Matai 27 - Ngudradreadrekadhane Ka Sisiu 魯凱語聖經

Ku Yesu kiasatedre pwa ki Pilatu

¹ Sakamialrealre, ku lamarudrange ki barakalai si laciwru ki swa Yuda makanaelre madrekadrekase, ku apapacadhane ki Yesu.

² Kwini lalasu la malra kerenge ki Yesu, si alra iluku, baai ki sutuke ki swa Ruma ka Pilatu.

Tapacadhane ki Yuda

³ Kudra kialangai ki Yesu ka Yuda wadrele sa kitupasalrivanenga ku Yesu, la ngitatasiwlriwlri, la malra kwini matulrulu ka gingi ka paisu si katwase baai sawlri ki marudrange ki barakalai si laciwru,

⁴ la iya kai, “Pasalrivaku, kialangadhaku ku niake ki kadrwa ku pasalrivane!” Kwini lalasu la tubalre iya kai, “Ngiakakamaningasu kwini, manemane ku akicapilaneana nai?”

⁵ Ku Yuda la cilri kwini paisu pwa ki daane ki Twaumase, si katwase kidrangi ngithathere.

⁶ Ku marudrange ki barakalai la malra siludu kwini paisu, si iya kai, “Kikai yai balrithane ki erai ka paisu, kai mamamua ki kakudhane lu pwane pwadringi ki lrulrui ki tapatarumaramarane ka langiane.”

⁷ Ku tamadrekadrekasane, kwini lalasu la mapalrailraingi alra kwini paisu si langai ku taluvaale ku kadaengane ki taratudilrudilrungu, si tutadralredralrekane ki badhabadha.

⁸ Ngwalai kikai, pakeelanga kaikameane ku laumawmase “Erai ka umawma” amiamiana kwini ki kadaengane.

⁹ Ku tangilribatane kikai ngiamianga ku nataiyane kai ki yuginsia ka Yerimia iya kai, “Kwini lalasu wamalra ku matulrulu ka gingi ka paisu, ka palraingi ki swa Iseraylri pasikai iniane baai ku salangadhane, la langai ku kadaengane ki taratudilrudilrungu;

¹⁰ kikai yai nisingikaiyane ku drekase ki Tamatama.”

Yacucubungu ki Pilatu kisaibange

¹¹ Ku Yesu acegecege ikai cucubungu ki sutuke ki swa Ruma, ku sutuke ki swa Ruma la kivaga iniane iya kai, “Talialalaisu ki swa Yuda?” Ku Yesu la tubalre iya kai, “Kikai yai amanisu ka amia.”

¹² Ku takukuswane ki lamarudrange ki barakalai si laciwru, kwini lasu kadruua ku tatubalreane.

¹³ La iya kai ku Pilatu iniane, “Kaisu kialalra kai takukuswane muswane ki lalasu kai taikalraane?”

¹⁴ Ku Yesu laka sakamiya kai tubalre ku naniakuvalanenga; ku Pilatu la kasamali turamuru.

Kiapathavungu kipapacai

¹⁵ Luka Takilragavane ka lrisi, ku sutuke ki swa Ruma singiakai ku tapiapiane pasikai ki mapapangale pulatadre ku tangea ku kiaemenge ka urikai lini.

¹⁶ Sakamani kwidra, la icengecenge ikai ku tangea ku kiamatikaikai ka kiaemenge ka sia [Yesu] Barabase.

¹⁷ Lakamani, ku mapapangale sa yelrelre, ku Pilatu kiavaga liniane iya kai, “Ani pasikai naiane pulatadre ki aneane amia numi nakwane? [Yesu] Barabase? Amani kudra kiapasi Yesu Kirisitu?”

¹⁸ Ku Pilatu wathingale ala ka pathalrane kwini ki lalasu ala ka amani ku alra lini ki Yesu si baai iniane.

¹⁹ Ku Pilatu sa saibaibange, ku taelrelreini siakawlu ki umawmase si pelaela iniane iya kai, “Kwini ngwakai ki kadrwa ku pasalrivane, madha kicaicapili, asi lwiyane ku maungu kiapakwalriaku ngukai iniane ikai ki sipili.”

²⁰ Ku marudrange ki barakalai si laciwru la pangiracuku ki mapapangale, kwini lalasu la kitubi ki Pilatu ku amuelebane pulatadre ki Barabase, si la papacai kamani ki Yesu.

²¹ Ai ku sutuke ki swa Ruma kiavaga liniane iya kai, “Kikai ki tadrusa ani pulatadre ki aneane amia numi nakwane?” Kwini lalasu la tubalre iya kai, “Barabase!”

²² Ku Pilatu la kivaga liniane iya kai, “Lai pangitumanaku ki sia Yesu Kirisitu?” Kwini lalasu la karaleale iya kai, “Alra iniane kedrekedre pwa ki ziwzika!”

²³ Ku Pilatu la kivaga iya kai, “Kai lasu manemane ku piaini ku ngialisiane?” Kwini lalasu laka akwadradrau karaleale iya kai, “Alra iniane pakedrekedre pwa ki ziwzika!”

²⁴ Sadrele ku Pilatu, la thingale adravane kawrivana kadruanga ku vai, lri aru pangiracukulringa ku akalrithavulane, la malra ku acilai si icucubungu ki mapapangale tawlrima, si iya kai, “Ku pawaludru ku erai kai ki umawmase, ku pasalrivane kai yakai nakwane, kunumi ngikakamanianga siamece!”

²⁵ Ku mapapangale la masiasilange iya kai, “Ku balrithane kai ki erai kai ki umawmase nai kamaaninga si lamwabaibalrithi naiane ka siamece!”

²⁶ Ku piratu la mukerenge ki Barabase si baai liniane, la drekase lrumai ki Yesu, ala baai ki umawmase si katwase pakedrekedre pwa ki ziwzika.

Ku kwapingi twamwamulrace ki Yesu

²⁷ Ku lakwapingi ki Pilatu la iluku ki Yesu pudaane ki daane ki sutuke; la irubu ngithalringulu iniane makanaelre.

²⁸ Kwini lalasu la mwalra ku laimai ki Yesu, si pasilaimai iniane ku duduli ka palimemelre,

²⁹ La tutawpu ku cecenekane ka angatu si pasitawpu iniane, la malra ku vaeva ku uvai si pikai ki vanaleini paecenge, ala pidruru icucubungu iniane si tumeamelrace iniane, la iya kai, “Talialalai ki swa Yuda banzai!”

³⁰ Kwini lalasu la sungalruthu iniane, la alra ku uvai si lrumai ki awlruini.

³¹ Kwini lalasu samaka tusinalrelremenga, la mwalra kwini silaimaini ka palimemelre, si sawlri pasilaimai ku laimaini, ala iluku iniane katwase pakedrekedre pwa ki ziwzika.

Ku Yesu kiakedrekedre pwa ki ziwzika

³² Kwini lalasu sa mulatadrenga, kiapadradresenge ku tangea ka swa Kurini ka sia Simune, la vutha paangeale iniane ku ziwzika ki Yesu.

³³ Kwini lalasu la kela kudra ki kadaengane, ka sia Gulugutha, ku pacugane “Awlru ka lrelrelrege” amia.

³⁴ Kwini lalasu la malra ku nipaibwane ku mapalili ka pagu ka bava si baai paungulu ki Yesu; la palalava ku Yesu, ai kai mwabangalre ungulu.

³⁵ Lakamani, kwini lalasu alra ki Yesu kedrekedre pibelenge ki ziwzika, la kuzibiki mavalavala ku laimaini;

³⁶ ala ikai kwini nene drangalru iniane.

³⁷ Kwini lalasu la pikai taibelenge ki awlruini ku nipacasane ku baali, ku pacase kwini ki baali amia kai, “Talialalai ki swa Yuda ka Yesu.”

³⁸ Kwini lalasu la malra ku tadrusa ku pasalriu si pakarededele kedrekedre pibelenge ki ziwzika, yavanale ku tangea, yaviri ku tangea.

³⁹ Ku ngwakai kwini lribate ku laumawmase twasinalrelreme ki Yesu, si veteevete ku awlru

⁴⁰ si iya kai, “Kusu ka kiasanu buruku ku daane ki Twaumase, si lai maka tutulrulu tupela tudaane! Luka Lalakesu ki Twaumase, ngipapalribula, la twalai ki ziwzika mulebe!”

⁴¹ Ku lamarudrange ki barakalai, si latarabulrubulru ki Sisiu, si laciwru la kathadaalrane ulralrakai iniane, si iya kai,

⁴² “Kai lasu palribulunga ki umawmase, la kai maka ngipapalribulu! Kai lasu kaika talialalai ki swa Iseraylri? Alaiyasi maka twalai ki ziwzika ulebe kaiasasane, kuta la takasalru iniane!

⁴³ Kai lasu satalu ki Twaumase, Lalakaku ki Twaumase la ngiaiya; mathariri, ala tadredreele ki Twaumase lu lri kela palribulu iniane lutumane!”

⁴⁴ Adravane kudra pasalriu si karedele kikedrekedre mialri tusinalrelreme iniane.

Tapacadhane ki Yesu

⁴⁵ Saka mwalringedele, la kadradrimiti kai kawmasane, lri ikai ku ngwatulru ki tuki.

⁴⁶ Samaka ulringedele lrika tulru ki tuki, ku Yesu la karaleale iya kai, “Ilri, Ilri, lramasapaketani?” Ku pacugane amia kai, “Twaumaseli, Twaumaseli, asu ciilri nakwane?”

⁴⁷ Kudra yathili acegecege ku laumawmase, yakai ku kialalra, la iya kai, “Wadawdawlu ki Ilria!”

⁴⁸ Ikai kwini la ikai ku tangea ku makakaai katwase lailai, malra ku vaeva ku pelrece, la taburu pwa ki maalriu ka bava, ala kerenge pikai ki uvai, si lri paungulu iniane.

⁴⁹ Kudra drumane ku umawmase la iya kai, “Idrengerana, tadredreleana lulri kela ku Ilria palribulu iniane lutumane!”

⁵⁰ Ku Yesu la peelanga akwadrau karaleale, si ala nguniakanenga.

⁵¹ Kikai kwidra, kudra nipakelradhane ikai ki daane ki Twaumase ku make, la twalai belenge mulebe kathurilace mawdrusa. La lingilingi kai kadaengane, aegacane ku alrisapesape si ngutukadre.

⁵² Ku tadralredralrekane la nguelebane ku talingilingane, takaalra ku lawapacainga ku mwalecege ku sinzia ku siaelane panianiake.

⁵³ Kwini lalasu la katwase tadralredralrekane, sa sielanga ku Yesu si la mucekele; Ikai kwini takaalra ku umawmase ku wadrele liniane.

⁵⁴ Ku wakadrekadrenge ki Yesu ku kiacapili ki kwapingi si lakwapingi la drele ku talingilingane si tangimiane patueelre, la makitu mukuludru turamuru, si iya kai, “Kai lasu patengatengane ka Lalake ki Twaumase!”

⁵⁵ Ikai kwini yakaiana ku lalabaibai ku yadaili dredredrele, kwini lalisu twalai Galrilri ka twapapapalra pasikaikai ki Yesu.

⁵⁶ Ikai liniane Yakai ku Magedaleni ka Malria, laka tina ki Yakubu si Yusepe ka Malria, si tina ki tadrusa ka lalake ki Zibidi.

Takidralrekane ki Yesu

⁵⁷ Sa kadradrimidrimiti, yakai ku tangea ku satacekecekelanane ka swa Arimatai kaiyanganai; kai lasu sia Yusepe, ka mialri ka situ ki Yesu.

⁵⁸ Kwini lasu matwase kikawriva ki Pilatu, si kitubi ku alrane dralreke ku kinawmasane ki Yesu; ku Pilatu la sikawlu pamalra ku kinawmasane ki Yesu si baai iniane.

⁵⁹ Ku Yusepe la malra kwini kinawmasane si katwase, la arakai ku mabula ku kaimadhane ka makalrilau pasimai iniane.

⁶⁰ Si pasutelrai pikai ki balriuini; kikai balriu tawkamanimani ku talrukwane tubalriu. Kwini lasu la malrana balrutai ku maadrau ku lrenege, si celrepe ki lrawlrawdru ki balriu, ala katwase.

⁶¹ Ku Magedaleni ka Malria si tangea ka Malria la nene cubungu ki balriu, ikai kwini drangalrungalru.

Ku wakadrenge ki balriu

⁶² Sakakaiyane, amani ku bibilrilinga ku tapadulrudulrwane ka vai, ku marudrange ki barakalai si swa Palrisai maredele katwase kikawriva ki Pilatu, si iya kai,

⁶³ “Mabelenge, pwalringauana nai kudra taratavuvuvulrucu sa italuvaivaiyana naamia kai, ‘Ki samakatulrulu lri sielaku panianiake.’

⁶⁴ Lakamani, kusu apadrekadrekasa ku apudriadringadhane kadrenge ki balriu, pakeela ki samakatulrulu, kwidra la situini lani kai dulru kupa si iluku iniane, lai katwase pelaela ki laumawmase iya kai, ‘Kwini lasu twalai ki wapacai sielane panianiake.’ Ku miyaiya kai ku tatavuvulrucane lrika parawramuru ki siaswalane ku angilisianane!”

⁶⁵ Ku Pilatu la iya kai liniane, “Kunumi lu iluka ku lri kadrenge, la pakeela ku tadulrwane numi, pudriadringai kadrenge ki balriu!”

⁶⁶ Ala katwase kwini lalasu, padakipi ku pinuhangeane pikai ki lrenege, si celrepe ki lrawlrawdru ki balriu, la suru ku wakadrenge si pakadrenge.