Nihimi 1 - Ngudradreadrekadhane Ka Sisiu 魯凱語聖經

¹ Kikai lebe amani ku tapacasane ku takaungane ki lalake ki Hakalria ka Nihimi. Saka tinuhika ku Aratasirese ki Perisia ki saka taramapusale ka caili ki dramare ki Kiseleve, kunaku ka Nihimi yakaiyaku kacekelane ki Perisia ka Susa.

Makalithi Yerusalrime ku Nihimi

² Ku betakaneli ka Hanani la karedele kwidra ki laumawmase twalai Yuda kela cekele Susa. La kivavagaku liniane kudra ki twalai Babilunia ki taacaicaliane kainganai siwlri ka swa Yuda ka lasakacekele ku tangimiamianenga kavai Yerusalrime.

³ Kwini lalasu la pelaela nakwane: Kwidra laacaicali si panianianiyakeana la siwlri mubalriu ka laumawmase yacengecenge kipadradresenge ku maadrau ku kucingalrane, kiasidrekase ki ngwadadethe ki maelane ka zuku. Kwini lalasu la pelaela nakwane, ku alradre ka kepale Yerusalrime mababurukwana, ku lrawlrawdru ki cekele kaiyana pwadriadringai ku natakilamane.

⁴ Sa kilalraku kilakikai, la neneaku si kipakwalri turamuru alralrese. Watubiaku maka kalrale, kai kane ku akaneane. La inulriaku ki Twaumase iya kai,

⁵ “Tamatama ka yasubelebelenge ka Twaumase, amanisu ku sanianiangenga ka matiukukuludrunga, papiasu ki kialibake muswane si paluludu ku padradrekasesu ka umawmase pangimia ku takiketeketanesu.

⁶ Tamatama, sa kitubitubiaku pasikai ki sasiakawlusu ka kawkawlusu ka swa Iseraylri awngu si taleare. Drelaili, si kilalra kai inulrili! Wathingalaku ka pasalriu nai ka swa Iseraylri; ku cucungulaneli si kunaku makitwa pasalriu nai.

⁷ Waraanau nai aralisiane kieceecebe muswane, kai paluludu ku padradrekasesu, kai wakatheme kudra patarumarasu pangukai ki sasiakawlusu ka Musi si pelaela baai naiane ku hulrice si sabulrwane.

⁸ Kiatubiaku muswane tara pulringava kudra natapelaelanesu ki Musi, ‘Kunumi ka swa Iseraylri alaiyasi lakai numi savaeva ku kidremedreme nakwane, lri malraku numiane pasarau mwa ki drumane ka kuni,

⁹ ai lwiyasi la siwlri numi mwa kai nakwane si paluludu ku drekaseli, lri ililukaku numiane kainganai siwlri; adravane ka kiaravase numi mwa kidruanga kai kawmasane, lri mialriaku sangiluku numiane siwlri mwa kai ki kadaengane ka pilrili ka taikaiyane sukubu.’

¹⁰ “Tamatama, kilakikai yadrepele ka lasasiakawlusu, ka kawkawlusu, ka naamani kudra naarakaisu ku maadrau ka puku palribulu ka laumawmase.

¹¹ Kiatubiaku kilalra kikai inulrili, la kilalra ku inulri ki sanaka mwasakene sukubu muswane ka sasiakawlusu. Kiatubiaku paralubaili kaikameane ku akasulivatane ngiesaesai, lani kakalithi nakwane ku tinuhika.” Sa icengecenge kamani kwidra, amaniaku kudra kiacapili ki taramarasikaikai ku bava ki tinuhika.