Mika 6 - Ngudradreadrekadhane Ka Sisiu 魯凱語聖經

Ku Tamatama wakukusu ki swa Iseraylri

¹ Kunumi kilalra! Ku Tamatama wakukususu ki swa Iseraylri. Tamatama! Ngidrakala si putaluvaivai ku sakukusuanesu, lani kilalalra kai lamadrau ka lregelrege si latikiane ka lregelrege!

² Lalregelrege, palralrawthu ka tangadrane ki kadaengane ka lrenege! Kilalalra ku takukusuane ki Tamatama! Ku Tamatama lri kukusu ki kawkawluini, lri kukusu ki swa Iseraylri.

³ Ku Tamatama amia kikai, “Lakawkawluli yakai ku pasalriuli numiane? Waupungunga naku numiane? Iya pakaelre ku nau iya numi!

⁴ Twaladhaku Izipiti malra iluku numiane, si palribulu numiane patwalai ki taaduriane numi. Siakawlaku ki Musi, Arungu si Miriame ililuku numiane.

⁵ Lakawkawluli, ngulringava sa kisanu tulisi ku talialalai ki swa Muabe ka Balake si tatubalreane iniane ki lalake ki Biure ka Balame; ngulringava ku tangimiane sa ikadalrananeta twalai Sitime mwa Gilegale. Lu ngulrialringau numi kikai patuelre, lri thingale numi ku piali ala ka pakai ku apalribulane numiane.”

Urikai ki Tamatama

⁶ Yakai ku umawmase ku kiavaga, “Lri ilukai naku ku manemane ku saceacebe si kainganai kikawriva ki Tamatama? Lri tungitwatumanai naku kainganai sukubu ki yabelenge ka Twaumase? Lri ilukaku ku mathaithaariringa ku lrulai ku lwange si tu Lama ka lrisi patarumara baai iniane?

⁷ Ku Tamatama lri kadalamaini lu patarumaraku ku wadaruru ki kudrulu kudrai ku sawvalai ku kiu, ka maru vaalrunga kai kadrekadrekare ku lawlau? Lri kiragadhaini lu patarumaraku ku takataakanga ka lalake ka sawvalai tusalangadhane supilri ki pasalrivane?”

⁸ Yakawmasane ka umawmase, ku Tamatama peaelaelaanga mitane lukamanemane ku mathariri. Ku urikaini mitane yai: Apathingalanane ku madringelrese, si pia ku kai maelaela ku sakialibake, la ngitatualebe pasalaladha ki Twaumaseta.

⁹ Ku mwasakene mukuludru ki Tamatama yai malrigili. Ku Tamatama papia ki cekele ki laumawmase iya kai, “Yaelrelre ikai ki cekele ka laumawmase, kilalra!

¹⁰ Ku tacekecekelane ikai ki latavanane ki manganga ka umawmase yai niara lrilrigilane malra. Kwi lalasu arakai ku makakaela ku tintingi si bungubungu, kikai yai kalraseli turamuru.

¹¹ Lri tumanaku pacepe ku arakai ku makakaela ku tintingi si lekete ku umawmase?

¹² Ikai kai ki cekele ku sapaiswane ku umawmase wasulape ki matiakukuru ka umawmase, ku yakai kwini ku laumawmase yadreepele ka taralrilrigili.

¹³ Ngwalai ki tapasalrisalrivane numi, pathagilinga naku lrumai numiane, lai lri kipakilringau numi kadula.

¹⁴ Lri kane numi. Ai kai numi lri kabucuku, lrika takalaipane kwi barange numi. Lri ravase numi ku lamanemane, ai kai numi lri maka ngipapikai; asi lwiyane pangwa ribici numi malra, lri arakaiyaku ku amakakaruburane amudu.

¹⁵ Lri eape numi, ai kai numi lri maka kitaleke; lri pe numi ku ulrive tulawlau, ai lrika kadrwa ku arakaiyane numi; lri tubava numi, ai lri kai numi maka kisupilri.

¹⁶ Twalralrau numi ku takangangane ki talialalai ka Umeri si lalakeini ka Ahabe, si pacungulu ku tarathudane lini ngukunkwane. Lakamani lri paaruturamuraku numiane; ku palrapalra lri tudreadrekase numiane, si tusinalreme numiane.”