Nihimi 12 - Ngudradreadrekadhane Ka Sisiu 魯凱語聖經

Lanagane ki barakalai si swa Lrivi

¹ Kikai lebe amani ku lanagane ki barakalai si swa Lrivi, kai lalasu yadrepele ka twapapalra ki lalake ki Saletile ka Zerubabele si abebeelengenga ki barakalai ka Yesua karededele twalai ki taacaicaliane siwlri ka laumawmase.

^2-7 Barakalai: Siria, Yerimia, Izera, Amaria, Maluke, Hatuse, Sekania, Rihume, Meremuthe, Idu, Ginethune, Abiya, Miyamine, Madia, Bilega, Simaia, Yuiaribe, Yedaia, Salu, Amuke, Hilekia si Yedaia, kikai laumawmase ikai ki zidai ki Yesua yai tarasangililuku ki labarakalai.

⁸ Swa Lrivi: Tarasenasenai ku sakiaseasenane ka Yesua, Binui, Kademile, Serebia, Yuda si Matania.

⁹ Ku yakai ki sikatai ka taratubalre senai amani ku Bakebukia, Uneni si kudra lapapalra lini ka swa Lrivi.

Mwabaibalrithi ki abebeelengenga ki barakalai ka Yesua

¹⁰ Ku Yesua tama ki Yuiakime, ku Yuiakime laka tama ki Ilriasibe, ku Iliasibe yai tama ki Yuiada;

¹¹ ku Yuiada tama ki Yunathange, ku Yunathange tama ki Yadua.

Tamatama ki maretetese ki barakalai

^12-21 Saka abebeelengenga ki barakalai ku Yuiakime, kikai lebe kai barakalai amani ku latamatama ki zuku ki barakalai: Meraia ka swa Seraia, Hanania ka swa Yerimia, Misulame ka swa Izera, Yehuhanange ka swa Amaria, Yunathange ka swa Maluki, Yusepe ka swa Sebania, Adena ka swa Harime, Hilekai ka swa Meraiuthe, Zakaria ka swa Idu, Misulame ka swa Ginethune, Zikeri ka swa Abiya, lukaaneane ka swa Miniamine, Piletai ka swa Muadia, Samwa ka swa Bilega, Yunathange ka swa Simaia, Matenai ka swa Yuiaribe, Uzi ka swa Yedaia, Kalai ka swa Salai, Ibere ka swa Amuke, Hasabia ka swa Hilekia, Nathaniele ka swa Yedaia.

Tapacasane ki tacekecekelane ki barakalai si swa Lrivi

²² Ikai saka abebeelengenga ki barakalai ku Ilriasibe, Yuiada, Yuhanane si Yadua, ku tapacasane ki tamatama ki tai Lrivi si tai barakalai kia pudriadringai pudringai. Kikai tapacasane amani saka tinuhika ki swa Perisia ku Dariuse ku tatulrepengane.

²³ Ai, kudra nipacasane ki swa kunkwanane kudra tamatama ki tai Lrivi pakeakela ki zidai ki agane ki Ilriasibe ka Yuhanane.

Pavavala ku awngane ki daane ki Twaumase

²⁴ Ku swa Lrivi ikai ki tabulrwane ki Hasabia, Serebia, Yesua, Binui si Kademile, la tuvavaeva ku kemi darepe. Singikai ku tapelaelane ki umawmase ki Twaumase ka talialalai ka Davidi, lu ngusivale laka taidrusadrusane, senasenai drengedrengere ki Twaumase, kiaseasene ki Twaumase.

²⁵ Kikai lebe amani ku tarakicapili ki tarakadrenge kwini ki drawsulu ithili ki daane ki Twaumase: Matania, Bakebukia, Ubadaiya, Misulame, Talemune si Akube.

²⁶ Kikai laumawmase amani saka zidai ki agane ki Yuzadake ka lalake ki Yesua ka Yuiakime, ikai kwini mialri ka zidai ki siwciu ka Nihimi, ka zidai ki tarakinkiu ki hulrice ka Izera.

Patarwamara ku alradre ki cekele ku Nihimi

²⁷ Sa patarumaramara ki alradre Yerusalrime, ku swa Lrivi twalai ki taikaiyane lini kidawlu kipaelre ki atulrisisiane patarumara. Kwini lalasu arakai ku sakiaseasenane ka senai, carecare, patungutungu ka ungugake tulrisisi.

²⁸ Kwini wasenai ka wacekecekele ki swa Lrivi twalai ki ngiathalringulu ngudadethe Yerusalrime, si la adeethe ka cekele Nitupa,

²⁹ si twalai adethe ki cekele Bethegilegale, Geba si Azemavete isarubu.

³⁰ Ku barakalai si swa Lrivi ngiapapasikai si lamapapangale, si lrawlrawdru ki cekele, alradre ki cekele marasikai tulrisi ku akabulane.

³¹ Wasarubwaku ki tarasangililuku ki swa Yuda ikai belenge ki alradre, la pasangilukaku liniane tutai drusane ku mapapangale ngithalrilringulu ki cekele dadavace, kiaseasene ki Twaumase. Ku taingeane papia ki tali vanale, ikai belenge ki alradre papia ki Tabulubulwane ka lrawlrawdru si katwase papucucubungu.

³² Ku Husaia sa lrilrikudru ki latarasenasenai, ku lrilrikudruini twapapalra ku pararamau ku tarasangililuku ki swa Yuda.

^33-35 Ku salrilrikudruana amani kudra tarangirapa ka barakalai, amani ku Azaria, Izera, Misulame, Yuda, Biniyamingi, Semaia si Yerimia. Kudra taingeane amani ku Zakaria, kai lasu lalake ki Yunathange, agane ki Simaia. Ku cucungulaneini paelre ki zuku ki Asape ka Matania, Mikaia si Zakure.

³⁶ Ku lrilrikudruini amani kudra swakai ki zukuini: Simaia, Azarele, Milalai, Gilalai, Maai, Nathaniele, Yuda si Hanani. Kwini lalasu makitwa malra kudra arakaikai patungutungu ki umawmase ki Twaumase ka talialalai ka Davidi. Ku tarakinkiu ki hulrice ka Izera la mailuku kikai ki sakaredele papucucubungu.

³⁷ Ikai ki Berai ka lrawlrawdru, kwini lalasu la katwase tabelenge ki tataetaetale papia ki cekele ki Davidi, ngukakai ki daane ki talialalai ka Davidi, ala katwase siwlri mwa tali talrawane ki cekele ki Acilai ka lrawlrawdru kwini ki alradre ki cekele.

³⁸ Kudra taingeane ka lri kiaseasene ka sakaredele la papuviviri, luludu ngubabelenge katwase papucucubungu, kwaku si drumane ka pararamau ka mapapangale la tupapalra liniane katwase. La lribate nai ki Talabwane ka daane, kela ki Ngulapa ka balingibingi,

³⁹ twalai kwini katwaseana, si ngukakai ki Iparaime ka lrawlrawdru, Yesana ka lrawlrawdru, Kange ka lrawlrawdru, maadrau ka daane Hananile si Bailu, daruru kavai Kiu ka lrawlrawdru. La ikai nai kwini ki lrawlrawdru ki takadrekadrengane ki daane ki Twaumase paliakai ku tadadavacane nai ngithalrilringulu.

⁴⁰ Laka miyaiya kai kwi taidrusa ka kiaseaseasene ki Twaumase ka sakaredele la daruru ki talikainga ki daane ki Twaumase. Kai paelre kudra twapapalra nakwane ku latarasangililuku,

⁴¹ kikai sakaredele nai paelreana kudra tarangirapa ka barakalai: Iliakime, Masia, Miniamine, Mikaia, Ilihuinai, Zakaria si Hanania.

⁴² Ku lrilrikudru lini amani ku Masia, Simaia, Ilriazare, Uzi, Yehuhanange, Malekia, Ilame si Izere. Kudra sangililuku ki Yezerahia kudra tarasenai la akwadradrau senasenai.

⁴³ Ikai kwini ki vai, patarwamara nai ku thathatha ku sapatarumarane ka lrisi, ku mapapangale kiararagai turamuru, asi lwiyane ku Twaumase wabaai ku maadrau ku akiragadhane. Ku labaibai si lavavalake la mialri kipaelre tulrisisi. Kudra peravane ku lingau Yerusalrime adravane ka yadaaili kialalra makanaelre.

Padulru ku saarakaiyane sukubu

⁴⁴ Sakamani kwidra, yakai ku laumawmase ku kiasikawlu drangalru ki drawsulu, amani kudra tapikaikaiyane kudra aswalalanga kabea ka lataleke si madru si niziwbunuiciane. Kikai laumawmase kiacapili ku twalai ki ngwadadethe ki cekele ku umawma singikai ku takelretane ki hulrice sarubu ka abaadhane patarumara ki labarakalai si swa Lrivi. Ku mapapangale si swa Yuda makanaelre ngwalwadhane ki labarakalai si swa Lrivi ka umawmase.

⁴⁵ Kwini lalasu paluludu kudra drekase ki Twaumase marasikai ki kiapakabula ka lrisi si drumane ka lrisi. Ku tarasenai ki daane ki Twaumase si tarakadrenge ki daane ki Twaumase la mialri singikai ku takelretane ki talialalai ka Davidi si lalakeini ka Sulumungu pangimia ku awngane lini.

⁴⁶ Twalai ki zidai ki talialalai ka Davidi si tarakinkiu ki senai ka Asape pakeelanga kikai, kudra tarasenai amani ku tarasangililuku senai ku sadrengedrengerane si sakiaseasenane ki Twaumase.

⁴⁷ Saka zidai ki Zerubabele si zidai ki Nihimi, ku swa Iseraylri ki vaivai lri tara satedre ku saceacebe baai ki tarasenai ikai ki daane ki Twaumase si tarakadrenge ki daane ki Twaumase. Ku mapapangale wabaai ki swa Lrivi kudra naika talikaai lini ku nipatarumarane paka taingeane, ku swa Lrivi ala baainga ki labarakalai kudra naika talikaai lini ku taingeane.