Nahumu 1 - Ngudradreadrekadhane Ka Sisiu 魯凱語聖經

¹ Kai bilrilane patharwakai ki swa Ninivi ka vaga, ka drele ki swa Ilekese ka Nahumu ka maburusi.

Ku Tamatama papia ki swa Ninivi kaelaela

² Ku Tamatama kai lri palraingi ku kiaecebe iniane ka Twaumase; ku Tamatama lri bilri, swaete ku elathane. Pathavungu ki kiaecebe iniane ku umawmase; maelathe turamuru papia ki badhaini.

³ Ku Tamatama kai lri kaelaelathe capange, ai maadrau turamuru ku puku; lutumane kai lri tukakadrwa ku pasalrivane ki yakai ku pasalrivane. Ku tadadavacane ki Tamatama, makecenge ku valrigi; ku ememe la athuvugu ki tapudrapalaneini!

⁴ Lu kaelaela ki laveke, kai laveke mameeale; pakameale ki kadravane. Wadulru paaru engele ku kadaengane ki swa Basane, ku lregelrege Karemele abwaburavane, malraici ku bengelrai ki swa Lebanungu.

⁵ Kai lalregelrege yacucubungu ki Tamatama manugiligili; kai lalrelrelrege yacucubungu iniane ngiderenau. Lu adrelane ku Tamatama, ngiavelevele kai kadaengane; kai kawmasane si laumawmaseini makitwa mukuludru.

⁶ Ku Twaumase sana kaelaela, aneane kulri maka dulru udripi? Aneane kulri lreme ku elathaneini? Ku elathaneini mia ki apwi ka mwagugu mulebe; kai alrisapesape yacucubungu iniane katuthiri.

⁷ Tamatama ka mathaithaariringa. Palribulu ki kawkawluini ki yakai ki matikurwane; la sirapale kudra ki la satalu iniane ku umawmase.

⁸ Ku Twaumase mia ki lu telebe, pudriadringai pakamudu ki badhaini; la malra ki kiaecebe iniane si pakatwase pwa ki apacadhane.

⁹ Kunumi anu kibububuli madrekadrekase si baebalre ki Tamatama? Kwi lasu lri pakitulrepenge amudu numiane; kadrwanga ku umawmase kulri dulru pela baebalre iniane.

¹⁰ Mia ki walripalripi ka cecenekane ka angatu si rudarudame ka sangukimugiane, kunumi ka mabusuku lri kilama numi kiutu ki apwi!

¹¹ Swa Ninivi, lri ikai ku twalai muswane kwini ku tangeea ku matavuvulrucu ka umawmase, lri kikake ku akikaruburane ki Tamatama.

¹² Ku Tamatama amia kai ki kawkawluini, “Kai swa Asiria adravane kagarange la takalra, kwi lalasu lri kipakamudu, lri kimwalra. Lakawkawluli, napakwalringa naku numiane, ai kainaku lri pakwalringa numiane.

¹³ Kaiasasane lri palikainga naku ki swa Asiria ku tadredrepetane ruthuku numiane, si ngetele ku kicikici ka sakerengane numiane.”

¹⁴ Kai bilrilane amani ku pelaela ki Tamatama patharukai ki swa Asiria iya kai, “Kwi lalasu kai lri ikainga ku mwabaibalrithi liniane kulri pacungulu ku nagane lini. Lri mwalrathaku ku samiamiange ki tasamiangane lini. Lri pasikaiyaku ki swa Asiria padulru ku tadralredralrekane, kwi lalasu kai swadalepe panianiake!”

¹⁵ Drela, yakai ka umawmase ka ngwalralregelrege kainganai lri pelaela ku matiakiragai ku vaga! Kwi lasu kaiyanganai pelaela ku tengatengane ku rathudane ka matiakiragai ka vaga. Kunumi ka Swa Yuda, pangimia ku tatulrisisisiane numi si kiraragai, la pangibilri patarumara ku ngikakiketekete numi ki Twaumase! Ku manganga ku umawmase lri kai kelakelanga drikisi ki kadaengane numi. Kwi lalasu kiatulreepengenga kimwalra.