Nihimi 10 - Ngudradreadrekadhane Ka Sisiu 魯凱語聖經

¹ Ku aswalaalanga pacase ku nagane amani ku lalake ki Hakalria ka siwciu ka Nihimi, ala ka Zidikia, ala ka amani kikai lebe ka drumanenga.

^2-8 Barakalai: Seraia, Azaria, Yerimia, Pasehure, Amaria, Malekia, Hatuse, Sebania, Maluke, Harime, Meremuthe, Ubadaiya, Daniele, Ginethune, Baruke, Misulame, Abiya, Miyamine, Mazia, Bilegai si Simaia.

^9-13 Swa Lrivi: Yesua lalake ki Azania, Hinadade ka zuku ki Binui, Kademile, Sebania, Hudia, Kilrita, Pilaia, Hanange, Mika, Rihube, Hasabia, Zakure, Serebia Sebania, Hudia, Bani si Bininu.

^14-27 Tarasangililuku ki mapapangale: Paruse, Pahathe Muabe, Ilame, Zatu, Bani, Buni, Azegade, Bebai, Aduniya, Bigevai, Adingi, Atere, Hezekia, Azure, Hudia, Hasume, Bezai, Haripe, Anatute, Nibai, Magepiase, Misulame, Hizire, Misezabile, Zaduke, Yadua, Pilatia, Hanange, Anaia, Husia, Hanania, Hasube, Haluhise, Pileha, Subike, Rihume, Hasabena, Masia, Ahiya, Hanange, Anane, Maluke, Harime si Baana.

Ku taiyane ki sakiketeketane

²⁸ Kunai ka swa Iseraylri, barakalai, swa Lrivi, tarakadrenge ki daane ki Twaumase, tarasenai ikai ki daane ki Twaumase, tarakaungu ikai ki daane ki Twaumase, si sanaka paluludu ki hulrice ki Twaumase matatwakudhanga nai ki yakai kikai ki kadaengane nai ka maelane ka zuku. Kunai si labaibai nai si pwacacuganenga ka lalake,

²⁹ Yakai nai kikai taelre ki lakiacapili naiane kiketekete, lwiyasi la balre nai kai kiketekete nai, lri kipathavungu nai. Kiaketekete nai ku asingikaiyane ku pangukai ki sasiakawluini ka Musi patarumara kikai hulrice si panianiake cekecekele, lri kilalra nai pasusu ki Tamatama ka Tamatama nai ku baaini naiane ku drekase; lri pasusu nai patuelre ku hulrice si tukakudhaneini.

³⁰ Kai nai lri mathaethareve ki yakai ki kadaengane nai ka maelane ka zuku.

³¹ Lwiyasi la kela ku swakai kwini ku laumawmase la ikai ki Taisadrasadrane ka vai, ki drumane ka mabula ka vai la kela iluku ku lataleke si drumane ku lamanemane kilangai naiane, kai nai lri langai liniane. Sana daruru ki sakapitu ki caili, kai nai lri kaungu ki kadaengane, kai nai lri saladha ku akiame naiane.

³² Ki caicaili, lri tara patarumara nai ka tangeea ku lrima ka kunke ku gingi, paralubu ku saarakaiyane ki daane ki Twaumase.

³³ Lri patarumara nai ku saarakaiyane ki daane ki Twaumase ku pange, lu sukusukubu ki Taleke ka lrisi ki vaivai, ku Lama ka lrisi ka sarakaikaiyane ki vaivai ka nilapulapwane, si mabula ka sapatarumarane ki Taisadrasadrane ka vai, ki dramadramare ki aswalalanga ka vai si drumane ka tatulrisilrisiane ka makaelaela ka alrivilrivi ka sapatarumarane, apasikaiyane mupasalrivane ki swa Iseraylri ka lrisi, si arakaiyane ki daane ki Twaumase sanaka maneemanenga.

³⁴ Kunai ka mapapangale, barakalai si swa Lrivi lri singikai ki takelretane ki hulrice, ki caicaili kuzibiki kudra lri patarumara ku angatu ku zuku, pakai ku alamane kwini nilapulapwane ka sapatarumarane baai ki Tamatama ka Twaumase nai.

³⁵ Ki caicaili, lri malra nai kudra aswalalanga ku nikitalekane si aswala kalreme ku madru ki angatu iluku mwa ki daane ki Tamatama patarumara.

³⁶ Kunai ka tangeea lri singikai nai ki hulrice ku takelretane malra kwini ki takatakanga ka sawvalai ka lalake iluku mwa ki daane ki Twaumase ki barakalai ka marasiakaikai kaungu ki Twaumase, si patarumara ki Twaumase, la mialri malra ku aswalalanga kitulalake ka lrulai ka lwange si nikiubawbalane ka kiu si kakiuane mailuku patarumara ki Twaumase.

³⁷ Ki caicaili, lri malra nai kudra nilrevegane kudra aswalalanga ka lataleke mailuku mwa ki daane ki Twaumase kavai ki barakalai, la mialri malra ku bava, lawlau ki ulrive si makaelaela ka madru ki angatu patarumara. Lri malra nai ku nikitalekane ku ziwbunuici iluku baai ki tara malra ku nipatarumarane ku ziwbunuici ka swa Lrivi.

³⁸ Lu malra ku ziwbunuici, ku lamwabaibalrithi ki Arungu ka labarakalai lri taelre ki swa Lrivi, kwini swa Lrivi ala lri malra ku ziwbunuici kwini ki nipatarumarane ka ziwbunuici, iluku mwa ki taseketane ki daane ki Twaumase, tusarakaiyane ki daane ki Twaumase.

³⁹ Ku mapapangale ki swa Iseraylri si swa Lrivi lalri malra kwini nipatarumarane ka lataleke, bava, lawlau ki ulrive mailuku si pikai ki taseketane ki la takaiyane ki daane ki Twaumase, ka amani kwidra taikaikaiyane ki yacengecenge kipuawawngane ka labarakalai, tarakadrenge ki daane ki Twaumase, si tarasenai ikai ki daane ki Twaumase. Kai nai lri dulru kai marasikai ki daane ki Twaumase nai.