Nihimi 7 - Ngudradreadrekadhane Ka Sisiu 魯凱語聖經

¹ Kikainga kai balingibingi ki alradre ki cekele nitupudriadringadhanenga pakathariri, laka niparaisanenga kai lrawlrawdru ki cekele; Ku latarakadrenge ki daane ki Twaumase, latarasenai, si ku awngane ki drumane ka swa Lrivi laka mialri ka niapadrudrulranenga tulrepenge.

² Ala patadrusaku ku umawmase ku wakadrenge marasikai ku awngane ki cekele Yerusalrime; Kwini lalasu yai betakaneli ka Hanani si Hanania ka abebeelengenga ikai ki nikepalane ka cekele. Kai Anania yai asudralrwalrwane madu, ka mwasakene ukuludru ki Twaumase ka umawmase, kadrwa ku lri maka kiramau iniane ku umawmase.

³ Wacunaku liniane, luka mialrealre, lu kaiyana ledra, madha muelelebe ku lrawlrawdru ki cekele Yerusalrime; luka miauawbu lu kaiyana lriwgu ku vai, lu kaiyana katwase ki takadrekadrengane lini ku tarakadrenge, waelebe madu ku lrawlrawdru, si drukuru iya. La mialriaku cunu liniane ku apatwaladhane ki laumawmase Yerusalrime sikawlu ku wakadrenge ku umawmase, ku drumane ku umawmase la kadrenge ki nipawkalrivilane ka taikaiyane, ku drumane lri ikaai ki daane lini ngithalrilringulu dadadavace dredrele.

Lanagane ki wakela twalai ki taacaicaliane

⁴ Maadrau kai cekele Yerusalrime, ai ku yakaikai ki cekele ku umawmase kai takalra, ku nitudaanane si tulrepenge la kai kakalra.

⁵ Ku Twaumase wakandu nakwane la sarubwaku ki mapapangale si lakiacapicapili liniane si latabebelenge ki kunkwane, drele ku tamatwalaladhane lini. La kidringadhaku ku nipacasane kwidra ki aswalalanga kainganai twalai ki takiravasane ku laumawmase. Kikai lebenga yai amani ku kidringaili ku pacase:

⁶ Takaalra kwidra acaicali ku umawmase ku matwasenga kavai Babilunia, kaiyanganai siwlri mu Yerusalrime si Yuda, siaulri makanaelre mwa ki cekele lini. Kikai laumawmase si lawacekecekele lini twalai ku takiravasane lini si kitupasalriu ki talialalai ka Nibukadenezere, yakaai Babilunia acaicaicali.

⁷ Ku tarasangililuku liniane yai Zerubabele, Yesua, Nihimi, Azaria, Ramia, Nahamani, Muredikai, Bilesane, Misepare, Bigevai, Nehume, si Baana. Kai lebenga yai lu elrelreanenga ku laumawmase ki lazuku ki swa Iseraylri ka twalai ki taacaicaliane siwlri:

^8-25 Zuku ki Paruse 2,172 Zuku ki Sepatia 372 Zuku ki Ara 652 Pahathe Muabe (Mwabaibalrithi ki Yesua si Yuabe) 2,818 Zuku ki Ilame 1,254 Zuku ki Zatu 845 Zuku ki Zakai 760 Zuku ki Binui 648 Zuku ki Bebai 628 Zuku ki Azegade 2,322 Zuku ki Adunikame 667 Zuku ki Bigevai 2,067 Zuku ki Adingi 655 Zuku ki Atere (La si Hezekia) 98 Zuku ki Hasume 328 Zuku ki Bezai 324 Zuku ki Haripe 112 Zuku ki Gibiungu 95

^26-38 Ku siaulri mwa ki tatwaladhane lini ku umawmase lu elrelreane, Swa Bithele si swa Nitupa 188 Swa Anatute 128 Swa Bithe Azemavethe 42 Swa Kiriathe Yerime, Kepira, si Biruthe 743 Swa Rama si Geba 621 Swa Mikemase 122 Swa Bithelrihime si Ai 123 Drumane ka mwabaibalrithi ki Nibu 52 Drumane ka mwabaibalrithi ki Ilame 1,254 Swa Harime 320 Swa Yeriku 345 Swa Lude, Hadide, si Unu 721 Swa Sina 3,930

^39-42 Ku siaulri ku umawmase ki lazuku ki barakalai lu elrelreane, Zuku ki Yedaia (Mwabaibalrithi ki Yesua) 973 Zuku ki Imere 1,052 Zuku ki Pasehure 1,247 Zuku ki Harime 1,017

⁴³ Ku siaulri ku lazuku ki swa Lrivi, Zuku ki Yesua si Kademile (Mwabaibalrithi ki Hudavia) 74

⁴⁴ Tarasenasenai ikai ki daane ki Twaumase (Mwabaibalrithi ki Asape) 148

⁴⁵ Tarakadrenge ki daane ki Twaumase (Mwabaibalrithi ki Salume, Atere, Talemune, Akube, Hatita, si Subai) 138

^46-56 Ku siaulri ku lazuku ki tarakaungu ki daane ki Twaumase, Ziha, Hasupa, Tabauthe, Keruse, Sia, Padunge, Lebana, Hagaba, Salemai, Hanange, Gidele, Gahare, Reaia, Rezinge, Nekuda, Gazame, Uza, Pasia, Besai, Meunime, Nepisime, Bakebuke, Hakupa, Harure, Bazelithe, Mehida, Haresa, Barekuse, Sisera, Tema, Nezia, si Hatipa.

^57-59 Ku siaulri ku zuku ki sasiakawlu ki Sulumungu, Sutai, Superethe, Perida, Yala, Darekunge, Gidele, Sepatia, Hatile, Pukerethe Hazebaime, si Amune.

⁶⁰ Ku twalai ki taacaicaliane si kainganai siwlri ku mwabaibalrithi ki tarakawaungu ki daane ki Twaumase si mwabaibalrithi ki sasiakawlu ki Sulumungu ku umawmase lu elrelreane ta 392.

^61-62 Ku ngwakai ki zuku ki Dilaia, Tubia, si Nekuda ta 642. Kwini lalasu twalai ka Tele Mela, Tele Haresa, Kerube, Adunge, si Imere kainganai; ai kwi lalasu kai maka ngiasasiwmi ka mwabaibalrithi ki swa Iseraylri.

^63-64 Ku kai maka kiadringai ku tatwaladhane si siwmi ku cucungulane lini ka lazuku ki barakalai: Habaia, Hakuze, si Barezilai. (Ku cucungulane ki zuku ki barakalai ka Barezilai wamwa karudrange ki tangea ka ababai ki zuku ki Barezilai ka swa Gileade, la arakaainga kwini nagane ki zuku ki tama ki tawaneni.) Ngwalai sa kai maka siwmi kwi lalasu luka aneane ku cucungulane lini, la kipaasipi ka kaika mabula, lakamani kai lri maka abarakalai.

⁶⁵ Ku siwciu ki swa Yuda peaelaela liniane, madha kanekane ku nipatarumarane ki Twaumase ku alrivilrivi ka lamanemane, pakeela lu ikaai ku mwataluvaivai ku barakalai si dulru arakai ku Urime si Thumime pelaela kwini nikalrilrikane.

^66-69 Ku siaulri ku umawmase lu elrelreane 42,360 Ku lasasiakawlu lini ku sawvalai ku ababai 7,337 Ku latarasenasenai ku sawvalai ku ababai 245 Rigi 736 Ngiririgi 245 Lrakeda 435 Ruba 6,720

^70-72 Takaalra ku umawmase ku paralubu baai ku sarakaiyane tupudriadringai ki daane ki Twaumase, kwidra baai lini patarumara amani kai lebe: Siwciu: Kingi 8 kukingi Saarakaikaiyane tulrisi ka kisi 50 Sangirageragelanane ki labarakalai ka laimai 530 Latamatama ki zuku: Kingi 168 kukingi Gingi 1,250 kukingi Drumanenga ka laumawmase: Kingi 168 kukingi Gingi 1,140 kukingi Sangirageragelanane ki labarakalai ka laimai 67

⁷³ Ku swa Iseraylri makanaelre, paelre ki labarakalai, swa Lrivi, latarakadrekadrenge ki daane ki Twaumase, latarasenasenai ikai ki daane ki Twaumase, takaalra ku lakawkawlu, si latarakauawngu ki daane ki Twaumase, swateelrainga makanaelre ikaikai ki lacekele Yuda. Sadarurunga ki mwasakapitu ka dramare, ku swa Iseraylri swateelrainga ikai ki lacekele lini.