Nihimi 11 - Ngudradreadrekadhane Ka Sisiu 魯凱語聖經

Yakaikai Yerusalrime ka laumawmase

¹ Ku tarasangililuku ki mapapangale yakaikai Yerusalrime makanaelre, ku drumane ku mapapangale la kuzibiki, kwini ki taimangeale la kuzibiki ku taingea ku daane mwa ikai Yerusalrime, ku tedranenga la ikai ki drumanenga ki cekele.

² Sanaka ngiakakamani ikai Yerusalrime ku umawmase, ku lamapapangale la drengedrengere iniane.

³ Ku mapapangale ki swa Iseraylri, barakalai, swa Lrivi, tarakaungu ki daane ki Twaumase, si mwabaibalrithi ki sasiakawlu ki Sulumungu yakai ki drumane ki cekele, ka amani kudra kipawcungulu lini ka kadaengane. Kikai lebe nagane kwini ki yakai Yerusalrime ka la tarasangililuku ki swa Yuda ka siu:

⁴ Ku zuku ki swa Yuda: Athaia, lalake ki Uzia, agane ki Zakaria. Ku drumane ku cucungulaneini Amaria, Sepatia, si Mahalalile, kai lalasu yadrepele ka mwabaibalrithi ki lalake ki Yuda ka Pereze.

⁵ Masia ka lalake ki Baruke, agane ki Kuluze, ku cucungulaneini yakaiyana ku Hazaia, Adaia, Yuiaribe, si Zakaria; kikai lalasu mwabaibalrithi ki lalake ki Yuda ka Selu.

⁶ Ku mwabaibalrithi ki Pereze ta 468 ku mwakalrivili ka laumawmase yakai Yerusalrime.

⁷ Ku Zuku ki swa Biniyamingi: Salu ka lalake ki Misulame, agane ki Yuide. Ku cucungulaneini yakaiyana ku Pidaia, Kulaia, Masia, Itiare si Yesaia.

⁸ Gabai si Salai, kwini lalasu yai padethaneana ka retesane ki Salu. Ta 928 ka daane ku swa Biniyamingi ku yakai Yerusalrime.

⁹ Ku lalake ki Zikeri ka Yuile amani ku tarakadrenge liniane. Ku lalake ki Hasenua ka Yuda amani ku mwasakadrusa ka tarakadrenge kai ki cekele.

¹⁰ Barakalai: Lalake ki Yuiaribe ka Yedaia si Yakingi.

¹¹ Seraia ka lalake ki Hilekia, agane ki Misulame. Ku cucungulaneini yakaiyana ku Zaduke, Meraiuthe si Ahitube; kai lalasu yadrepele ka abebeelengenga ki barakalai.

¹² Kikai zuku ta 822 ku kiapuawngane ki daane ki Twaumase. Adaia ka lalake ki Yeruhame, agane ki Pilalia. Ku cucungulaneini yakaiyana ku Amezi, Zakaria, Pasehure si Malekia.

¹³ Kikai zuku paelrelrenga ta 242 ka tamatama ki ladadaanane. Amasesai ka lalake ki Azarele, agane ki Ahezai. Ku cucungulaneini yakaiyana ku Misilimuthe si Imere.

¹⁴ Kikai zuku ta 128 ku talrilrigili ka tagagarange. Ku tarakadrenge liniane yai Zabedile, la twalai ki kiamatikaikai ku tacekecekelane.

¹⁵ Swa Lrivi: Simaia ka lalake ki Hasube, agane ki Azerikame. Ku cucungulaneini yakaiyana ku Hasabia si Buni.

¹⁶ Sabithai si Yuzabade, kai lalasu amani ku mwakalrivili turamuru ka swa Lrivi, tarakadrenge ki ngwalalatadre ki daane ki Twaumase ka awngane.

¹⁷ Matania ka lalake ki Mika, agane ki Zabedi, mwabaibalrithi ki Asape. Kai lasu wasangiluku ki tarasenai ki daane ki Twaumase senai ku sakiaseasenane ka inulri. Bakebukia amani ku taraparalubu ki Matani. Abeda ka lalake ki Samwa, agane ki Galale, ka mwabaibalrithi ki Yedutune.

¹⁸ Ku swa Lrivi ta 284 ku yakaikai Yerusalrime.

¹⁹ Tarakadrenge ki daane ki Twaumase: Akube, Talemune, si ta 172 ku laretesane lini.

²⁰ Ku drumane ku swa Iseraylri si drumane ka barakalai. Swa Lrivi ka yakai Yuda ki drumane ka cekele, ka kipawcungulu lini.

²¹ Ku tarakaungu ki daane ki Twaumase yakai Yerusalrime ka Upile, kwini lalasu yakai kwini kawaungu si kikadrekadrenge ki Ziha si Gisepa.

²² Ku yakai Yerusalrime ka swa Lrivi ku tarakadrenge amani ku agane ki Hasabia, lalake ki Bani ka Uzi. Ku cucungulaneini yakaiyana ku Matania si Mika, swakai ki zuku ki Asape, amani kwidra kiacapili ki ngwakai ki senai ki daane ki Twaumase ka zuku.

²³ Ku talialalai wadrekase si kelrete, pelaela kikai zuku kudra apangimiane mawbalribalrithi sangiluku ki asenadhane ki vaivai.

²⁴ Ku lalake ki Misezabile ka Pithahia swakai ki zuku ki Zera si ricingi ki zuku ki Yuda, kwini lasu ngiatalikaiyane ki swa Iseraylri ikai ki kuni ki Perisia.

Drumane ka cekele ka umawmase

²⁵ Tapangale ku yakai ki ngwadadethe ki cekele ki langangade lini. Ku ricingi ki zuku ki Yuda yakai ku Kiriathe Areba, Dibune si Yekabezile, si ngwadadethe kai ki lacacekele.

²⁶ Kwini lalasu mialri ikai ku yakai Yesua, Mulada, Bithepelete,

²⁷ Hazaresuale, Bereseba si ngiathalringulu ka cacekele.

²⁸ Kwini lalasu yakai cekele Zikelage, ikai Mikuna si ngiathalringulu ka cacekele.

²⁹ Yakai Inerimune, Zura, Yaremuthe,

³⁰ Zanua, Adulame, si ngwadadethe kikai ki lacekele ka lacacekele. Kwini lalasu yakai Lakise si ngwadadethe ki ladaane ka laumawma, Azeka si ngiathalringulu ka lacacekele. Lu elrelreanenga kawriva, kudra mapapangale ki swa Yuda yakai ki kadaengane kabicelrakane ki Bereseba si valrwalru Hinume.

³¹ Ku ricingi ki zuku ki Biniyamingi yakai Geba, Mikemase, Aiya, Bithele si ngiathalringulu ka lacekele.

³² Anatute, Nube, Anania,

³³ Hazure, Rama, Gitaime,

³⁴ Hadide, Zebuime, Nibalate,

³⁵ Lude si Unu, si Taradarepe ka valrwalru.

³⁶ Yakai ku drumane ku yakai ki nakadaengane ki Yuda ka swa Lrivi kiakelrete ku ataelreane ki swa Biniyamingi.