Matai 9 - Ngudradreadrekadhane Ka Sisiu 魯凱語聖經

Ku Yesu pawadringai ki malrunai kacaeme

¹ Mwabelenge ki varukuru ku Yesu, si talubalre ki baiyu, siaulri mwa ki cekeleini.

² Yakai ku laumawmase ku wakela mabulribulri ki waapece ikai ki tapeapecane ku tangea ka malrunai kacaeme si kela mucucubungu iniane. Ku Yesu la drele kudra salrwane lini, la iya kai kwini ki malrunai kacaeme, “Lalake, kai lri katumane, kwi pasalrivanesu kiapacepenga!”

³ Yakai ku tapiya ku tarabulrubulru ki Sisiu la pikidremedreme iyaiya kikai, “Kikai umawmase pwavaga ku ngikarakacanane ku vaga!”

⁴ Ku Yesu la thingale lukamanemane ku kidredredreme lini, la kivaga iya kai, “Kunumi anu pikai kwi ngialisiane ku takidremedremane?

⁵ Saininu ku madwadwai lu kawrivane kwini ki umawmase pelaela, ‘Kiapacepenga kwi pasalrivanesu’ si ku ‘Ngidrakala dadavace’ iya?

⁶ Lri padredrelaku numiane, ikai kai kawmasane ala ka yakai ku puku pacepe ki pasalrivane ku Lalake ki Umawmase.” La kirimu iya kai kwini ki malrunai kacaeme, “Ngidrakala, la malra kwi tapeapecanesu, si katwase mutavanane!”

⁷ Kwini umawmase la kirimu ngidrakale si katwase mutavanane.

⁸ Ku wadrele ku umawmase la mukuludru makanaelre; kwini lalasu la drengedrengere ki Twaumase, asi lwiyane ku Twaumase wabaai ki umawmase kudra miyaiya kai ku puku.

Ku Matai kiadawlu

⁹ Ku Yesu sa katwase kwini arwacucubungwana dadavace, la drele ku tangea ka taramalramalra ku kazilu, ka sia Matai, wanene ikai ki takikaziluzilwane. Ku Yesu la iya kai iniane, “Bwala tupapalraili!” Ku Matai la ngidrakale si tupapalranga ki Yesu.

¹⁰ Ku Yesu sa kanekane ku aga ikai ki tai Matai kwidra, takaalra ku tarakikaziluzilu si latangangangace ka umawmase ku mialri kainganai; kwini lalasu la taelre ki Yesu si lasituini kanekane.

¹¹ La ikai ku la swa Palrisai ku wadrele, la iya kai ki situ ki Yesu, “Kwi sinsi numi ani taelre ki latarakikaziluzilu si latangangangace ka umawmase kanekane?”

¹² Sa kilalra ku Yesu la iya kai, “Ku mwadringadringai ku umawmase kai lri murikai ki tarasulrasulrau, luka yakaai ku caemane lri murikaai.

¹³ Ku takawrivane ki Sisiu amia kai, ‘Ku urikaili yai kalithane, kaika sapatarumarane ka waudriwdripi.’ Kunumi lu katwasa kinkiu ku pacugane kikai vaga! Asi lwiyane ku takelaneli ku pacugane kainaku papia ku adawlane ki makalecege ka umawmase, amani ki manganga ka umawmase.”

Patharukai ki walaisi

¹⁴ Yakai saka kiningivalane, kwidra lasitu ki tarapabanau ka Yuhani la kela kivaga ki Yesu iya kai, “Kunai si la swa Palrisai anai lailaisi, la kai lailaisi kai lasitusu, ngiatumane?”

¹⁵ Ku Yesu la tubalre, “Kudra marudrarudrange ku sawvalai lu ikaiyana ki ngiakanekaneane, kwidra badhabadha lri tubi? Kai watubitubi. Ai lri kela kwini vai, kwini marudrarudrange ka sawvalai lri kiiluku, lu kamaninga kwini kwi lalasu ala lri makitu laisinga.

¹⁶ “Kadrwa ku umawmase ku arakai ku bavane ku makalrilau si cakupu ki supilringa ka laimai, asi lwiyane kudra tacakupane ka bavane lri pakapurici ki supilri ka laimai, lai aru kadrau ku takapuricane.

¹⁷ Laka kadrwa ku umawmase ku wamalra ku bavane ka bava si pasaela pwa ki supilri ka lrangici ka tabavane. Lu pia kikai, kwini tabavane ka lrangici lri kabulrutu, ku bava lai lri mucale, adravane kwini tabavane ka lrangici lai kalisi. Wamalra madu ku bavane ku bava pasaela pwa ki bavane ka lrangici ka tabavane; ala lri tara kathaariri kwini drusa.”

Lalake ka ababai ki mabelenge ki tarakadrekadrenge ki rarubwane ki swa Yuda si macaeme sieraeraerai ka ababai

¹⁸ Ku Yesu sa icengecenge kawrivariva ki situ ki Yuhani kilakikai vaga, yakai kudra tangea ku mabelenge ki tarakadrekadrenge ki rarubwane ki swa Yuda kaiyanganai kikawriva iniane, si ikai cucubungu ki Yesu pidruru, la iya kai, “Tawpacapacai ku lalakeli ka ababai, kiatubiaku muswane bwala pasikaiya iniane ansu, lani siela panianiake.”

¹⁹ La ngidrakale ku Yesu, si katwase tupapalra iniane; ku lasitu ki Yesu la mialri katwase tupapalra.

²⁰ Yakai ku tangea ku ababai ku tara 12 ka caili kipucaemane ki siaerai; kwi alisu la katwase mulrilrikudru ki Yesu, si sulrape pababiabila ki sapakabelebelengane ki laimai ki Yesu.

²¹ Kwi alisu la pikidremedreme iya kai, “Sana ecengaku tababiabila ki laimaini, lri tara mudriingadhaku.”

²² La ngibangulu ku Yesu, si drele kwini ki alisu la iya kai iniane, “Lalake, kai lri katumane, kwini salrwanesu palribulunga muswane!” Ikai kwini, kwini caemane ki ababai la udriingainga.

²³ Ku Yesu la kela ki daane ki mabelenge, la drele ki tarasateateatedre ki tarangirapapa si tarabangebangebange si la maralealeale ka laumawmase,

²⁴ la iya kai liniane, “Kunumi lu mulatadra, kikai lalake ka ababai kai wapacai, masipelrenge!” Ku laumawmase la makitu ulralrakai iniane.

²⁵ Kikai laumawmase sa kipakatwasenga, ku Yesu la mudaane mwa ki tapeapecane kwini ki lalake ka ababai, si alra bilibili ki alrimaini, kwi alisu la ngidrakale.

²⁶ Kikai tapiane kai ki Yesu la salraelre kimapelaela italikaiyane kwini.

Pawadringai ki tadrusa ka mamukici

²⁷ Ku Yesu la katwase ki kwini, si dadavace papucucubungu. Yakai ku tadrusa ku mamukici ku twapapalra iniane, si tawtau iya kai, “Lalake ki Davidi, kakuruua naiane!”

²⁸ Ku Yesu sa mudaanenga ki daane, kwini tadrusa ka mamukici la kainganai mucucubungu iniane, kai Yesu la kivaga liniane iya kai, “Masalru numi ka lri dulrwaku pawdringai numiane?” Kwi lalasu la iya kai tubalre, “Tamatama, masalru nai.”

²⁹ Ngwalai kikai, Ku Yesu la sulrape ki maca lini, si iya kai, “Singikai ki salrwane numi pakitulrepenge numiane!”

³⁰ Kudra maca lini la drelenga. Ku Yesu la pudriadriingai pelaela liniane iya kai, “Kikai madha pelaelaela ki sanaka umawmasenga!”

³¹ Ai, kwi lalasu sa katwase makakai peaelaela pasalraelre talikaiyane kwini.

Pawadringai ki mamenene

³² Kwi lalasu sa katwatwase, yakai ku tangea ku mailuku mucucubungu ki Yesu ku kiaikai ki aidridringane ka mamenene.

³³ Ku aidridringane sa kipakatwase, kwini umawmase la avavaga kawriva. La kasamali makanaelre, si iya kai, “Ikai Iseraylri, kaita wadreleana ku miyaiya kai.”

³⁴ Ai, ku swa Palrisai amia kai, “Kwi lasu satalu ki talialalai ki aidridringane si pakatwase ki aidridringane.”

Kilibakane ki Yesu ki laumawmase

³⁵ Ku Yesu la dadavace salraelre ki sanaka ceekele, si ikai ki lararubwane ki swa Yuda bulrubulru ki laumawmase, pelaelaela ku hukuingi ki kuni belenge, la pawdringadringai ki sanaka caemane.

³⁶ Kwi lasu sa drele ku twaredededele ku laumawmase, kiriimu kainganai ku kalithane ki kidremedreme; asi lwiyane kwini lalasu kwalrialrialri ka kadrwa ku paralubu liniane, mia kudra ki kadrwa ku taraagwagu ka lakiu.

³⁷ Lakamani, ku Yesu la kawriva ki lasituini, “Makalra kai akitalekane, ai tabekele ku lri kitaleke tarakaungu ku umawmase.

³⁸ Kunumi la kitubia ki Tamatama ki umawma, ani pakainganai ku tarakawaungu ka umawmase kela kitaleke kai talekeini.”