Nihimi 8 - Ngudradreadrekadhane Ka Sisiu 魯凱語聖經

Sialrigu ku hulrice ku Izera

¹ Saka dramare kwini ki aswalaalanga ka vai, kwi lalasu maramaraamau ku kidremedreme si isarubu ikai Yerusalrime, ikai ki kalatadrane ki Acilai ka lrawlrawdru. Wadawlu ki tarakinkinkiu ki Sisiu ka barakalai ka Izera iluku ku hulrice ka hungu kela; kikai hulrice amani kwidra pangukai ki Musi ki Tamatama si baai ki swa Iseraylri.

² Ku Izera la iluku mwa ki tairubwane ki mapapangale, yakai ku sawvalai ku labaibai, la ikai ku tarudrawdrangenga, pwalringalringaunga ka lavavalake.

³ Ku Izera la ikai ki Acilai ka lrawlrawdru ki kalatadrane papia liniane silrigu ku hulrice, twalai sakaliare pakela ki mwalringedele, kwini lalasu la makitu kilalra kicacaligiri.

⁴ Ku Izera la acegecege ikai kwidra ki nipawkalrivilane pasikai kikai si ka niarakaiyane ku angatu darepe ka dai. Ku tali vanaleini yakai acegecege ku Matatia, Sema, Anaia, Uria si Masia, ku sa viri iniane acegecege Pidaia, Misaele, Malekia, Hasume, Habadana, Zakaria si Misulame.

⁵ Acegecege ikai ki taabelengane ku Izera, kwini lalasu la makitu drele iniane. Kwini lasu sa balre kwini hungu, la acegecege makanaelre.

⁶ Ku Izera la kawriva, “Drengedrengera ki Tamatama amani ku masanianiangenga ka Twaumase!” Ku mapapangale la makitu ciliki ku alrima, tubalre, “Amingi! Amingi!” Ala pidruru, ku lringau gwaruthungane kela ki daedae sukusukubu ki Tamatama.

⁷ Sakabilrilinga, la ngidrakale ku mapapangale, si acegecege ikai ki aikaiyane lini, la ikai ku la swa Lrivi ku papia liniane swaceacenge ki hulrice. Kikai laumawmase amani ku Yesua, Bani, Serebia, Yamingi, Akube, Sabithai, Hudia, Masia, Kilrita, Azaria, Yuzabade, Hanange si Pilaia.

⁸ Kwini lalasu papia ki mapapangale ara vaga patululu kwini hulrice ki Twaumase, si padrima swacenge, papulringalringau ki mapapangale.

⁹ Ku mapapangale sa kilalranga kudra kelrete ki hulrice, la makitu kikandu ku kidremedreme lini si tubi. Ku siwciu ka Nihimi, barakalai ka Izera, si swaceacenge ki hulrice ka swa Lrivi la pelaela ki mapapangale, “Kaikameane amani ku sanianiangenga ka vai ki Tamatama numi, kunumi madha kwalri kidremedreme si tubi.

¹⁰ Kaiasasane tamutavanane la makitu padulru ku angitalekane! Malra ku akaneane si bava numi vala ki kai makakelrete ku umawmase. Kaikameane amani ku saniange ka vai ki Tamatamata, kunumi madha kipakwalrialri, asi lwiyane kudra patarumara numiane ki Tamatama ku akiragadhane amani ku puku numi.”

¹¹ Ku swa Lrivi la sasa ki mapapangale, paisaselebane liniane, madha kwalri ku kidremedreme. Asi lwiyane kikai vai tinusaniangane.

¹² Ku mapapangale la makitu mutavanane, kiraragai kane ungulu, si mapakisupisupilri ki druma kudra pikai lini, asi lwiyane kwini lalasu kialalra si pulringalringau kwini silrigu lini pakilalra liniane kwini hulrice.

Talakangane ka lrisi

¹³ Saka samakapusale, ku tamatama ki lazuku si barakalai si swa Lrivi yasarubu mwa ki Izera kinkinkiu kudra sabulrwane ki hulrice.

¹⁴ Kwini lalasu la kidringai, kikai ku Tamatama sapangukai ki Musi baai ku hulrice nawadrekase ki swa Iseraylri ikai ki Talakangane ka lrisi yai lri ikai kwini ki kinisalrwane ka talakangane.

¹⁵ Lakamani kwidra, kwini lalasu la papia ki swa Yerusalrime makanaelre si drumane ki cekele pakatwase kudra sapelaelane, “Kunumi lu mulatadra, mwa lregelrege thiabe ku angatu ka ulrive, alrenge, navate, abare si drumane ka angatu, singikai ku tapelaelane ki hulrice arakai ku laricingi ki angatu cegecege ku talakangane si la ikaikai.”

¹⁶ Ku mapapangale la malra ngukalra ku ricingi, la darepe ku talakangane ikai ki cavalri ki daane lini, ikai ki kalatadrane lini, ikai ki kalatadrane ki daane ki Twaumase, si kalatadrane ki Acilai ka lrawlrawdru si Iparaime ka lrawlrawdru.

¹⁷ Sanaka twalai ki tamulrakavane la siwlringa ka laumawmase la makitu tutalakangane, la mudaane. Twalai ki zidai ki lalake ki Nunge ka Yesua, kikai yai, amani ku aswalaalanga ku tapangimiane lini ki swa Iseraylri. Sanaka aneanenga kiararagai turamuru.

¹⁸ Twalai ki aswalaalanga ki tatulrisisiane pakela ki bibilrilinga ki vai, kwi lalasu lukakaiya la silrigulrigu ku taingeane ku hulrice ki Twaumase. Kwini lalasu makapitulu pangimia kwini ki atulrisisiane, saka makavalrulu, la singikai ku tapelaelane ki hulrice pangimia sukubu ku apatulrepengane.