Nihimi 3 - Ngudradreadrekadhane Ka Sisiu 魯凱語聖經

Twapela ku alradre ka kepale ki cekele

¹ Ku alradre ka kepale ki cekele paiya kai ku tatupelane: Ku abebeelengenga ki barakalai ka Ilriasibe si kudra la papapalraini ka labarakalai twapela ku Kiu ka lrawlrawdru, si patarumaranga la paraisinga pasutelrai. Kwini lalasu la raedrenga ku alradre ki cekele, pakela ki maadrau ka daane Bailu si Hananile, si patarumara.

² Ku swa Yeriku la raedre ku salrawlrawdru. Ku lalake ki Imeri ka Zakure la raedre ki salrawlrawdru.

³ Ku zuku ki Hasena la raedre ki Kange ka lrawlrawdru. Kwini lalasu la malra ku bulri si saelelebane paraisinga, ala paraisi ku sadrukudrukurane ki lrawlrawdru si aipi, pakai ku sadrukurane ki saelelebane ki lrawlrawdru ki cekele.

⁴ Ku agane ki Hakuze, lalake ki Uria ka Meremuthe la pudriadringai ku taluvale. Ku agane ki Misezabile, ka lalake ki Berekia ka Misulame waraedre ki salrawlrawdru. Ku lalake ki Baana ka Zaduke la pudriadringai ki taluvale.

⁵ Ku swakai cekele Tikua la pudriadringai ku salrawlrawdru, ai kudra lakiacapili ki cekele malrase kudra kelrete liniane ku apakaungane.

⁶ Ku lalake ki Pasia ka Yuiada si lalake ki Bisudia ka Misulame la tupela ku Yesana ka lrawlrawdru. Kwini lalasu wamalra ku bulri si saelelebane paraisinga, la malra ku sadrukudrukurane si aipi paraisi, pakai kwidra adrukurane ki lrawlrawdru ki cekele.

⁷ Ku swa Gibiungu ka Milatia, swa Mirunuthe ka Yadunge si swakai Gibiungu si cekele Mizepa la raedre ki taluvale, pakela kavai daane ki siwciu ki swa tali Sapakalriwgu ki drakerale ka siu.

⁸ Ku lalake ki Harehaia ka taradarepe ki gingi ka Uzile waraedre ki salrawlrawdru. Ku tarapiapia ku sapasangulrelremane ka Hanania la raedre ku salrawlrawdru, pakela ki Ngwadradrau ka alradre.

⁹ Ku lalake ki Hure, tarakadrenge ki pararamau Yerusalrime ka Ripaia la raedre ku salrawlrawdru.

¹⁰ Ku lalake ki Harumape ka Yedaia waraedre ki taluvale, ka adethe ki daaneini. Lalake ki Hasabenia ka Hatuse la raedre ki salrawlrawdru.

¹¹ Ku Malekia ka lalake ki Harime si lalake ki Pahathe Muabe ka Hasube la raedre ki salrawlrawdru si daane ki tatwapwapudhane.

¹² Ku lalake ki Haluhise ka Salume, tarakadrenge ki pararamau Yerusalrime la raedre ku taluvale. Ku lalakeini ka labaibai mialri paralubu.

¹³ Ku Hanunge si laumawmase cekele Zanua la tupela ku Vaalru ka lrawlrawdru. Kwini lalasu la paraisi ku saelelebane, la paraisi ku sadrukudrukurane si aipi, pakai ku adrukurane ki saelelebane. Kwini raedre lini ku lragiane 440 ka mituru, pakela ki Tabulubulwane ka lrawlrawdru.

¹⁴ Ku lalake ki Rikabe, tarakadrenge ki talikai Bithe Hakireme la tupela ki Malekia ka Tabulubulwane ka lrawlrawdru. Kwini lalasu la malra ku saelelebane paraisi, la mialri malra ku sadrukudrukurane si aipi paraisi, pakai ku adrukurane ki lrawlrawdru ki cekele.

¹⁵ Ku lalake ki Kuluze, tarakadrenge talikai Mizepa ka Salume la tupela ki Berai ka lrawlrawdru, la mialri darepe kwini samamwadringi ka tangukaikaiyane ka kadalranane. Kwini lasu la paraisi ku saelelebane, la malra ku sadrukudrukurane si aipi paraisi. Kwini lasu mialri ikai ki baiyu Siluame raedre kwini mararaisi ki babengelradhane ki talialalai ka alradre ki cekele, pakela kwini ki twalai ki cekele ki Davidi papulrawlrawdru ka tataetaetale.

¹⁶ Ku lalake ki Azebuke ka tarakadrenge ki pararamau ki talikai Bithezure ka Nihimi la raedre ki salrawlrawdruana, pakela ki tadralredralrekane ki Davidi, baibaiyu si takwapingane.

Waalradre ku kepale ki cekele ka swa Lrivi

¹⁷ Kikai lebe la swa Lrivi ka paralubu raedre pacungulu ku talupiale ku alradre ki cekele: Lalake ki Rihume ka Bani waraedre ku salrawlrawdru. Ku tarakadrenge ki pararamau ki talikai Kila ka Hasabia pasiakai kwini ki kadrengeini raedre ku salrawlrawdru.

¹⁸ Ku lalake ki Hinadade ka tarakadrenge ki drumane ki pararamau ki talikai Kila ka Bavai waraedre ki salrawlrawdru.

¹⁹ Ku lalake ki Yesua ka tarakadrenge Mizepa ka Izere waraedre ki salrawlrawdru, ikai ki cucubungu ki tapudringadringadhane ki lawbubulu ki kwapingi, pakela ki pikiu ki alradre ki cekele.

²⁰ Ku lalake ki Zabai ka Baruke waraedre ki salrawlrawdru, pakela ki lrawlrawdru ki daane ki abebeelengenga ki barakalai ka Ilriasibe.

²¹ Ku agane ki Hakuze, lalake ki Uria ka Meremuthe waraedre ku salrawlrawdru, pakela ki talikaiyane ki daane ki Ilriasibe.

Waalradre ku barakalai ki alradre ka kepale ki cekele

²² Kikai lebe kai labarakalai amani ku paralubu ku talupiale ku alradre ka kepale ki cekele: Ku ngiathalringulu Yerusalrime ka barakalai waraedre ki salrawlrawdru.

²³ Ku Biniyamingi si Hasube waraedre ku salrawlrawdru, ikai kwini ki cucubungu ki daane lini. Ku agane ki Anania, lalake ki Masia ka Azaria waraedre ki salrawlrawdru, kwini ki cucubungu ki daane lini.

²⁴ Ku lalake ki Hinadade ka Binui waraedre ki salrawlrawdru, twalai ki daane ki Azaria pakela ki pikiu ki alradre.

^25-26 Ku lalake ki Uzai ka Palale waraedre ki salrawlrawdru, twalai ki pikiu ki alradre ki cekele si adethe ki tarapalakebane kwini ki sabebelenge ka daane ibelenge ki alradre singikai kwini pathagili raedre. Ku lalake ki Paruse ka Pidaia waraedre ku salrawlrawdru, pakela ki adethe ki Acilai ka lrawlrawdru kwini ki tali talrawane si kwini ki daane ki tarakadrenge ki daane ki Twaumase. Kikai adethe ki cekele ki Upile, taikaikaiyane ki tarakaungu ki daane ki Twaumase.

Drumane ka la waraedre ki alradre

²⁷ Ku swakai Tikua ku umawmase waraedre ki salrawlrawdru, kikai sakadrusa ku raedre lini, Twalai kwini ki madradrau ka daane ibelenge ki alradre kwini cucubungu pathagili, pakela ki adeethe kwini ki daane belenge ki alradre ka Upile.

²⁸ Yakai ku labarakalai ku waraedre ku salrawlrawdru, twalai ki Rigi ka lrawlrawdru papia tali dradha raedre. Kwini labarakalai yakai kwini cucubungu ki daane lini raedre.

²⁹ Ku lalake ki Imere ka Zaduke waraedre ku salrawlrawdru, ikai ki cucubungu ki daaneini. Ku lalake ki Sekania ka taradrangalru ki lrawlrawdru tali talrawane ka Simaia waraedre ku salrawlrawdru.

³⁰ Ku lalake ki Selemia ka Hanania si mwasakaeneme ka lalake ki Zalape ka Hanunge waraedre ku salrawlrawdru. Kikai sakadrusa ku raedre lini. Ku lalake ki Berekia ka Misulame waraedre ku salrawlrawdru, ikai kwini ki cucubungu ki daaneini.

³¹ Ku taradarepe ki gingi ka Malekia waraedre ki salrawlrawdru, pakeela kwini ki daane ki tarakaungu ki daane ki Twaumase si daane ki tarasiwbawbai, kikai daane yakai ki thili ki samamwa ki Mipekade ka lrawlrawdru ki daane ki Twaumase, adethe ki tali tapeapecane ikai ki belenge ki pikiu ki raedre ka kabicelrakane ki tali talrawane si tali dradha.

³² Ku taradarepe ki gingi si tarasiwbawbai waraedre kwini ki tapalikaiyane, twalai ki tapeapecane ikai belenge ki pikiu ki raedre pakeela ki Kiu ka lrawlrawdru.