Mika 2 - Ngudradreadrekadhane Ka Sisiu 魯凱語聖經

Ku angimiane ki wavutha malra ku palrapalrane

¹ Ala matiangeange, kudra la wataleare kai apeapece si madrekadrekadrekase ku akangangane ku umawmase! Sana kaliare, kwi lalasu lri makakai pia ku tapia iya lini kudra ngialisiane ku awngane.

² Kwi lalasu marau ku angangade, lri malra ravase; sana lri malra ku daane, lai lri mwa ravase. Kadrua ku natangeeanga ku umawmase ku daane maswalreke ku tacekecekelaneini.

³ Lakamani, ku Tamatama amia kikai: Wakikakenga naku lri pulebeaku ku amatikurwane pakakai ki kinawmasane lini; lai kai numi dulru mubere, lri kai numi maka tangeraranenga si dringelresane kwi tuku numi dadavace, asi lwiyane amaninga kikai ku akipakwalriane numi.

⁴ Lukamaninga kwidra ku palrapalra lri tusenai dradrarane, si arakai ku tangilribatane numi kwalri ku kidremedreme si tusenai ku sasilringavane. Kwi lalasu amia kai: Masuburunga kai tacekecekelaneta! Ku Tamatama wamalranga iluku ku taleketa, la malra ku umawma si baai ki waravase mitane.

⁵ Lakamani, ku kawkawlu ki Tamatama lu sawlringa ku kadaengane, ku aneaneane lri kakadruanga ku drulru numi.

⁶ Ku mapapangale la akulalisi akwadrau iya kai nakwane, “Madha papia naiane bulru! Madha pelaela ku kaika akasulivatane! Ku Twaumase kai lri pangulringavane naiane!

⁷ Bekace kipusu ku swa Iseraylri? Ku Tamatama maupungana? Tengane kalri pia kikai miyaiya kai? Kwi lasu bekace kai maka iya ku thalradhane ku vaga?”

⁸ Ku Tamatama la iya kai tubalre, “Mia numi ki baadha ku takikaruburane numi ki kawkawluli. Ku kwapingi sa twalai ki takikaruburane si mutavanane, alau lri sutelraingata ikai kwini amia; ala ka yakaai numi kwini ukalavalava, si singi lrilrikudru kupa ku sapakabelengane ku laimai lini.

⁹ La pakatwase numi ki laababai ki kawkawluli patwalai ki kadalame lini ka daane, la pakisaalrunga numi ribici ku baaili ki lalalake lini ku akaesadhane.

¹⁰ Ngidrakala! Si mubere! Kikai kaika akaswalrekanenga ikai cekecekele kiragai kaungu! Kwi pasalrivane numi wadawlu ku akamudane ki swakai kikai.

¹¹ “Alaiyasi ikai ku wamwa kidruanga tavuvulrucu iya kai, ‘Lri sakaladhaku kawriva numiane lri ikai ku kaika amakaelemane numi ungulu ku malrupi ka bava si makecenge ka bava’. Kwi lasu lrika amani ku akadalamane ki laumawmase ka yuginsia.

¹² “Kudra abalu ka laumawmase ki swa Iseraylri, lri sarubwaku si pataelre numiane; lri sarubwaku numiane, mia ki taraagu ki kiu ka waililuku ki lakiu si pwa ki takivane. Kwi kadaengane numi lri pelane ngiradhekane ku laumawmase, mia ki tapagwaguane kakalra turamuru ku kiu.”

¹³ Ku Twaumase lri pasikai liniane sudalrane, si iluku liniane katwase kwini taikaiyane acaicali. Kwi lalasu lri panguciuru katwase mulatadre ki lrawlrawdru cekele, si tupela malra ku angilralraingane. Ku talialalai lini, amani kai Tamatama, lri ngikakamaani sangiluku liniane.