Matai 28 - Ngudradreadrekadhane Ka Sisiu 魯凱語聖經

Siaela panianiake ku Yesu

¹ Sangilribatenga ku Taisadrasadrane ka vai, sakalialiare ki niciwbi, ku Magedaleni ka Malria si tangea ka Malria maredele mwa drele ki tadralredralrekane.

² Ala kirimu pangicaeme lingilingi, ku sasiakawlu belenge ki Tamatama twalai ka belenge mulebe, la malra balrutai kwini ki lrenege, si nene ikai belenge.

³ Ku lringawini mia ki lrikace, ku laimaini la mia ki pasabu ku bulane.

⁴ Ku la wakadrekadrenge la ngituluku turamuru si manugiligili, mianga ki wapaacai.

⁵ Kwini sasiakawlu belenge la papia kwini ki labaibai iya kai, “Madha mukulukuludru! Wathingalaku numiane ka wasilasilape numi kudra kiakedrekedre piziwzika ka Yesu.

⁶ Kwini lasu kai yakainga kai! Singiakai ku taiyaneini, kwi lasu siaelanga panianiake. Bwala drela kai natapikaiyane iniane.

⁷ Kunumi lu kirimua katwase mwa pelaela ki lasituini iya kai, ‘Kwi lasu siaelanga panianiake, lri aswala numiane daruru mwa ka Galrilri; ikai kwini, lri drele numi iniane!’ Pulringaava kai taiyaneli numiane kikai la vaga.”

⁸ Kwini lamaliali la kirarimu katwase kwini ki tadralredralrekane, masamali la kiragai turamuru, la katwase lailai pelaela ki lasituini.

⁹ Ala kirimu, ku Yesu adrelane ikadalranane, si iya kai liniane, “Anu kasulivaliivate!” Kwini lalisu la arwacucubungu, si kebere ki drapaleini la sukubu iniane.

¹⁰ Ku Yesu la iya kai liniane, “Madha kakiwcu, lu pelaela ki laretesaneli, si mwa ka Galrilri iya liniane; ikai kwini, lri drele nakwane.”

Tapelaelane ki wakadrenge

¹¹ Sakatwatwaseana ikadalranane kwini lamaliali, kudra wakadrekadrenge ku kwapingi yakai kudra la matwase siwlri mucekele, si pelaela ki marudrange ki barakalai ku tangimiane patueelre.

¹² Ku marudrange ki barakalai si laciwru samapelaelanga, la malra ku makaalra ku paisu si baai ki lakwapingi.

¹³ La iya kai liniane, “Iyanga kai, sakamaungu wakela ku lasitu ki Yesu, la malra kupa si iluku ku kinawmasaneini saicengecenge nai kasipelrenge iyanga.

¹⁴ Alaiyasi thingalenga kikai ku sutuke, nai kamaninga ka kawariva, lri kai numi katumane lutuumane.”

¹⁵ Ku lakwapingi la tarumara kwini paisu, si pia singikai ku taiyane lini. Kikai nipasaravane kai vaga kai pakeelanga kaikameane matiakaikaiyana ikai ki swa Yuda.

Ku Yesu swadralru ku laawngane

¹⁶ Ku ta 11 ka situ sakelanga Galrilri, sa mwanga ku tapelaelane ki Yesu mwa kwini iya kudra ki lregelrege.

¹⁷ Kwini lalasu sadrele ki Yesu, la papia iniane sukubu; ai yakaiyana ku umawmase ku malrilrilrikiana.

¹⁸ Ku Yesu la dadavace arwadethe liniane, si iya kai liniane, “Ku Twaumase wamalra ku puku kai belenge si kawmasane si baainga nakwane patueelre.

¹⁹ Lakamani, kunumi lu mwa katwase, si paasitu nakwane ki sanaka kuni sanaka umawmase, si pangukai ku nagane ki Tama, ki Lalake, ki Siri pabanau liniane,

²⁰ si bulru liniane ku apaluludane ku baaili numiane sanaka padradrekaseli. Pulringava! Lrika tatapalraaneli numiane, pakeela ku talikaiyane kai kawmasane.”