Nihimi 4 - Ngudradreadrekadhane Ka Sisiu 魯凱語聖經

Pamalebe ki waruthuku ki awnganeini ku Nihimi

¹ Ku Sanabalate sa kilalra naiane ka swa Yuda ka pathagilinga ku atupelane ku alradre ki cekele, la kalisi paramuru, si mulralrakai pulrialrivale naiane.

² Kwini lasu la ikai ki la papalraini si kwapingi ki swa Samaria cucubungu iya kai, “Kikai talrulrupi ka swa Yuda manemane kai piyaiya lini? Kai lalasu tapasiwlri tupela tucekele amiamia? Kai lalasu lu kidremedreme lri dulru pangukai ki tapatarumarane tulrisi si maka vavale la tulrepenge? Kai lalasu kiadremedreme ku lri patwalai ki kwalamanga ka la papicianenga ka kavara silape ku lrenege arakai tupela!”

³ Ku swa Amune ka Tubia la acegecege ithili iniane, la mialri tupapalra iya kai, “Lri maka dulru raedre ku ngitwatumane ku alradre? Adravane ka vaeva ka kalailalri sana dredre lri pakaburuku iniane!”

⁴ La inulriaku iya kai, “Twaumase, kilalra kikai pwalrivalrivale naiane! Malra kwini sapulrialrivalane lini pakakai ki awlru lini! Ku lawbubulu lini ani kiravase, kwini lalasu ani mia ki kiaemenge kiravase pwa badhanane.

⁵ Kiatubiaku muswane madha paceacepe kudra pia lini ku ngialisiane, madha karimurimuru kudra pasalrivane lini, asi lwiyane kai lalasu twasinalreme naiane ka yacengecenge tupelaela ka mauawngu kikai.”

⁶ La pacungulu nai ku tupelaela nai ku alradre ki cekele, la kai tarathainu la pakelanga nai ki pararamau ku abelengane, asi lwiyane ku mapapangale kiasamula turamuru.

⁷ Ku Sanabalate si Tubia si swa Arabia si Amune, Asedude ka laumawmase sa kilalra naiane kudra tupelaela nai ku alradre ki cekele Yerusalrime lakasulialivate, si maka sawlringa cakupu kwidra natakababurukane ku alradre, la kirimu kagirimucu turamuru.

⁸ Kwini lalasu la maelrelre kidredredreme, ku akelane kikaruburu mwa Yerusalrime, pakalrithavulu.

⁹ Ai wainulri nai papia ki Twaumase, si sikawlu ki umawmase pakadrenge lukavaiyane si lukamaungu, takalre ku akelane lini.

¹⁰ Yakai ku vaeva ku senai ki swa Yuda: Arwa turamuramuru ku puku ki mauawngu, thathatha kai asalriane kai papiciane ka kavara; lri tumaneta si maka tulrepenge kai alradre ki cekele?

¹¹ Ku badha nai lu kidremedreme kai wadredrele liniane amia, kai lri thingale ka ngiatumatumane, lu keelanga kikai kwini lalasu, papacai naiane, ruthuku kai awngane nai, lri thingale nai.

¹² Ai, kudra yakai ki badha ku swa Yuda ku umawmase ngwasikalralenga kela pakipapawlringalringau naiane, kudra apangimiane ki badha kikaruburu naiane.

¹³ Lakamani kwidra, makitu ngirarukudra iyali ki mapapangale, silrabu siidiri silraili, singikai ki maretetese mavalavala, sikawlu liniane kadrenge kwini kaiyana ka nipatulrepengane ku alradre ikai lrilrikudru ki taalebeane.

¹⁴ Wadrelaku ki mapapangale sakathekethekelre, la kawriva liniane si lakiacapicapili, tabebelenge iya kai, “Madha mukulukuludru ki badha! Pulringava ku Tamatama yai madradraunga ka matiaukuludru. Pasikaiya ki sakacekele numi, labaibai numi, lalake numi si la tacekecekelane si daane numi kikaruburu.”

¹⁵ Ku badha nai sa kilalra ala ka wathingalenga nai kudra kidremedreme, ku apangimiane lini, la pulringaunga ku Twaumase ka mabebetethenga kudra kikaikake lini. Lakamani kudra katwasenga nai siwlri mwa kudra ki tasakaiyane nai, pacungulu kudra atupelane ku alradre ki cekele.

¹⁶ Twalainga kwini, ku sasiakawluli apararamau kudra mauawngu, pararamau ku acegecege kadrekadrenge, ecenge ku lrabu si idiri, alathare, lraili, silaimai ku sakikaruburuburane ka laimai. Kudra tarasangililuku akaelre ku puku paralubu.

¹⁷ Kwini ki waraeraedre tupelaela ku alradre ki cekele ka laumawmase. Adravane kudra la wasalrisalri ku zailriu ka laumawmase mialri ku thili ku alrima mauawngu, ku thili ku alrima waecenge ku sakikaruburane.

¹⁸ Kwini lamauawngu makitwa silrabu. Kudra tarangirapa ka kwapingi la ithili nakwane.

¹⁹ La kawrivaku ki mapapangale si lakiacapicapili si latabebelenge iya kai, “Kikai awngane wasarau si madaidaili turamuru, taibelenganeta ki alradre la madaidailita turamuru.

²⁰ Sana kilalra numi lu ngirapapa, kirarimwa isarubu mwa kai nakwane. Ku Twaumaseta lri tara pasikai mitane kikaruburu.”

²¹ Lakamani kwidra, ki vaivai twalai lukalialiare pakela ki maungu ngibwalenga ku latariau, ku apararamau ku umawmase ku mawaungu ikai ki alradre, ku apararamau ku umawmase la malra ku sakikaruburuburane si kadrekadrenge.

²² Ikai kikai kwidra, peaelaelaku ki kiacapili lini si taraparalubu liniane, lukamaungu tara asura sulai ikai Yerusalrime, lumia kikai, lri maka dulruta kadrenge lukamaungu kai ki cekele, la kaungu lukavaiyane.

²³ Adravane lukamaungu kainaku mwalaimaimai, kudra papalrali, sasiakawlu si tarakadrekadrenge ka kwapingi mialri kakadrwa ku mwalaimaimai. Taecengane nai makanaelre ku sakikaruburane.