Mika 1 - Ngudradreadrekadhane Ka Sisiu 魯凱語聖經

¹ Ku talialalai ka Yuthame, Ahaze, si Hezekia sa icengecenge macucungulu kamani ku warathudu ki swa Yuda, ku Tamatama pathingale ki swa Murisethe ka Mika ku ngwakai ki swa Samaria si swa Yerusalrime. Kai lebenga kai nipacasane yai takawrivane ki Tamatama papia ki Mika.

Sialringau ki Samaria si Yerusalrime

² Lakuni, kilalra! Yakawmasane ka umawmase, kicacaligira kilalalra! Ku abebeelengenga ka Tamatama lri kukusu numiane; ku Tamatama lri twalai ki daane ka belenge siwmi.

³ Drela! Ku Tamatama mwalatadre ki daaneini; lri mulebe mwa kai kawmasane, si dredre ki abelenge ka lregelrege.

⁴ Ku lalregelrege lri ngutatukadre ku takidredreane, mia ki rusuku ka kiaderenau ki apwi, ku lalrenege lri uthulungu mwa ki valrwalru, mia ki lriau ka acilai ka walriau mwa ki vaalru.

⁵ Kilakikai lri tara ngimiya, asi lwiyane kai swa Iseraylri wabaebalrenga si katwase ki Twaumase, pasalriwnga iniane. Aneane kulri pasikai ku tabaebalreane ki swa Iseraylri si kipathavungu? Nai kamani kai tangadrane ki kuni ka cekele Samaria ku siamece! Aneane kulri tukudru ku pasalrivane ku tasukubane ki swa Yuda ki samiamiange? Nai kamani kai tangadrane ki kuni ka cekele Yerusalrime ku siamece!

⁶ Lakamani ku iya kai ki Tamatama, “Lri paakinaburukanaku ki Samaria, lrika amaninga ku alredrekane ku budu. Lri lrudrulaku ku balingibingi ki kepale ki cekeleini pwa valrwalru, si putaluvaivai ku karwalaini.

⁷ Ku yakai kai ki cekele ku samiamiange patuelre lri kitatithiri, kudra apairairangeini si satacekecekelane lri kilama patuelre; lri paacinilrianaku ki lasamiamiange patuelre. Kai Samaria mia ki pairairange wasarubu kilakikai samiamiange si arakai paedhale ku latwaumase, ki lakikwini lri kiribici ki badha, si lri iluku mwa ki talidrumane si kisukusukubu ki pairairange ki swakai kwini.”

⁸ Ku Mika ala iya kikai, “Lri pasikaiyaku kikai kwalri tubi; lri vilralrakanaku si hadasi, la katwase dadavace mwa kidruanga. Lri miaku ki tawpungu ubulane tubitubi aleale, si la mia ki tuniau tubitubi karariau.

⁹ Ku dula ki swa Samaria kai lri maka dulru sulrau pawdringai; ku takadulane ki swa Yuda lai lri kai maka dulru udringai. Ku amatikurwane lri daruru ki lrawlrawdru ki cekele Yerusalrime kabebetethe, lai padethenga ki cekele ki lasakacekeleli.”

Ku badha wadethenga Yerusalrime

¹⁰ Madha ikaikai Gathe pelaela amakinga nai iya; madha padredrele ku lrese numi ki badha. Laumawmase ki swa Bithe Liapera, tubia kiangeange si ngisaisalriti ikai ki dae si thuvugu!

¹¹ Laumawmase ki swa Sapire, lri kitusinalreme numi, si vilralrakane, la katwase acaicali mwa ki maelane ka kuni! Ku laumawmase ki swa Zanange kadrwa kulri maka udripi. Lu kilalra numi ku tubi ki swa Bithizile, thingala ala ka kadrwa ku tamwane mubere.

¹² Ku umawmase ki swa Maruthe kiapakwalri turamuru, mwarikaai ku asarangilribatane, asi lwiyane ku Tamatama wamalranga iluku kwini amatikurwane mwa ki lrawlrawdru ki cekele Yerusalrime!

¹³ Laumawmase ki swa Lakise, kunumi kwini sakikaruburane ka palridingi paulrunga ki sakikaruburane ka rigi, padulru ku amuberane! Asi lwiyane twalralrau numi ku tapasalrivane ki swa Iseraylri, la pakagarange numi papasalriu ki swa Yerusalrime.

¹⁴ Lakamani, swa Yuda, kipusawa ki cekele ka swa Murisithe Gathe. Ku latalialalai ki swa Iseraylri lutumane kai lri maka kiparalubu ki swa Akezibe.

¹⁵ Laumawmase ki swa Maresa, ku Tamatama lri malra numiane si baai ki badha; kwi lalasu lri kikaruburu si malra kwi cekele numi. Ku latabebelenge ka sanaganane ki swa Iseraylri lri mubere mwa ki libi kavai Adulame.

¹⁶ Swa Yuda, kirita kwi awlru, la tubi pasikai ki kadalame numi ka lalalake; kirita paelelethe mia ki mapuluku ka kwau, asi lwiyane kwi lalasu lri kiravase pwa ki maelane ka kuni.