Nihimi 13 - Ngudradreadrekadhane Ka Sisiu 魯凱語聖經

Pakiatukudha ki maelane ka zuku

¹ Kikwini ki vai, yakai ku umawmase ku akwadrau silrigu ku hulrice ki Musi pakilalra ki mapapangale, kai lalasu la silrigu kudra amia kikai: Lutumane madha pakipaelrelre ki swa Amune si swa Muabe ki tairuburubwane ki kawkawlu ki Twaumase.

² Kikai ngwalai ku swa Iseraylri sa katwase mubere Izipiti si ikai kadadalranane, ku swa Amune si swa Muabe kai wabaai ku akaneane si acilai ki swa Iseraylri, la dawlwana ki Balame paulrawlrau kela pusu liniane, ai ku Twaumase nai pakabalrithi ki nipuswane asasubulrubulrwane.

³ Ku mapapangale ki swa Iseraylri sa kilalra kikai hulrice, la patwalai ki la tailrelreane lini pakatwase ki maelane ka zuku makanaelre.

Tapakabalrithane ki Nihimi

⁴ Kudra taradrangalru ki drawsulu ka barakalai ka Ilriasibe yakai ku sakwamatatalraagi ki Tubia.

⁵ Kwini lasu la palraingi ki Tubia pikai kwini ki swaadrau ka taikaikaiyane, kwini taikaikaiyane natapikaikaiyane ku saarakaikaiyane ku lataleke si sapasangulrelremane; lalawbubulu ki daane ki Twaumase, ka abaadhane ki barakalai ku sapatarumarane, abaadhane ki swa Lrivi, ki tarasenai ki daane ki Twaumase, tarakadrenge ki daane ki Twaumase ku nipatarumarane ka ziwbunuici (Amani kwidra ziwbunuici twalai ki lataleke, bava, lawlau ka ulrive).

⁶ Sa ngimia kikai, kainaku yakai Yerusalrime, asi lwiyane amani saka tara 32 ka caili ku takatalialaladhane ki Aretasise ki swa Babilunia. La siwlriaku mwa pelaela iniane. La kai tarathainu, la tarumaraku ku tapalraingane ki talialalai,

⁷ siwlri mwa Yerusalrime. Ala thingalaku kikai ku Ilriasibe ala ka payakaikai ki Tubia kikai swadradrau ka taikaikaiyane ikai ki daane ki Twaumase ka ngialisiane ku tapianeini.

⁸ La kalisiaku turamuru, si malra kwini lamanemane ki Tubia patuelre verevere pulatadre.

⁹ La drekasaku bula iya kwini ki daane, si malra kwini lawbubulu ki daane ki Twaumase, la Taleke ka lrisi, si sapasangulrelremane sawlri pudaane.

¹⁰ La kilalraku kudra tarasenasenai ikai ki daane ki Twaumase si drumane ka swa Lrivi ka matwasenga Yerusalrime, si siwlri mwa ki yaumawma ki daane lini, asi lwiyane ku mapapangale kai makakelrekelretenga ku babaai lini ku akaneane ku sacekecekelane lini.

¹¹ Ngwaladhaku ki kiacapicapili ku tapakasepelane si tapakaubulane ku daane ki Twaumase si kaelaela liniane. La dawlaku pasiwlri ki tarasenai si swa Lrivi mwa ki daane ki Twaumase, pasiwlri liniane kipuawawngane.

¹² Ku la swa Iseraylri la pathagilinga malra ku lataleke, bava, lawlau ki ulrive ku ziwbunuici iluku mwa ki drawsulu ki daane ki Twaumase.

¹³ La sikawlaku ku tapia ku umawmase drangalru ki drawsulu, kwini lalasu amani ku barakalai ka Selemia, tarakinkiu ki hulrice ka Zaduke, swa Lrivi ka Pidaia. Ku taraparalubu liniane amani ku agane ki Matania ka lalake ki Zakure ka Hanange. Swadralrwaku kai ki laumawmase, kai lalasu lri tara pudriadringai pavalavala kikai lamanemane ki papapalra lini kipuawngane.

¹⁴ Twaumaseli, kiatubiaku muswane tarangulringava ku tapasikaiyaneli ki daanesu si awngane ki la asukubane patuelrenga.

¹⁵ Ikai kwini ki lavai, wadrelaku ikai Yuda saka Taisadrasadrane ka vai pepee ku budu, la ikai ku umawmase ku wamalra ku lataleke, bava, budu, icizike si drumane ka lamanemanenga pasiamece ki ruba, salri pwa kavai Yerusalrime. La pakipapawlringavaku liniane madha ikaikai ki Taisadrasadrane ka vai thathathakai iya.

¹⁶ La ikai ku twalai cekele Tayre ku yakaikai Yerusalrime, kwini lalasu la malra ku kange si lamanemanenga iluku mucekele, la ikai ki Taisadrasadrane ka vai kilangai ki mapapangale nai.

¹⁷ La kaelaelaku ki lakiacapili ki swa Yuda iya kai, “Anu maka thuru pia kikai ngialisiane pasalriu ki Taisadrasadrane ka vai?

¹⁸ Kikai kaika amani kudra ngukai ki Twaumase si pathavungu ki cucungulane numi, amudu kai ki cekele? Kunumi kikai pasalriunga numi ki Taisadrasadrane ka vai, ku elathane ki Twaumase la arukakalra mulebe mwa ki swa Iseraylri.”

¹⁹ La drekasaku, twalai ki sapathagili ki Taisadrasadrane ka vai, kwini ki sanaka miauawbunga, ku lrawlrawdru ki cekele lri elebe, pakeela lu ngilribatenga ku vai ki Taisadrasadrane ka vai lai lri muelebe. La sikawlaku ku tapia ku sasiakawlu kadrenge ikai ki lrawlrawdru ki cekele, luka Taisadrasadrane ka vai kai paudaane ki umawmase iluku ku lamanemanenga.

²⁰ Yakai saka kiningivalane kiningipusalane, kudra tarathathakai ka umawmase sakamaungu ki sakalrima ki nimaka pitulane ki vai la sulai ikai latadre cekele Yerusalrime.

²¹ La pakipapawlringavaku liniane, “Anu ngithanga ikai latadre ukalavalava ku akaliarane? Luiyasi la piana numi kikai, lri kiecebaku numiane.” Twalainga kikwini, kwini lalasu la kai mucekecekelenga luka Taisadrasadrane ka vai.

²² La cunaku ki swa Lrivi ngibabula iya, ala mwa kadrenge ki lrawlrawdru ki cekele, lani pudriadringai pasusu ki Taisadrasadrane ka vai ku mapapangale. Twaumaseli, kiatubiaku muswane ngwaladha kikai si ngulringau nakwane, si ngwalai ki thalradhanesu tukurwane nakwane.

²³ Ikai kwini ki lavai, la dreleana naku ku tapangale ku swa Yuda ku marudrange mwa ki labaibai ki swa Asedude, Amune si swa Muabe.

²⁴ Kudra lalalake lini laka apararamau ku ngwa Asedudeane ku vaga si drumane ka vaga, kai thingale arakai ku vaga nai ka swa Yuda.

²⁵ La kaelaelaku liniane, pusu liniane, lrumai liniane, gucugucu ku isiu lini. Pangukaiya ki nagane ki Twaumase kiketekete la iyaku liniane, si kai palrainginga liniane si lalalake lini mathaethareve ki drumane ka zuku.

²⁶ Amiaku kai liniane, “Ala amani kudra maelane ka zuku ka lababai ku papasalriu ki talialalai ka Sulumungu. Adravane ku Sulumungu ka talialalai ka masanianiange ki talialalai ki drumane ka kuni, ku Twaumase la kilibake iniane, la maka dulru rathudu palraelre ki swa Iseraylri, ai kwi lasu pasaalriwana kikai miyaiya kaika pasalrivane.

²⁷ Bekace nai twalralrau ku tangilisianane numi, si mathaethareve ki maelane ka zuku si baebalre ki Twaumase?”

²⁸ Ku Yuiada lalake ki abebeelengenga ki barakalai ka Ilriasibe. Ai yakai ku tangea ku lalakeini ku marudrange mwa ki swa Huruni ka lalake ki Sanabalate, lakamani ku pakatwaseli Yerusalrime ki Yehuiada.

²⁹ Twaumaseli, kiatubiaku muswane ngulringava kikai laumawmase luka pangiatumane kudrulru ki awngane ki barakalai si takiketeketanesu ki barakalai si swa Lrivi.

³⁰ La bulangaku ki mapapangale, pakidaili liniane ki lamanemane ki maelane ka zuku. La pasikaiyaku ki barakalai si swa Lrivi cegecege ku kakudhane, ku athingalane makanaelre ku awngane lini.

³¹ La mialri apakelrekeelretenga naku, ku amalrane iluku ki mapapangale singikai ki kalamanemanane ku saarakaiyane patarumara tulrisi ku angatu si aswalalanga kabea ku taleke si madru ki angatu. Twaumaseli. Kiatubiaku muswane singikaiya ku tharirane ku takidremedremanesu ngulringau ku tapianeli patueelre.