Matai 3 - Ngudradreadrekadhane Ka Sisiu 魯凱語聖經

Tadindwane ki Yuhani ka tarapabanau

¹ Sakamani kwidra, ku Yuhani ka tarapabanau wakela mwa Yuda calragulragu dindu.

² Kwini lasu la iya kai, “Ngitatupela, asi lwiyane padethenga ku kuni ki Twaumase!”

³ Kai Yuhani amani kudra matikaikai ki yuginsia ka Isaiya; kai yuginsia amia kai: Ikai calragulragu yakai ku umawmase ku watawtawtau: Pasikaiya ki Tamatama padulru ku kadalrananeini, si dringelrese ku lrika angukaiyaneini ku kadalranane!

⁴ Ku Yuhani la siebele ku ubawbalane ku lrangici ki lrakeda, ku takilrisaisane la silakete ku lrangici, la kanekane ku apapawku si valu.

⁵ Ku laumawmase la twalai Yerusalrime, si Yuda kidruanga, si talikai kadravane Yuredange kainganai mucucubungu iniane.

⁶ Kwi lalasu makitu ngipapelaela ku pasalrivane lini, ku Yuhani la ikai kadravane Yuredange pabanau liniane.

⁷ Ku Yuhani la drele ku takaalra ku swa Palrisai si swa Sadukise ka umawmase mialri kainganai kitubi ku akipabanavane, la iya kai liniane, “Kunumi ka lasiduduku ka sulrau! Ku asaibangane ki Twaumase lri padaalrunga si kela, kunumi yai lri dulru nai ubere amiamia numi?

⁸ Arakaiya ku kakwakudhane numi patuthingale ala ka ngiatatupelanga numi.

⁹ Madha kirimurimu cucungulane nai ki Aberahame lri dulru nai ubere ki akisaibangane iyaiya! Nau pelaela numiane, ku Twaumase lri dulru malra kikai lalrenege si pasikai ki Aberahame bekace tulagagane!

¹⁰ Ku kumugu nisararanenga pikai ki tangadrane ki angatu, sana kai pumadru ku mathariri ka madru ku angatu lri kikumugu patueelre, si cilri pwa ki apwi.

¹¹ Arakaiyaku ku acilai pabanau numiane, ka sapathingalane ka ngiatatupelanga numi; ai, kudra tangeea kulri kabibilrili nakwane kela lri arakai ku Siri si apwi pabanau numiane. Kwi lasu sanianiange nakwane turaamuru, adravane ka atakililane ku keceini kainaku swadalepe.

¹² Kwi lasu waecenge ku balraku, si lri tapusu ki taleke, si pudrawsulane ku mugi; kudra lrapi, lai lri arakai ku kai maedredrepe ku apwi si lama!”

Kiapabanau ku Yesu

¹³ Sakamani kwidra, ku Yesu twalai Galrilri si papia kadravane Yuredange mwa kikawriva ki Yuhani, ku akipabanavane iniane.

¹⁴ La kirimu kai palraingi kai Yuhani, si iya kai, “Saanai kipabanavaku muswane, asu baalrelringa kela silape nakwane!”

¹⁵ Ai ku Yesu twabalre iya kai iniane, “Kikai pangimianga kikai, asi lwiyane lu piane kikai amani kudra pasalaladha ku murikai ki Twaumase.” Ku Yuhani ala palraingi iniane.

¹⁶ Ku Yesu la kipabanau, sa twalai ki acilai utaluvaivai, ka belenge la pasikai iniane nguelebane; kwi lasu la drele ku Ri ki Twaumase mia ki tavagu mulebe, si mwa iniane.

¹⁷ La pacuungulu, ikai ku lingau ku twalai belenge, iya kai, “Kikai amani ku kathalraili ka Lalake, madalamaku iniane.”