa ku takidailane liniane, lukamaungu kudra paledra liniane ka ulrudru ka apwi, la kaisu mwalra.

²⁰ Patarwamarasu ku mathaithariri ka Ri bulrubulru liniane, walapusu liniane ara Mana, la baai liniane ku awngulane ku acilai.

²¹ Tara masupatele ka caili ikai calragulragu ubulane, patarwamarasu liniane kudra arakaiyane lini pademedeme. Ku laimai lini kai pakapurici, ku drapale lini la kai ngithabucu kiangeange.

²² Paamakisu ki lakuni liniane, drikisi kwini ngwadadethe liniane ka kadaengane. Kwini lalasu wamalra ki talialaladhane ka Sihunge ka Hesebunge, kudra rathurathudu ki talialalai ka Uge kavai Basane.

²³ Wabaaisu liniane ku lagagane, ku kalrane mia ki tariau subelebelenge. La parathudu si ikaikai kai ki kadaengane, ka amani kudra puvagangasu ki cucungulane lini ka kadaengane.

²⁴ Kwini lalasu wamalranga Kanange, la ruthukusu ki swakai kavai ka laumawmase. Patarwamarasu ku puku ki kawkawlusu, la ngisasingikaai ku apangimiane ki latalialalai ki swa Kanange si mapapangale.

²⁵ Ku kawkawlusu waribicinga kwini ki makecenge ka taalradrane ka cekele, malrange ka kadaengane, nipasueteane ku tinukucingalrane ku lawbubulu ka daane, nilrukwanenga ka dralremedreme, ku ulrive, si madru ki angatu, si babudwane. Kwini lalasu ngwalwalwadhane kanekane, la kabucuku, kwini lalasu laka taricucuru, kiasupisupilri turamuru ku patarumarasu patuelre ku mathariri ku lamanemane.

²⁶ Ai, ku kawkawlusu wabaebalre muswane, kai pasalaladha muswane, kwini lalasu kai wathengete ki hulrice. Papacai kwini ki wabulrubulru liniane ku acilriane ki ngialisiane la siwlri mwa ki madringelrese iya ka layuginsia. Apapelaelaela tudreadrekase muswane,

²⁷ la malrasu liniane pwa ki alrima ki wadredrepete liniane ka badha. Kwini lalasu sa kipadradresenge ku amatikurwane la papia muswane kitubi, la twalaisu belenge kilalra liniane. Maadrau ku kalithanesu, la baaisu ku tarapalribulribulu liniane, palribulu liniane kidaili ki alrima ki badha.

²⁸ Kwi lalasu sa kasulivatenga, la pasaalriwnga icucubungu muswane, la pakelasu ki badha peelanga rathudu liniane. Ai kwini lalasu sana ngitatupela si papia muswane kitubi, yakaisu belenge kilalra, maadrau ku kalithanesu, apapelaelaela palribulribulu liniane.

²⁹ La pakipapawlringausu liniane ku apaluludane ki hulricesu, ai kwini lalasu ngiakalrilrigu, kai kilalra ku drekasesu. Kwini lalasu wathingale lu paluludane ku hulricesu ka lrika amanisu ku wasangililuku ki kadadalranane ki niake, Kwini lalasu lakakeelratheana kiecebe kai kilalra si pasalaladha.

³⁰ Luka caicaili kiaadilisu pakipapawlringau liniane. Pangwakaisu ki Risu kandusu ki yuginsia si papia liniane kawriva, ai Ku kawkawlusu macele ku calringa, ngwalai kwini la dawlusu ki drumane ka kuni kela rathudu liniane.

³¹ Adravane mia kikai, ngwalai ki kalithanesu, kaisu wacilri liniane, amudu liniane, asi lwiyane yakai ku migemi si kalithanesu ka Twaumase!

³² Twaumase nai, saniangesu turamuru, matiaukuludrusu, sapukwane turamuru! Pangiamiasu ku tapuvaganesu. Twalai ku tadrepetane naiane ki latalialalai ki swa Asiria pakela kikai, kwaalringa nai. Ku talialalai nai, ku tarasangililuku naiane, ku barakalai nai, ku yuginsia nai, ku cucungulane nai si ku mapapangale makanaelre kiapakwalringa turamuru, tara ngulringava kikai kipakwalrialri nai!

³³ Lu pathavungusu naiane yai naika angimiane, pangiamiamiasu, la pasalrisalriwnga nai.

³⁴ Ku cucungulane nai, latalialalai, la tarasangililuku, barakalai nai kai paluludu ku hulricesu, kadrwa ku takilalrane ku drekasesu si sapakipapawlringavanesu.

³⁵ Ku kawkawlusu naiyakai ki baaisu ka mathaithariri swadradraadrau ka kadaengane, la ikai ku subulrubulrusu ku talialalai rathudu liniane, ai kwini lalasu la kai kirimu kidaili ki pasalrivane si sukusukubu si marasikai muswane.

³⁶ Kaiasasane yakai nai ki baaisu ka kadaengane, ikai kikai ki amani ku tatwaladhane ku akaneane ka mathariri ka kadaengane aduri.

³⁷ Kikai kadaengane ku nipawtalekane wamwanga ki amani ku warathudu naiane ka latalialalai, asi lwiyane pasalriu nai. Kwini lalasu ngiasasingikaai marasikai naiane si lalapulapu nai, kwaalri nai turamuru.

Wapacase kiketekete ku mapapangale

³⁸ Ngwalai kai ki tangimianenga kilakikai, kunai ka swa Iseraylri lri ikai nai kai tukucingalre pacase kiketeketenga. Ku tarasangililuku naiane, swa Lrivi, si labarakalai makitwa pacasenga pikai belenge ku nagane lini.