Mika 4 - Ngudradreadrekadhane Ka Sisiu 魯凱語聖經

Ku Tamatama magagemegeme ku rathudane kawmasane

¹ Lukabibilrili ka vai, ku taikaiyane ki daane ki Tamatama ku lregelrege lri acegecege ikai belenge ki lalregelrege, lri kipubelenge, si lriibate sanaka lregelrege. Lri takaalra ku laminzuku ku kaiyanganai makanaelre kalrungulrungu;

² sanaka kuni lri irubu si kainganai, si iya kai: Bwala, takarededele mwa ki lregelrege ki Tamatama, si karededele papia ki daane ki Twaumase ki swa Iseraylri. Kwi lasu lri ililuku ku angukaiyaneta ku kadalranane; lri ikaita kai ki kadalranane dadavace. Ku sabulrwane ki Tamatama twalai Yerusalrime kainganai; ku sapelaelaneini ku matiakiragai twalai Ziyungu apadawdaruru.

³ Kwi lasu lri kamani ku twarathudane ku rivwane ki laminzuku, lri apakathaithariri ku tamakalilisiane ki tagagarange ka kuni. Kwi lasu lri malra ku lalrabu si darepe tuawlru ki pavilringi, lai malra ku idiri si darepe tutakawkau. Kai lakuni kai lri ikainga ku makaruruburu, lai kai tukwapinginga si pakikaruburu.

⁴ Ku laumawmase lri ikaainga ki umawma lini ka babududu, lri ikai tailebe ki twaicizike ka angatu, si kisupisupilri ku sulivatane kawmasane; kadrwanga ku umawmase kulri paukuludru liniane. Ku Tamatama ka abebeelengenga ki sanaka kwapingi paiya kikai pukawnu.

⁵ Adravane sukusukubu si pasalalaladha ki twaumase lini sanaka kuni, ai kunai lri sukubu nai ki Tamatama ka Twaumase nai, si pasalalaladha ku takidremedremaneini, pakeela palralrawthu.

Ku swa Iseraylri siaulri mwa ki kuni lini

⁶ Ku Tamatama amia kai, “Pathavungaku ki kawkawluli, ai lu kelanga ku vai, lri malraku sarubu si pataelre kudra wasarau masivagavagainga si kwalrialrialri ku lakawkawluli.

⁷ Lri tusapaivadhaku si lri kamaninga ku ngiaradhekane kudra tedratedrane ku laumawmase, ku twaramuru si saraunga, amaninga ku magarange ka kunu, lri ngikakamaniaku ikai Ziyungu rathudu liniane, twalainga kwini pakela palralrawthu.”

⁸ Swa Yerusalrime, ku Twaumase yakai muswane kwini si mia ki taraagu siraparapale ki kawkawluini; lubibilrili lri siwlriwlrianesu akuni, lri pelanasu kamani ku tangadrane ki kuni ka cekele.

⁹ Asu akwadraunga tubi? Asu mia ki twalalalake ka ababai kiwlulucu ki sakiangeange? Kadrwa ku talialalaisu? Ku takidrekasanesu ku mabelenge ka kwapingi wapacainga makanaelre?

¹⁰ Swa Yerusalrime ka laumawmase! Lri mia numi ki twalalalake ka ababai kiwlulucu ki sakiangeange si tubitubi; asi lwiyane lri katwasenga numi kai ki cekele, si mwa ikai ki ubulane. Lri tara kiraavase numi pwa ka Babilunia; ai ikai kwini, ku Tamatama lri palribulu numiane, lri patwalai ki alrima ki badha malra palribulu numiane.

¹¹ Lri takaalra ku lakuni ku ngiaelre si kikaruburu muswane. Kwi lalasu amia kai, “Bwala takabebetethe Yerusalrime! Lata drele ku atawlrakavane kikai cekele!”

¹² Ai kwi lalasu kai wathingale ku kikake ki Tamatama, la kai thingale ku tasarubwane liniane ki Tamatama ala ka lri pathavungu liniane, mia ki tarakawaungu ka wavelavelate.

¹³ Ku Tamatama amia kai, “Swa Yerusalrime ka umawmase, katwasa! Lu pathavunga ki badha numi! Lri pakagarangaku numiane, mia ki twalawngu ka lwange. Lri utu numi papacai ki takaalra ka kuni, lai malra numi ku arakai lini ku ngikarakacanane ravase ku lawbubulu si patarumara baai nakwane ka magagemegeme kawmasane.”