Mika 3 - Ngudradreadrekadhane Ka Sisiu 魯凱語聖經

Ku Mika maelaela ki tarasangililuku ki swa Iseraylri

¹ Ku amani ka warathudu ki swa Iseraylri, kilalra! Naika amani numi ku marasiakai ki dringelresane,

² ai ngiabaalrelringa numi si kalrase ki ulecegane, la kadalame ki pasalrivane. Wamalra numi ki kawkawluli si papanianianiake kulrangici liniane, la patwalai numi ki culrale lini kubeate.

³ Wakane numi ku beate ki kawkawluli, la kulrangici numi liniane, si cwake pawtatiki ku culrale lini, miakau wagelregelre ku beate si pupalungu malra suliki liniane.

⁴ Lri ikai ku minakavalane, lai lri kitubi numi ki Tamatama, ai kai lri tubalre numiane, lai kai kilalra ku inulri numi, asi lwiyane paiyaiya numi ku ngialisiane ku kakudhane.

⁵ Ku layuginsia pamamama ki kawkawluli. Lu baadhane ku aga, amia kai kwi lalasu, “Masulivaliivatenga kai kawmasane”; ai papia kwini ki la kai kiabaai ku aga, kwi lalasu arakaai ku amakaruruburane kukuludru. Ku Tamatama papia ki miyaiya kilakikai ki yuginsia iya kai,

⁶ “Yuginsia, yalebenga ka vai, lri padaalrunga la ngilribate kwi takatharirane ki vai numi. Watavuvulrucu numi ki kawkawluli, lai kai numi maka drelenga ku maburusi, lai kai numi maka yuginginga.”

⁷ Kwini taraivigi si taratulrisi kithingale ku angimiane lukabibilrili lri ngwalai ku kaika tangimiane ku sakalai lini si ngulringavane, lai ngwalai ku kaika tatubalreane ki Twaumase ku nikitubiane si kiarubwane.

⁸ Pangukai nakwane, ku Ri ki Tamatama si puku tapalra nakwane wabaai nakwane ku dringelresane ku kidremedreme si garangane, ku lrika akaelaelane ku pasalrivane ki swa Iseraylri.

⁹ Ku amani ku warathudu ki swa Iseraylri, kilalra kai aiyaneli! Malrase numi ki dringelresane, si apabaebalre ki pacengecenge si kai pacengecenge.

¹⁰ Kwi cekele ki Twaumase ka Yerusalrime pacegecege numi tutangadrane pikai ki erai si kaika niaparamaramavane.

¹¹ Ku tabebelenge ki cekele amani ku pavangalre ku kauawngu, ku barakalai amani ki hukiu ku pelaelaela swacenge ki hulrice, ku yuginsia amani ki paisu ku pelaelaela lini ku angimiane lukabibilrili. Adravane ka ngimiyaiya kikai, kwi lalasu tasatalwane nai ki Tamatama amiamiyana. Kwi lalasu amia kai, “Ku Tamatama tapalra naiane, kai nai lri kidaruru ku amatikurwane.”

¹² Lakamani, ngwalai numiane, ku lregelrege Ziyungu lri mia ki umawma ka kiatatukununga; ku cekele Yerusalrime lri atawlrakavane; ku taikaiyane ki daane ki Twaumase ka lrelrelrege lri aubulane ka mawangatungatunga.