Nihimi 6 - Ngudradreadrekadhane Ka Sisiu 魯凱語聖經

Ngialisiane ka kidremedreme ki kiaececebe ki Nihimi

¹ Ku Sanabalate, Tubia, Giseme si drumane ka badha sa kilalra ka twalrepengenga nai ku alradre ki cekele, adravane ka takabulrutane kadruanga, (ku patengatengane kai nai paraisiana ku saelelebane ki lrawlrawdru ki samamwa daane ki cekele).

² Ku Sanabalate si Giseme la baai nakwane ku vaeva ku pacase, ani kela kavai dratane Unu ki taluvale ka cekele amia nakwane kikawriva liniane. Kikai yai salrilrigilane lini, pasana papacai nakwane.

³ La sikawlaku ku umawmase mwa pelaela liniane, “Yacengecengaku marasikaikai ku makucingalre ka awngane, kainaku lri maka mwa kwini. Kainaku palraingi ngwalai ku amwane kikawriva numiane si la idrengere kai awngane.”

⁴ Kwini lalasu sangwa supatele baai nakwane ku thadaalrane ku pacase, la tuthadaalranaku ku satubalreaneli liniane.

⁵ Sakabilrilinga, ku Sanabalate la sikawlu ki sasiakawluini baainga ku sakalrima ku pacase, kikai tigami yai kaika nipunulriane.

⁶ Amia kai ku nitigamiane, “Ku Giseme peaelaela nakwane, kwini ngwadadethe ka laumawmase ku lavaga lini ka amia kai, kusu si swa Yuda pasana balrebalre, lakamani kwini tupelaela numi kwini alradre ki cekele. Kwini lasu la iyana kikai, pasana atalialalalaisu,

⁷ si kelretenga kudra layuginsia ikai Yerusalrime pelaela pathingale ka talialalaisu ki swa Yuda. Ku tinuhika lri tara thingale kikai. Lakamani, ku ani kela kikawriva nakwane iyaiyali, la tamadrekadrekase.”

⁸ La patubalreaku iniane, “Kwini takawrivanesu kaika patengatengane, ngikakamanisu ngibabekace.”

⁹ Kwini lalasu kiadredreme ku wakukuludru naiane, ku apaidrengerane ki nikauawngane. La inulriaku iya kai, “Twaumase, kiatubiaku muswane pakagarangaili!”

¹⁰ Kikai kwidra, la mwaku kikawriva ki Simaia. Kwini lasu agane ki Mehetabele, lalake ki Dilaia, kwini lasu ngwalai ki awnganeini la kai maka kidaili kwini ki daaneini. La iya kai nakwane, “Kusu si kunaku lri tara katwaseta, mwa ki daane ki Twaumase ka Alrivilrivi ka taikaikaiyane kilepenge, la drukuru ku lrawlrawdru, asi lwiyane kavai lalasu lri kela papacai muswane. Kwini lalasu lri ikai ki maungu kela papacai muswane.”

¹¹ La tubalreaku, “Kainaku kamani kudra mwabere kilepenge! Lu kidremedremesu lri mudaanaku ki daane ki Twaumase kilepenge, palakebe ki niakeli? Kainaku lri mwa!”

¹² La kidremeedremaku kikai, si thingale ku Twaumase ka kai kawariva ki Simia, ala ka amani ku Tubia si Sanabalate ka arakai iniane kela kukuludru nakwane.

¹³ Kwini lalasu wabaai ku sapawlrawlravane si arakai iniane kela kukuludru nakwane, ku lrika apasalrivaneli, lu mia kikai, kwini lalasu lri dulru tulilisi nakwane, tusinalrelreme nakwane.

¹⁴ La inulriaku iya kai, “Twaumaseli, kiatubiaku muswane tara pulringava ki Tubia si Sanabalate kudra tapiane lini si pathavungu liniane. Kiatubiaku muswane tara pulringava ki yuginsia ka ababai ka Nuadia si drumane kudra kiadredredreme ku wakukuludru nakwane ka layuginsia.”

Twalrepenge ku awngane

¹⁵ Samaka 52 ki vai ku takaungane, ku alradre ki cekele yakai ki dramare ki Ilule ki 25 ki vai tulrepenge ku awngane.

¹⁶ Kwini ngiathalringulu ngudadethe ka lakuni ka labadha sa kilalranga, la kainu; asi lwiyane sanaka umawmase wathingale makanaelre, kikai awngane ku tatulrepengane ngwalai ku taparalubane ki Twaumase.

¹⁷ Ikai kwini ki lavai, ku lakiacapili ki swa Yuda kai watelrai matatigami ki Tubia.

¹⁸ Tapaangale ku laumawmase ki swa Yuda ku pwasakai iniane, asi lwiyane kudra tama ki taelrelreini lalake ki Ara ka Sekania, si kudra lalakeini ka Yehuhanange marudrange mwa ki lalake ki Misulame ka lalake ki Berekia.

¹⁹ Ku mapapangale yacucubungu nakwane matikai kudra mathariri ku lakakwakudhane ki Tubia, la mialri malra kudra la vagali padaruru iniane. Kikwini kwidra, ku Tubia la kai telrai tigami si baai nakwane, kisanu kukuludru nakwane.