Nihimi 2 - Ngudradreadrekadhane Ka Sisiu 魯凱語聖經

Wamwa Yerusalrime ku Nihimi

¹ Sa ngilribatenga ku nitara supatane ka dramare, yakai saka minakavalane, la icengecenge ku tinuhika ka Aretasise tukwauawbu, la gugwaku ku bava si baai iniane. Kadrwana ku tadrelaneini nakwane lu angelrece kai lringauli,

² Lakamani ku kivagaini nakwane, “Lu drelane muswane asu mia ki kiapakwalrialri? La kaisu ka macaeme, lri tara ikai ku ukaisu si kai kiragai!” La ngitulukaku,

³ si tubalre, “Kusu ka talialalai banzai! Kudra takidralrekane ki cucungulaneli ka cekele kiapakababuruku, ku lrawlrawdru ki cekele la kilamanga, tumanaku dulru kai kipakwalri?”

⁴ Ku tinuhika la kivaga nakwane, “Manemane ku murikaisu?” La inulriaku ki yabelenge ka Twaumase,

⁵ ala pelaelaku ki tinuhika, “Lwiyasi la kikathalradhaku muswane, la palraingisu kudra kitubili, ala pasiwlriaili mwa ki kadaengane ki Yuda, mwa ki takidralrekane ki cucungulaneli ka cekele, la nau maka dulru tupela kwini cekele.”

⁶ Ku tinuhika la palraingi ku takitubianeli, kikwini kwidra, ku labaibai ki tinuhika la icengecenge ikai tapalra iniane. Ku tinuhika la kivaga nakwane lri tarathainusu iya? Lri siwlrisu luigane? La pelaelaku pudriadriingai iniane.

⁷ La kitubingaku ki tinuhika ku akakurwanane si baai nakwane ku pacase ka nidrekasane, sapelaelane ki siwciu ki kadaengane ki Sapakalriwgu Kadravane ka siu palraingi palribate nakwane, mwa kavai Yuda.

⁸ La mialri kiatubiaku ku taingeane ku sapelaelane baai ki tarakadrenge ki angatungatu ki tinuhika ka Asape, kitubi iniane ku apatarumarane ku angatu, ku sapudriadringadhane ki lrawlrawdru ki kepale ki tasukusukubane, alradre ki cekele. Si arakaiyane ki daaneli. Ngwalai ku tatapalrane nakwane ki Twaumase, kudra la kitubili, ku tinuhika la patarumara nakwane.

⁹ Ku tinuhika la sikawlu ki lakiacapili ki kwapingi si taingeane ku tara ngurigi ka kwapingi palakebe sateatedre nakwane, ala ngidrakalaku mwa kavai tali sapakalriwgu ki drakerale ka siu. Ikai kwini, la malra kwini pacase ki tinuhika baai ki siwciu.

¹⁰ Ku swa Huruni ka Sanabalate si kiacapili ki swakai Amune ka siu ka Tubia sa kilalra ka yakai ku umawmase ku pasiakai ki akaesadhane ki swa Iseraylri, la kai kiragai.

¹¹ Sa daruraku Yerusalrime, ikai kwini makatulrulu,

¹² la kainaku pelaela kinaneanenga kudra anipia kwini Yerusalrime iyaiya ki Twaumase nakwane. Saka samakatulrulu ki kabiceacelrakane la ngidrakalaku, mailuku ku tapia kudra papalrali mulatadre si katwase. Kudra mailuku nai ku nilapulapwane kathane kudra ngurigili ka ruba.

¹³ La katwasaku sakamaungu mulatadre ki cekele, ngukakai ki tali sapakalriwgu ka Vaalru ka lrawlrawdru, la papia tali lrawdru ngukakai ki Berai ka baralebale, daruru ki Tabulubulwane ka lrawlrawdru. La takudadadavacaku, takudredrele kwini ki malalisinga ka alradre ki cekele si kialama kabebetethe ka lrawlrawdru ki cekele.

¹⁴ Ala papia ki tali talrawane ki cekele, ala ngibangulu papia ki tali dradha, mwa ki Tuturu ka lrawlrawdru si Baiyu ki talialalai. Ikai kwini, asi lwiyane kudra ngurigili ku ruba kai maka kiadringai ku ngutitiki ka kadalranane la ngukakai ki lralrenelrenege ka nirubwane,

¹⁵ ala katwasaku papulrawlrawdru mwa kavai ki drakerale Kiderunge, la ngurigi luludu ki valrwalru ka drakerale, dredrele ki alradre ki cekele, ala siwlriwlri ngukakai ki natangukakaiyaneli, ngukakai ki Vaalru ka lrawlrawdru si siwlri mwa ki cekele.

¹⁶ Kadrwa ku natangeanga ku kiacapili ki swakai kwini kudra wathingale ku tamwaneli, ku watumanaku. Pakela kudra ki vai, kadrwa ku tapelaelaneli ki natangeanga ki sakacekele ka swa Yuda, adravane ka barakalai, ka kiacapili, ka kumuingi si kwini lri maka dulru kipaelre kai ki awngane ka umawmase, kadrwa ku takawrivaneli ku manemane.

¹⁷ Ai, kaiasasane la kawrivaku liniane; “Wathingale numi kai cubunguli kai makucingalre, ngwalai kikai aubulanenga kai Yerusalrime, la kilama si kalalisinga kai lrawlrawdru ki cekele. Bwala tatupela kai alradre ki cekele, amani lu peelangata kitusinalrelreme!”

¹⁸ Peaelaelaku liniane, ku tapangimiane tapalra nakwane ki Twaumase, ku taparalubane nakwane, si pelaela liniane ku takawrivane nakwane ki tinuhika. Kwini lalasu la iya kai, “Ala tapathagilinga tupela tucekele!” Kwini lalasu la makapadulrunga, lri pathagilinga kikai mathariri ka awngane.

¹⁹ Ku Sanabalate, Tubia si sia Giseme ka swa Arabia sa kilalra ku takikakane nai kudra apangimiane, la pulrialrivale naiane. Kwini lalasu amia kai, “Manemane kwini piyaiya numi? Lri baebalre numi ki tinuhika?”

²⁰ La tubalreaku, “Ku yabelenge ka Twaumase lri pangimia kai awngane nai. Sasiakawlu nai iniane, lri pathagilinga nai kaungu. Kai numi ka swakai kai Yerusalrime, kadrwa ku tacekecekelane numi kai Yerusalrime.”