Nihimi 5 - Ngudradreadrekadhane Ka Sisiu 魯凱語聖經

Marasiakai kudra nipakakucingalrane ku Nihimi

¹ Sakawlainga, tapangale ku umawmase, yakai ku sawvalai ku ababai, kiarimunga akwiyanga ki sakacekele lini ka swa Yuda.

² Yakai ku amia kai, “Kikai tapangale nai ka wacekecekele, lu ikaai ku taleke lri maka udripi nai!”

³ Yakai ku amia kai, “Lu padrepete nai ku kadaengane nai, babudwane, daane nai lri makakeelrete ku akaneane si kabucuku nai.”

⁴ La ikai ku umawmase ku amia kai, “Lri tara tinukisalru madu ku paisu ala maka baai ku kazilu ki umawma si babudwane la baai ki tinuhika.

⁵ Kunai si sakacekele nai ka swa Yuda thadalrane ka zuku. Ku lalake nai si lalake lini kadrwa ku tamakakaelane. La kivutha nai paaduri ki lalake nai. Yakainga ku lalake nai ku kia kilangainga aduri, yadrepele nai ka latwaramuru, asi lwiyane ku umawma nai si babudwane kiaribicinga kimalra.”

⁶ Kialalraku ku akwiyaiya lini si taiyaiyane lini, la kalisiaku turamuru,

⁷ la kalrithethaku marasikai kilakikai. La kaelaelaku ki lakiacapicapili ki mapapangale si latabebelenge iya kai, “Anu ravaravase ki laretesane numi!” La sarubwaku ki mapapangale madrekadrekase kikai lamungedai,

⁸ la iya kai liniane, “Naarakai nai ku madrau ku puku nai langai sawlri kwini kai maka watumane la ngikakilangai baai ki sakamaelanane ka zuku ka laretesane ka swa Yuda. Kaiasasane kunumi la piana numi kai vutha ki retesane numi ngikakilangai baai ki thadalrane ka sakacekeleini ka swa Yuda!” Kudra la tarasangililuku la kametemete nguvaganenga.

⁹ La kawriivanga naku, “Lu pia numi kikai pasalriu numi turamuru! Nai kai numi ka mwasakene ukuludru ki Twaumase, si pia kwidra pacengecenge ku awngane? Madha pikaikai ku lrika tatakaiyane ki badhata ka drumane ka zuku si arakai pulrialrivale mitane.

¹⁰ Napakiasalrwaku ku paisu ku taleke ki sakacekele, ku latalragili si la tarakaungu mialri pakisalru ki sakacekele. Kaiasasane, tamaalranga patuelre kwini nimaakiakiamane tukakadrwnga,

¹¹ si supilri pademedemenga kudra kiame lini, adravane ka paisu ka taleke, ku bava ku lawlau, kai lri pasawlringa liniane. Lai lri makakaai malra kwini nipadrepetane ku umawma, babudwane, maulriwlrivane si daane sawlri baai liniane.”

¹² Kudra lakiacapicapili la tubalre, “Palraingi nai singikai ku takawrivanesu pangimia, sawlri ku zaisange baai ki mapapangale, kai malranga ku kiame lini.” Wasarubwaku ki labarakalai, la dawlu ki lakiacapicapili si latabebelenge ikai cucubungu liniane kiketekete, ku lrika apangimiane kwini takiketeketane.

¹³ Ala kirimwaku mwalra kwidra silaketeli ka lakete, visivisi si iya kai, “Ku Twaumase lri mwalra cilri kwidra kai paluludu ku takiketeketane ku umawmase, lai lri ribici ku daaneini si pikaini sanaka manemanenga, kwi lasu lai lrika kadrwanga ku manemaneemane.” Ku yakai kwini makanaelre la makitu iya kai, “Amingi!” Si la drengedrengere ki Tamatama. Ku latarasangililuku la singikai ku takiketeketane lini pangimiyanga.

Kadrua ku tangipapakaesadhane ki Nihimi

¹⁴ Ikai ki taasiwcivaneli ki swa Yuda tara 12 ka caili, twalai ki Aretasise sa atinuhika ki sakamapusale ka caili pakela ki 32 ka caili, kwaku si laretesaneli makanaelre kadrwa ku kane nai ku naika amalrane ki siwciu ku taleke.

¹⁵ Kwidra aswalalala nakwane ka siwciu makanaelre amece ki mapapangale; kwi lalasu kiatubi ki mapapangale ku akaneane ki vaivaivai si pabaai ku salangadhane ki bava ku masupatele ka gingi ka paisu. Adravane ku sasiakawlu lini mialri ka wadredrepete lrilrigili ki mapapangale. Ai kainaku paiya kwini, asi lwiyane mwasakenaku mukuludru ki Twaumase.

¹⁶ Pakaelreaku kai pukuli pikai ki atupelane ki alradre ki cekele; kadrwa ku tacekecekelaneli. Ku sasiakawluli makanaelre la mialri kipaelre ki awngane ki atupelane ki alradre ki cekele.

¹⁷ Ku yakai ki cukwi ki takanekaneaneli kanekane ku swa Yuda ku mapapangale si latarasangililuku tara yakaai ku ta 150 ku umawmase, la ikaiyana ku twalai ki ngwadadethe ka lacekele ku umawmase ku wakela drele nakwane.

¹⁸ Lukakaiya lri padulrwaku ku vaeva ku sawvalai ku lwange, eneme ku taricucuru ku kiu, si makaalra ku kuka. Lu maka mangealenga, lai lri baadhaku ku bavane ku labava. Adravane ka ngimiyaiya kikai, kainaku kiatubi ku naika amalrane ki siwciu ku hukiu, asi lwiyane wathingalaku ki mapapangale ka matelregenga ku amece lini.

¹⁹ Twaumase, kiatubiaku muswane singikaiya ku mathariri ku takidremedremanesu si pulringau ku tapianeli patuelre.