Matai 6 - Ngudradreadrekadhane Ka Sisiu 魯凱語聖經

Matiakai ki pakubulu

¹ “Kunumi yai dradreela, madha ikaikai cucubungu ki palrapalra ngilralrigu ku kisamulane ku takisuswanesu, si raanau padredrele ki palrapalra. Lu pia numi kikai, lri kai numi maka dulrunga patwalai ki Tamaita ka yasubelebelenge malra ku pakalreva.

² “Lu pakubulusu, madha pasasarau kawriva, mia kudra tapiapiaane ki ngiakathaithariri ka umawmase lu ikai rarubwane ki swa Yuda si kadalranane ki cekele, pakai ku akilrigwane ki palrapalra. Nau pelaela numiane, lu pia kikai kwi lalasu wamalranga ku naika akipangibilriane lini.

³ Lu pakubulusu, madha pathingathingale ki viri ku tapiane ki vanale,

⁴ kikai yai naika taingeane ka kaika apathingalane ka awngane. Lukamiyaiya kikai, kudra wadrele ku kaika nipathingalane ku takaunganesu ka Tamaita ka yasubelebelenge lri tara pakalreva muswane.”

Matiakai ki inulri

⁵ “Lu inulri numi, madha ngialralrau kudra ki ngiakathaithariri ka umawmase, madalame ikai rarubwane ki swa Yuda si tamakakalrivathanane ka kadalranane acegecege si inulri, waraanau padredrele ki palrapalra. Nau pelaela numiane, kwi lalasu lu pia kikai wamalraanga ku naika akipakalrevane lini.

⁶ Lu inulrisu mudaana ki daanesu, la elebe ku lrawlrawdru, si ikai ki paidridringane papia ki Tamaita ka yasubelebelenge inulri. Kudra wadrele ku kaika nipathingalane ku takaunganesu ka Tamaita ka yasubelebelenge lri tara pakalreva muswane.

⁷ “Lu inulri numi, madha ngialralralrau kudra ki maelane ku takisuswane, arakai ku makaalra apatupelaela, ka kadrwa ku pacucugane ka vaga. Kwi lalasu lu kidremedreme sana sasaiyaiyane si tulragi, lri kilaalra ku Twaumase amia.

⁸ Madha ngialralralrau liniane. Lu kai numi kitubiana, ku Tama numi ka yasubelebelenge wathingaleenga ku murikai numi.

⁹ Lakamani, lu inulri numi amia madu kai: Kusu ka Tama nai ka yasubelebelenge: Sanaka umawmase ani musakene ki saniange ka naganesu;

¹⁰ asu kamani ka magagemegeme ikai kawmasane; ani ngimia utaluvaivai ku takidremedremanesu ikai kai kawmasane, mia ku tautaluvaivadhane ikai subelebelenge.

¹¹ Patarumara naiane ku akaneane nai kaikameane.

¹² Pacepa ku tapasalrivane nai muswane, mia lu pacepe nai ku pasalriu naiane ku umawmase.

¹³ Madha pakipadradresedresenge naiane ku kai ka amalralremeane nai siamece ku akikituthiathingalane; la palribula naiane pakidaili ki alrima kudra ki ngialisiane.

¹⁴ Alaiyasi pacepe numi ku tapasalrivane ki palrapalra, ku Tama numi ka yasubelebelenge lri mialri pacepe numiane;

¹⁵ Alaiyasi kai numi pacepe ku tapasalrivane ki palrapalra, ku Tama numi ka yasubelebelenge lri mialri kai pacepe ku tapasalrivane numi.”

Matiakai ki walaisi

¹⁶ “Lu laisi numi, madha ngialralrau kudra ki tarangikathaithaitharirane ka umawmase; waraanau ngimia ki kwaalri, angeelrece ku lringau, ku lrika adrelane si thingale ku palrapalra ala ka walailaisi. Nau pelaela numiane, kwi lalasu lu pia kikai wamalraanga ku naika akipakalrevane lini.

¹⁷ Lu laisisu, tawamaca madu si ngigagarucu,

¹⁸ madha pathingathingale ki palrapalra ala ka walailaisisu, ani kakathane kudra yakapaidridringane ka Tamaita ka yasubelebelenge ku wathingale. Kudra wadrele ku kaika nipathingalane ku takaunganesu ka Tamaita ka yasubelebelenge lri tara pakalreva muswane.”

Matiakai ki tacekecekelane subelebelenge

¹⁹ “Madha ngipapasikaikai rubu ku tacekecekelane ikai kai kawmasane, asi lwiyane yakai ku lubalubai ku lri kane, lai lri kadilange, la lri ikaiyana ku tarakupawpa kulri lutu ki lrawlrawdru si mudaane kupa.

²⁰ Ngipapasikaiya rubu ku tacekecekelane pikai subelebelenge; Ikai kwini kadrwa ku lubalubai ku lri kane, lai kai lri kadilange, la ka kadrwa ku tarakupawpa kulri mudaane si kupa.

²¹ Lu ikainu ku tacekecekelanesu, lri ikaai kwini ku kidremedremesu.”

Ledra ki kinawmasane

²² “Kai maca maru tinakinga ki kinawmasane. Alaiyasi kathariri ku macasu, lri leedra patueelre ku kinawmasanesu;

²³ alaiyasi kalisi kwi macasu, lri kadradrimiti patueelre kwi kinawmasanesu. La ka thadaalrane, alaiyasi kwini yadringi muswane kwi ledra la akabalrithi kadradrimiti, kwini dradrimitane lri matiukuludru turamuru!”

Twaumase si tacekecekelane

²⁴ “Kadrua ku umawmase kulri dulru pasikai ki tadrusa ku tawki. Lu kai kalrase kikai, lri kadaalame kikwini, lai lri tukucingalre kikai, si sidrekase kikwini. Kunumi kai numi lri maka dulrulriinga apasilange asasiakawlu ki Twaumase, la aduri ki paisu.

²⁵ “Lakamani nau pelaela numiane, madha ngwalalai ki sapanianiakane ku akaneane, ku asilaimadhane si kidremedreme turamuru. Bekace kai akaneane ka makuciacingalre ki niake? Si kai laimai ka makuciacingalre ki kinawmasane?

²⁶ Kunumi drela ki ngiapapapalai ki adhadhame: Kai walredrelredreke kai kiataletaleke, la kai sekesekete ku taleke pudrawsulane, ku Tama numi ka yasubelebelenge la lapulaapwana liniane! Kunumi kai numi ka silrialribate ki adhadhame ku kucingalrane?

²⁷ Ikai numiane laka aneane ku wadulru ngukai ki thekelrane si drimana panianiake ku minakapialane?

²⁸ “Asingithaanga kakalithi ngukai ki laimai? Drela ki yaubulane ka bariangalai lu pangitumane kaadrau! Kai mawaungu la kai tulaimaimai;

²⁹ ai nau pelaela numiane, adravane ka miyaiya ki Sulumungu ka talialalai ku matidalamane ku lrigu ku tharirane, kudra laimaini kai maka kiaramawana kudra ki vaeva ka yaubulane ka bengelrai.

³⁰ Kai yaubulane ka bengelrai si ubulu mwataluvaivai lukamialrealre, lukakaiyane la kalraici, si kiputalabwane lama, ai ku Twaumase la piana kikai pangiragelane liniane, ku Twaumase kai lrika mababaai numiane ku laimai kamani? Kwi salrwane numi ala tikithane turamuru!

³¹ Lakamani, madha kidremedremedreme lukamanemane ku akaneane, ku awngulane, si ku asimadhane si kawpungu ku kidremedreme;

³² kilakikai yai, kisilasilape kudra ki kai masalru ka umawmase. Ku Tama numi ka yasubelebelenge wathingale patuelre ku murikaikai numi.

³³ Kunumi paswala kipasilape ku angimiane ku puku ki Twaumase, si paluludu ku takidremedremaneini, lri baai numiane kikai patueelre.

³⁴ Ngwalai kikai, kunumi madha ngwalalai kudra ki kaiyanane si kathekelre, lukakaiyaiya yakaai ku akathekelrane; ku akwalriane ki vaivai siameeca ivaivai sikakathane makakeelrete.”