Matai 5 - Ngudradreadrekadhane Ka Sisiu 魯凱語聖經

Bulru ki Yesu ikai lregelrege

¹ Ku Yesu wadrele kudra ki takaalra ka laumawmase, la katwase mulregelrege; la nene, ku lasituini la ngithalringulu iniane.

² Ku Yesu la pathagili bulru liniane.

Matiakai ki akaesadhane

³ Ku ngiathathingale ala ka matiakuru ku abakeini ku umawmase ala mwaesai turamuru; amani lini kudra kawkawlu ki kuni ka subelebelenge!

⁴ Ku watubitubi tungawngau ki pasalrivane ku umawmase mwaesai turamuru; ku Twaumase lri saasa liniane!

⁵ Ku ngiatatwalebe si kasulrapele ku kidremedreme mwaesai turamuru; lri tarumara ku pinalraingane ki Twaumase ku tacekecekelane!

⁶ Ku akuli sidrama pangimia ku kidremedreme ki Twaumase ku umawmase ala mwaesai turamuru; ku Twaumase lri pangulwadhanenga liniane!

⁷ Ku mathalrai kilibake ki umawmase ku umawmase ala mwaesai turamuru; ku Twaumase lri pangimiya kathalrai kilibake liniane!

⁸ Ku alrivilrivi kabula ku kidremedreme ku umawmase mwaesai turamuru; kwini lalasu lri drele ki Twaumase!

⁹ Ku kiasamula pakarawrathudu ki umawmase ku umawmase mwaesai turamuru; ku Twaumase lalalakeli lri iya liniane!

¹⁰ Ku pangiamia ku takidremedremane ki Twaumase si ki hakegai ku umawmase mwaesai turamuru; amaninga kudra kawkawlu ki kuni ka subelebelenge!

¹¹ “Lu ngwalai numi ku tatupapalrane nakwane si tusinalrelreme numiane ku palrapalra, la hakegai numiane, la kikawriariva ku ngialisiane ku vaga tupasalrivane numiane, kunumi lri muesai numi turamuru.

¹² Kiraragadha kapeaperau, asi lwiyane ikai belenge yakai ku thathatha ku pakalreva ku nipasikaiyane numiane pudringai; kunadruma ku layuginsia mialri kihakegai ki umawmase.”

Timu si ledra

¹³ “Kunumi amani numi ku timu ki laumawmase. Kai timu alaiyasi ngwalrane ku tasangutimwane, kaidu lri dulrunga peela pasangutimu. Kadrwanga ku paluludane, ka acilrianenga sikakathane, lalri kidredredre ki umawmase.

¹⁴ “Kunumi yai ledra numi ki yakawmasane. Ku nitucekelane pikai lregelrege kaika amaka dulrwane pakibalai paidringi.

¹⁵ Kadrwa ku umawmase ku padalai ku tinaki si la maalralringa pwadringi ki balrungubungu, lri tara malra si pikai ki tatinakiane, ala paledra ki lawacekecekele makanaelre.

¹⁶ Laka thadaalrane, kudra ledra numi mialria paledra pikai cucubungu ki umawmase, lani drele ku mathariri ku kakwakudhane numi, si drengedrengere ki Tama numi ka yabelenge.”

Matiakai ki hulrice

¹⁷ “Madha iyaiya kai, kai kelali lri supilri si mwalra ku Hulrice ki Musi si sabulrwane ki layuginsia. Kainaku ka wakela supilri si mwalra, wakelaku pangimia pakitulrepenge kudra takapatengatenganane ku pacugane.

¹⁸ Nau tukapatengatengane pelaela numiane, sana ikaiyana kai kawmasane, kai pacase ki hulrice adravane ka tikiyane kaika apikakwakwane supilri suburu, pakeela ku tatulrepengane sanaka maneemane kawmasane.

¹⁹ Lakamani, kudra pasalriu ki padradrekase adravane ka titikiyanenga ka sivavaale, si la bulrwana ki palrapalra pia kai iya, ikai kuni subelebelenge lrika amani ku kiatutitikiyanenga. Ai, kudra paluludu ki hulrice, si la bulrwana ki palrapalra papaluludu, ikai ki kuni subelebelenge lrika amani ku kiatusanianiyangenga.

²⁰ Lakamani, nau pelaela numiane, kunumi tara kamakadrwadrwa ki latarabulrubulru ki Sisiu ki la swa Palrisai ka umawmase pasingikidremedreme kisamula pangimia ku takidremedremane ki Twaumase lri duulru numi mudaane ki kuni subelebelenge.”

Matiakai ki lisiane

²¹ “Kialalranga numi, ku sidrwadrumane ka umawmase ku takipakaicilrane, ‘Madha papacapacai ki umawmase, ku papacai ki umawmase lri kitupasalrivane ki hulrice.’

²² Ai nau pudriadriingai pelaela numiane, ku akwalisi ki retesaneini, lri kisaibange. Ku maelaela ki retesaneini ‘Salrikathanesu’ iya, lri kiluku mwa ki tasaibaibangane; ku maelaela ‘Kulruduthu’ iya ki retesane, lri kai maka ubere ku sapathavungane ki apwi ki swadriadringi.

²³ Ngwalai kikai, lu ikaisu cucubungu ki tapatarumaramarane si lri patarumarasu ki Twaumase, alaiyasi ngulringawsu lu ikai ku retesanesu ku malisilisi muswane,

²⁴ kwini sapatarumaranesu sarara picucubungu ki tapatarumaramarane, la makakaai katwase makakathariri iniane, ala kainganai siwlri si malra kwini sapatarumarane si patarumara ki Twaumase.

²⁵ “Alaiyasi ikai ku umawmase ku lri kukusu muswane, si malra bilibili muswane mwa ki takisaibaibangane, sakaiyana mucucubungu ki takisaibaibangane, paswalana kikadalru iniane. Lu kai mia kwini, lu mwanga ki takisaibaibangane, lri malra muswane baai ki tarasaibaibange, ku tarasaibaibange lai lri malra muswane baai ki kisace, si emenge putaememengane.

²⁶ Nau pelaela muswane, lri kiemengesu, pakeela kudra tapawkesaanesu baai ku sathavungane ka bibiilrilinga ka bababa ka paisu.”

Matiakai ki swadringai

²⁷ “Kialalranga numi ku miyaiya kai ku sabulrwane kunadruma, ‘Madha pasudringai, madha sudringai.’

²⁸ Ai nau pelaela numiane, ku wadrele ki labaibai si ngilisiane ku takidremedremane, ikai ki kidremedreme paswadringainga kwini ki alisu.

²⁹ Alaiyasi kwini vanale ka macasu la papasalriu muswane, malra batwathe mwalra, si cilri! Adravane ka thithili ku macasu mathaithaaririana paraamuru kudra ki lri makanaelre ku kinawmasane muswadriadringi.

³⁰ Alaiyasi papasalriu muswane kwi vanale ka alrimasu, malra ngetele, si cilri! Adravane ka thithili ku alrimasu, mathaithaaririana paraamuru kudra ki lri makanaelre ku kinawmasane muswadriadringi.”

Matiakai ki piasadra ki taelrelre

³¹ “La ikaainga kudra miyaiya kai ku sabulrwane, amia kai, ‘Sanaka lri pisadra si cilri ki taelrelre, lri tara paacase ku samakakatwasane si baai kwini ki alisu.’

³² Ai nau pelaela numiane, kathane luka kai ngwakai ki padralra ku taelrelre, ku taelrelre ka sawvalai kai lri maka pakatwase kwini ki alisu. Asi lwiyane, alaiyasi kwini taelrelre ka ababai lu peelana karudrange, kwi lasu lrika papasalriu kwini ki taelrelreini sudringai; si kudra sawvalai ku wamalra sitaelrelre kwini ki alisu lai mialri ka pasalriu pasudringai.”

Matiakai ki kiaketekete

³³ “La kilaalranga numi ku sabulrwane kunadruma ku amia kai, ‘Madha baebalre ku nikiketeketanenga; ku nikiketeketane icucubungu ki Tamatama tara pangiamiya madu.’

³⁴ Ai nau pelaela numiane, lri kai numi maka kiketekete. Madha papiapia belenge si kiketekete, asi lwiyane kai belenge taetalane ki Twaumase;

³⁵ madha papiapia ki kadaengane kiketekete, asi lwiyane kai kadaengane yai drapale ki taetalane ki Twaumase; la madha papiapia Yerusalrime kiketekete, asi lwiyane amani ku cekele ki maadrau ka talialalai;

³⁶ Adravane ka awlrusu madha papiapia si kiketekete, asi lwiyane lri kaisu maka dulru ku vaeva ku isiu si pakabalrithi pakaicelrenge pakalrapungu.

³⁷ Lu kawriva numi, sanaka unu, unu iya, sanaka ini, ini iya; sana akukalralane kawriva twalainga kudra ki ngialisiane.”

Matiakai ki wabilri

³⁸ “Kialalranga numi ku miyaiya ki kai ku sabulrwane ku amia kai, ‘Lu kilengethe wabiilri lengethe, lu pararitaiti wabiilri pararitaiti.’

³⁹ Ai nau pelaela numiane, madha bilribilri papia kudra ki twasinalreme numiane.

⁴⁰ Lu ikai ku umawmase ku wacamilrigi pavanale ki cimisu, adravane kwi viri ki cimisu alra pacamilrigi iniane! Lu ikai ku umawmase ku wabilibili muswane pwa tasaibaibangane, si lri malra ku sapakadriadringanesu, adravane kwi sapakabelebelengane ku laimaisu baadha iniane!

⁴¹ Alaiyasi ikai ku umawmase ku wavuutha muswane patukudru ku ameceini si dadavace ku vaeva ka kunlri, tupapalra iniane dadavace ku drusa ka kunlri!

⁴² Lu ikai ku umawmase ku lri malra ku lamanemanesu, baadha iniane; lu ikai ku umawmase ku lri kisalru muswane ku lamanemane, baadha pakisalru iniane.”

Matiakai ki kialibake ki badha

⁴³ “La kilaalranga numi ku miyaiya kikai ku sabulrwane, ‘Kilibaka ki talragisu, la kalisia ki badhasu.’

⁴⁴ Ai nau pelaela numiane, kilibaka ki badha numi, si inulri pasikai ki twalilisi numiane.

⁴⁵ Lukamiyaiya kikai, lri dulru numi ka lalalake ki Tamaita ka yasubelebelenge. Asi lwiyane, kai Tamaita ka yasubelebelenge arakai ku vai paledra ki makalecege ka umawmase, mialri paledra ki manganga ka umawmase; wabaai paudale ki makalecege ka umawmase, la mialri paudale baai ki manganga ka umawmase.

⁴⁶ Lwiyasi kunumi la kilibake numi sikakathane kudra ki lakialibake numiane ka umawmase, ku Twaumase beekace pakalreva numiane? Adravane ka tarakikaziluzilu ka umawmase mialri pia kikai.

⁴⁷ Lwiyasi ara vaga numi pasudalru ki talragi numi sikakathane, manemane ku takasaniangane? Adravane ku kaika sinzia mialri thingale pia kikai!

⁴⁸ Kunumi kitulrepenga, mia ki Tama numi ka yasubelebelenge ka kiatulrepenge.”