Matai 25 - Ngudradreadrekadhane Ka Sisiu 魯凱語聖經

Tamangeale ka tawvailekelekete ka pathalrilriku

¹ “Ikai kwini ki vai, kai kuni belenge maru amaaninga kikai lrika abubulrwane: Yakai ku tamangeale ku latawvailekelekete ku waecenge ku tatinakiane, la katwase kidredresenge ki marudrawdrange ka sawvalai.

² Kwini, la talrima ku makulrungu, talrima ku malrigili.

³ Ku makulrungu la iluku ku tatinakiane, ai kai padulru ku amakakelretane ku abera;

⁴ Ku malrigili la iluku ku tatinakiane, si patukudhana iluku ku abera.

⁵ Ku marudrarudrange ka sawvalai la kai sarakela, kwini latawvailekelekete la ngikatatutudru, si ereke.

⁶ “Sakelanga ki kabiceacelrakane, la ikai ku umawmase ku watawtau iya kai, ‘Wakelanga kai marudrarudrange ka sawvalai kunumi bwala kidredresenga iniane!’

⁷ Kwini tamangeale ka tawvailekelekete la pacunu makanaelre, si padalai ku tinaki lini.

⁸ Kudra makulrungu la iya kai ki malrigili, ‘Ta vala naiane kwini abera pakatiiki, asi lwiyane lri padaalrunga si kaedrepe kai tatinakiane nai.’

⁹ Kudra lamalrigili la tubalre iya kai, ‘Ini, kai abera nai lri kai makakelrete lu vala nai numiane, lu mwa ki siwbai ngilalangai kamani.’

¹⁰ Kwini makulrungu ka latawvailekelekete, sakatwase langai ku abera, la kela kwini marudrarudrange ka sawvalai. Kudra talrima ku ngiapapadulru la tupalra ki marudrarudrange ka sawvalai udaane, si taelre ngiakaneane, ku lrawlrawdru la elebenga.

¹¹ “Kudra drumane ku tawvailekelekete la kela kabibilrili; la akwadrau kawriva iya kai, ‘Tamatama, Tamatama, mueleba naiane!’

¹² Kwini marudrarudrange ka sawvalai la tubalre iya kai, ‘Kainaku wathingale numiane.’ ”

¹³ Ku Yesu la iya kai, “Lakamani, kunumi kasimeameaca kipapawlringalringau, asi lwiyane kai numi wathingale kudra vai, kudra zikange lu lrika amani lwigane ku akelane.”

Tatulru ka sasiakawlu ka pathalrilriku

¹⁴ “Kai kuni belenge la mia ki kikai lrika abubulrwane: Yakai ku tangea ku umawmase ku lri mubabadhane, kwini lasu la dawlu ki lasasiakawlu, si baai sudralru liniane ku tacekecekelane.

¹⁵ Kwini lasu la singikai ku puku lini ka tangeea, ku tangea la baai ku 5,000 ka kingi ka paisu, ku tangea la baai ku 2,000 ka paisu, ku tangea la baai ku kudrulu ka paisu, ala katwase mubabadhane.

¹⁶ Kudra wamalra ku 5,000 ku paisu, la makakaai katwase siwbai, la patulalake ku 5,000.

¹⁷ Laka thadaalrane, kudra tarwamara ku 2,000 ka paisu, mialri patulalake ku 2,000.

¹⁸ Ai kudra tarwamara ku kudrulu ka paisu, la katwase, si lruku ki kadaengane, la pwa dralreke kwini paisu ki tawki.

¹⁹ “Sakawlainga ku tangilribatane, kwini tawki ki lasasiakawlu la kelanga, si asipi ku takaungane lini.

²⁰ Kudra natarwamara ku 5,000 ku kingi ka paisu la kela mudaane, si iluku ku taingeane ka 5,000 ka paisu, si iya kai, ‘Tawki, ku baaisu nakwane ku 5,000 ka kingi ka paisu, drela, patwalalakaku kai 5,000 ka paisu.’

²¹ Ku tawki la iya kai, ‘Ala mathariri turamuru, kusu ka mathariri si matiasudralru ka sasiakawlu! Pangiamiasu ikai ki bekeelane, lri sudralrwaku pamarasikaiyaku muswane kai makaalra. Bwala mudaana si tupapalra ki tawkisu kisupisupilri si kiraragai!’

²² Kudra wamalra ku 2,000 ku kingi ka paisu, la mudaane, si iya kai, ‘Tawki, ku baaisu nakwane ku 2,000 ka kingi ka paisu, drela, patwalalakaku kai 2,000 ka paisu.’

²³ Ku tawki la iya kai, ‘Ala mathariri turamuru, kusu ka mathariri si matiasudralru ka sasiakawlu! Pangiamiasu ikai ki bekeelane, lri sudralrwaku pamarasikaiyaku muswane kai makaalra. Bwala mudaana si tupapalra ki tawkisu kisupisupilri si kiraragai!’

²⁴ Kikai kwidra, kwini wamalra ku kudrulu ka kingi ka paisu ka sasiakawlu la mialri kainganai mudaane, si iya kai, ‘Tawki, wathingalaku ala ka maelathesu turamuru; ku kaika nilredrekane, lri tara kitaalekesu, ku kaika nisabulane lai tara kitaalekesu.

²⁵ La mukuludraku, si malra kwini paisusu si dralreke pidaedae. Drela, kawvai kai paisusu.’

²⁶ Kwini tawkini la iya kai, ‘Kusu ka manganga si ka masasalrai ka sasiakawlu! Kudra wathingalesu adravane ka kaika nilredrekane lri tara kitaalekaku, ku kaika nisabulane lri tara kitaalekaku,

²⁷ asalu malrasu kwini paisuli si cukingi pwa ki ginku, si mukalava kudra takelaneli, lri dulru madu malra kwini tina si lalake ka paisu.

²⁸ Kunumi malra kwini kingi ka paisuini, si baai kwidra piakai ku kudrai ka kingi ka paisu.

²⁹ Asi lwiyane, kudra yakainga, lri baaiyana iniane pakakaakalra, lani kakalra si ikai ku tedrane; ala kudra pakakadrwa, adravane ka sakathathaane ka pikaini patuelre lri kimalra ribici.

³⁰ Ala kikai kadrwa ku vai ka sasiakawlu, pakatwasa pulatadre iniane pwa kadradridrimitane; ikai kwini, kwini lasu lri tubitubi, si apararitaitaiti.’ ”

Bibiilrilinga ka asaibangane

³¹ “Lu atalialalainga ku Lalake ki Umawmase, si kainganai karededele ki sasiakawlu belenge, kwini lasu lri nene ikai ki lrigu ka taetalane;

³² kai kawmasane sanaka umawmase lri irubu icucubungu iniane. Kwini lasu lai lri alra liniane apalralrigane, maru amaninga ki taraagwagu ki kiu patwalai ki kiu malra patukudha ki nikiubawbalane ka kiu.

³³ Kwini lasu lri malra kwini ki nikiubawbalane ka kiu si pikai tali vanale, lai pikai viri ki kiu.

³⁴ Ala lri iya kai ku talialalai kwini ki yavanale iniane: ‘Kunumi ka kiasubulrubulru ki Ama ka laumawmase; bwala! La tarumara kai kuni kai twalai saka tabekacane nipadulrwane pasikai numiane.

³⁵ Asi lwiyane sa kasilravaku, wapakane numi nakwane, sa kakadhamaku, paungulu numi nakwane; sa ikaiyaku badhabadhane, paswadalru numi nakwane pwa ki daane numi;

³⁶ sa vilralrakanaku pasialaimai numi nakwane; sa kacaemaku, la sirapale numi nakwane; sa kiemengaku, wakela numi lrikape nakwane.’

³⁷ Lukamani kwidra, ku lamadringelrese ka umawmase lri tubalre iya kai: ‘Tamatama, amani kwigane ku tadrelane nai sa kasilrawsu si pakane muswane? Sa kakadhamesu, si paungulu nai muswane?

³⁸ Amani kwigane ku tadrelane nai sa ibadhabadhanesu si pasudalru nai muswane pwa ki daane nai? Ku tadrelane nai lu vilralrakanesu si pasilaimai nai muswane?

³⁹ Wadrele nai kwigane sakacaemesu, sa kiemengesu si katwase nai lrikape muswane?’

⁴⁰ Ku talialalai lai lri tubalre iya kai, ‘Nau pudriadriingai pelaela numiane, kilakikai paiya numi pikai ki titikiyanenga ikai ki twapapapalra nakwane, amaninga ku pasiakai nakwane!’

⁴¹ “Ku talialalai ala papia ki tali virini ka umawmase iya kai, ‘Katwasa! Kunumi ka nipuswane ki Twaumase, katwasaili! Si mwa kudra ki palralrawthu kai kaedrepe ka apwi ka nipadulrudulrwane pasikai ki Akema si twapapapalra iniane!

⁴² Asi lwiyane sa kasilravaku, kai numi wapakane nakwane, sa kakadhamaku la kai numi paungulu nakwane;

⁴³ sa ibabadhanaku, kai numi paswadalru nakwane pwa ki daane numi; sa vilralrakanaku, kai numi pasialaimai nakwane; sa kacaemaku sa kiemengaku, la kai numi sirapale nakwane.’

⁴⁴ Sa iya kwini, kwini lalasu lai lri iya kai, ‘Tamatama, amani kwigane sa drele nai lu kasilrawsu, lu kakadhamesu, lu ibabadhanesu, lu vilralrakanesu, lu kacaemesu, lu kiemengesu, si kai nai paralubu muswane?’

⁴⁵ Ku talialalai lai lri iya kai tubalre liniane, ‘Nau pudriadriingai pelaela numiane, kudra kai numi paiya pikai ki titikiyanenga ka umawmase, amani kudra kai pasiakai nakwane kaungu.’

⁴⁶ Kudra miyaiya kai ku umawmase lrika palralrawthunga ku akipathavunganeini. Kudra la madringelrese ka umawmase, kwini lalasu lri tara maalra ku palralrawthu ka niake.”